ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެވަޑައިގެންފައިވާ ގޮތަށް އަންނަ ޖޫން މަހުގައި ނުކުޅެދުންތެރިކަން ހުންނަ ފަރާތްތަކުގެ އިނާޔަތް ބޮޑުވާނެ ކަމަށް ރައީސް އޮފީހުގެ ތަރުޖަމާނު ވިދާޅުވެއްޖެއެވެ. 

ނުކުޅެދުންތެރިކަން ހުންނަ މީހުންނަށް މިހާރު ދެނީ މަހަކު 2،000 ރުފިޔާގެ އެލަވަންސެކެވެ. އެއީ މާ ކުޑަ މިންވަރެއް ކަމަށް ބުނެ، އެ އެލަވަންސް 5000 ރުފިޔާ އަށް ބޮޑުކޮށްދިނުމަށް، ލޯފަން މީހުންނާ އެކު ރައީސް ސޯލިހު 2021 ވަނަ އަހަރު ބޭއްވެވި ބައްދަލުވުމެއްގައި އެ މީހުންގެ ފަރާތުން ވެސް ވަނީ ރައީސް ސޯލިހަށް ދަންނަވާފަ އެވެ.

އަދި މިއަހަރަށް ރައްޔިތުންގެ މަޖިލިސް ހުޅުވުމަށް ބޭއްވި ޖަލްސާގައި ރިޔާސީ ބަޔާން އިއްވަވަމުން ރައީސް ސޯލިހު ވަނީ ނުކުޅެދުންތެރިކަން ހުންނަ މީހުންނާއި ބެހޭ ގާނޫނުގެ ދަށުން އެކުލަވާލަންޖެހިފައި އޮތް ނުކުޅެދުންތެރިކަން ހުންނަ މީހުންގެ ރަޖިސްޓްރީ އެކުލަވާލައި ނިންމާފައިވާ ކަމަށް ވިދާޅުވެފައެވެ. 
އަދި ޖޫން މަހުން ފެށިގެން އެމީހުންނަށް ސަރުކާރުން ދޭ އެލަވަންސް ބޮޑުކުރައްވާނެކަމަށްވެސް ރައީސް ޞާލިހު ވަނީ ވިދާޅުވެފައެވެ. 

އެހެން ނަމަވެސް، ސިއްޙީ ދާއިރާގެ މުސާރައަށް މި އައި ބަދަލުތަކާއި ގުޅޭ މައުލޫމާތުތައް ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި ޖެންޑާ މިނިސްޓަރު އައިޝަތު މުޙައްމަދު ދީދީ ވަނީ ނުކުޅެދުންތެރިކަން ހުންނަ ފަރާތްތަކަށް ސަރުކާރުން ދޭ އެލަވަންސު ބޮޑުކުރާނެ ވަކި ތާރީޚެއް ދަންނަވަން ދަތި ކަމަށް ވިދާޅުވެފައެވެ. 

އަދި އެފަހުން ރައީސް އޮފީހުން ބޭއްްވި ނޫސްވެރިންގެ ބައްދަލުވުމުގައި މިއުވާންވެސް ވަނީ އެފަދައިން ވިދާޅުވެފައެވެ. 

އެކަމާއި ގުޅިގެން ލޯފަން މީހުންގެ ހައްގުގައި މަސައްކަތް ކުރާ ޖަމިއްޔާގެެ މެންބަރަކު ކުރެއްވި ސުވާލަށް ޖަވާބު ދެއްވަމުން މިއުވާން ވިދާޅުވީ އެފަދައިން އެ ބައްދަލުވުމުގައި ވިދާޅުވެވުނީ ޔަގީން ނުކޮށް އެއްޗެއް ވިދާޅުނުވަން ކަމަށެވެ. އަދި ރިޔާސީ ބަޔާނުގައި ރައީސް ޞާލިހު ވިދާޅުވި ފަދައިން ނުކުޅެދުންތެރިކަން ހުންނަ ފަރާތްތަކުގެ އިނާޔަތް ޖޫން މަހުން ފެށިގެން ބޮޑުވާނެ ކަމަށާ އެކަން އެމަނިކުފާނު އިޢުލާން ކުރައްވާނެ ކަމަށް ވިދާޅުވިއެވެ. 

"އަޅުގަނޑަށްވެސް އެކަމުގެ ސްޓޭޓަސް އޭރުގައި އޮތްގޮތެއް ޔަގީންކޮށް ނޭނގިގެން ނުދެންނެވީ. ފަހުން އެ ސުވާލު ކޮށްލިން. ދެން ހަމަ ޖޫން މަހުން ފެށިގެން ބޮޑުކުރާ ގޮތަށް އޮތީ. މިދިޔަ އަހަރު އެކަން ނުކުރެވުނީ ރެޖިސްޓްރީ އެކުލަވާލުމާއި ކަންކަން އެއްކޮށް ނުނިމި އޮތީމާ. މި ޖޫން ގަ ހަމަ ބޮޑުވާނެ. ދެން ރައީސުލްޖުމްހޫރިއްޔާ އޭތި އިއުލާން ކުރައްވާނީ. ރައީސް ވިދާޅުވި ގޮތަށް އޭތި ކުރިއަށް ދާނެ." މިއުވާން ވިދާޅުވިއެވެ. 

އެކަމާއި ގުޅިގެން "ވޮއިސް" އިން ސުވާލު ކުރުމުންވެސް  މިއުވާން ވަނީ ޖޫން މަހުގައި އިނާޔަތް ބޮޑުވާނެ ކަމަށް ވިދާޅުވެފައެވެ.