ރ.ފުއްގިރި ކުއްޔަށް ދިނުމާ ގުޅިގެން ކުރީގެ ރައީސް އަބްދުالله ޔާމީނާއި އިތުރު ބަޔަކަށް ދައުވާކުރާ މައްސަލާގެ ޝަރީއަތް ކްރިމިނަލް ކޯޓުން މަޑުޖައްސާލަން ސުޕްރީމް ކޯޓުން އަމުރުކޮށްފި އެވެ.

އެ މައްސަލަ މަޑުޖައްސާލަން ސުޕްރީމް ކޯޓުން މިއަދު އެންގީ އެ މައްސަލާގެ ޝަރީއަތުގެ ކުރީގެ ހުށަހެޅުންތަކާ މެދު ނިންމި ބައެއް ނިންމުންތައް ޔާމީންގެ ފަރާތްޕުޅުން ސުޕްރީމް ކޯޓުގައި އިސްތިއުނާފް ކުރައްވާފައިވާތީ އެ މައްސަލަ ނިމެންދެންނެވެ.

މިއަދުގެ އަޑުއެހުމުގައި ދައުލަތުގެ ފަރާތުން ވަނީ، ކްރިމިނަލް ކޯޓުގައި ކުރިއަށްދާ އެ މައްސަލައިގެ ޝަރީއަތް އަވަސް ކުރުމަކީ ދައުވާ ލިބޭ ފަރާތްތަކުގެ މަސްލަހަތު ހިމާޔަތް ކުރެވޭނެ ގޮތެއް ކަމަށް ވިދާޅުވެފައެވެ. އަދި ދަށު ކޯޓުގައި ޝަރީއަތް ކުރިއަށް ގެންދިޔަޔަސް ގެއްލޭނެ ހައްގެއް ނެތް ކަމަށް ދައުލަތުން ބުންޏެވެ.

Advertisement

ރައްދުގައި ޔާމީން ވަނީ، އެ މައްސަލައަކީ ކޯޓުގައި އޮންނަތާ ތިން އަހަރުވީ މައްސަލައެއްކަން ފާހަގަކުރައްވައި އެ މައްސަލައިގެ ހެކިބަސް ނެގުން ކޮންމެ ދެ ދުވަހަކުން އެއް ދުވަހު ބާއްވަނީ ހެކިވެރިންނާ ސުވާލުކުރައްވަން ތައްޔާރުވެވަޑައިގަތުމަށް ވަކީލުންނާވެސް ބައްދަލުކުރެއްވުމުގެ ފުރުސަތު ނުލިބޭ ގޮތަށްކަން ފާހަގަކުރައްވާފައެވެ.

"އަޅުގަނޑަކީ ގައިދީއެއް. އަޅުގަނޑަކަށް ނުލިބޭ މައްސަލަ އަށް ތައްޔާރުވާން އެކަށީގެންވާ ފުރުސަތެއް،" ސުޕްރީމް ކޯޓުގެ މިއަދުގެ ޝަރީއަތުގައި ޔާމީން ވިދާޅުވި އެވެ.

ޔާމީންގެ އިތުރުން، ސްޕްރީމްކޯޓުގައި މި މައްސަލައާ ގުޅިގެން އިތުރު އިސްތިއުނާފީ މައްސަލައެއް، މި މައްސަލާގައި ދައުވާ ރައްދުވާ އަނެއް ފަރާތްކަމަށްވާ އަޙްމަދު ކުރިކު ރިޒާގެ ފަރާތުންވެސް ވަނީ ހުށަހަޅާފައެވެ.

އެ މައްސަލައިގެ މިއަދުގެ އަޑުއެހުމުގައި ކުރިކު ރިޒާގެ ވަކީލު ހަމްޒާ ވެސް ވަނީ މައްސަލާގައި ހެކިބަސް ނެގުން އަވަސް އަރުވާލައިގެން ގެންދާއިރު ކުރިމިނަލް ކޯޓުން މިހާރުވެސް އެ ކޯޓުގައި ޖާގައިގެ ދަތިކަން ދިމާވުމުން ކޮންމެ ދުވަހަކު ޤާޟީންނަށް މައްސަލަތައް ނުބޭއްވޭކަމަށް އަންގާފައިވާ ފާހަގަކުރައްވާފައެވެ. އެހެން ނަމަވެސް ފުއްގިރި މައްސަލަ ބޭއްވުމުގައި އެއްވެސް ދަތިކަމެއް ދިމާނުވެ ބަރާބަރަށް ދުވަހުން ދުވަހަށް މައްސަލަ ބޭއްވޭ ކަމަށްވެސް އޭނާ ވިދާޅުވި އެވެ. 

ވަކީލުންގެ ވާހަކަތައް އަޑުއެއްސެވުމަށްފަހު، ފަނޑިޔާރުންގެ މެދުގައި މަޝްވަރާ ކުރެއްވުމަށްފަހު ސުޕްރީމް ކޯޓުގެ ބެންޗުން އިއުލާން ކުރެއްވީ އަންނަ ހަފުތާގެ ހޯމަ ދުވަހާ ހަމައަށް ޝަރީއަތް މަޑުޖައްސާލަން އަމުރުކުރަން ނިންމަވާ ކަމަށެވެ.

ސުޕްރީމް ކޯޓުން އެ މައްސަލަ ބައްލަވަނީ ފަނޑިޔާރު ހުސްނުއްސުއޫދާއި ފަނޑިޔާރު އައިޝާ ޝުޖޫން މުހައްމަދުގެ އިތުރުން ފަނޑިޔާރު ޑރ. މުހައްމަދު އިބްރާހިމެވެ. ބެންޗުގެ ރިޔާސަތަކީ ފަނޑިޔާރު ސުއޫދެވެ.

ފުއްގިރި މައްސަލާގައި ޔާމީނާއި އިތުރު ބައެއްގެ މައްޗަށް ކުރާ ރިޝްވަތާއި މަނީ ލޯންޑްރިންގެ ދައުވާތަކުގެ ޝަރީއަތް ކްރިމިނަލް ކޯޓުގައި މިހާރު ދަނީ ކުރިއަށެވެ. އެ މައްސަލާގެ ހެކިބަސް ނެގުން މާދަމާ ކުރިއަށް ގެންދަން ކްރިމިނަލް ކޯޓުން އޮތީ ހަމަޖައްސައިފަ އެވެ.