އއ. އުކުޅަހު ބަނދަރުގައި އޮތް ރާ ވިއްކާ ކަމަށް ތުހުމަތު ކުރެވޭ "ޒެޑް ކުރޫޒާ" ސަފާރީ ބަނދަރުން ނެރުމުގެ ކޯޓު އަމުރެއް ނެރެދިނުމަށް އެދި މިރޭވެސް ރައްޔިތުން ކައުންސިލް ދޮށަށް އެއްވެއްޖެއެވެ.
އުކުޅަހުން، "ވޮއިސް" އަށް މައުލޫމާތު ދިން ފަރާތެއް ވިދާޅުވީ، މިރޭގެ ބައްދަލުވުން ކުރިއަށް ގެންގޮސްފައިވަނީ ކައުންސިލާއި އއ. އަތޮޅުގެ ފުލުހުންގެ އެޓޯލް ހެޑް އާއި ވެސް އެކުގައި ކަމަށެވެ. އަދި މިރޭގެ ބައްދަލުވުމުގައި ރައްޔިތުންގެ އެދިފައިވަނީ ސަފާރީ ބަނދަރުން ނެރުމުގެ ކޯޓު އަމުރެއް ނެރެދިނުމަށް ކުރަންޖެހޭ ކަންކަން ކުރަން ކަމަށާ، އެގޮތުން، އެކަމަށް އެދި ކައުންސިލުން ސިޓީ ލިޔަންދެން ކައުންސިލުން ނުދާނެ ކަމަށް ރައްޔިތުން ބުނަމުން އަންނަ ކަމަށެވެ.
ކައުންސިލް އަދި ފުލުހުންނާއި އެކު މިރޭ ބޭއްވުނު ބައްދަލުމުގެ ތެރެއިން
"އަޅުގަނޑުމެން މިހާރު ކައުންސިލާ މިކަމާއި ގުޅިގެން ވާހަކަ ދައްކާތަ 4 ވަރަކަށް ދުވަސް މިވަނީ. ރޭގައިވެސް ބައްދަލު ކޮށްފައި ވާނީ. އަޅުގަނޑުމެންގެ ޝަކުވާ އަކީ، މީގެ ކުރިންވެސް ރާ ވިއްކި ކަން އެނގޭ ސަފާރީ އެއް އެގޮތަށް ހުއްދަ ނެތި ބަނދަރުގައި އޮންނާތީ. ކައުންސިލުން އެބަ ބުނޭ ހުއްދައެއް ނުދެމޭ. އެހެން ވީ އިރު ބަނދަރުގައި އެ ސަފާރީ ބޭއްވިގެން ނުވާނެ. އެއީ އުކުޅަހު ކައުންސިލްގެ ބަނދަރު ގަވާއިދާވެސް ޚިލާފް ކަމެއް. އެހެންވީމާ އެ ސަފާރީ ބަނދަރުން ބޭރު ކުރުމުގެ ކޯޓު އަމުރެއް ނެރެދިނުމަށް އެދި ކައުންސިލުން ސިޓީއެއް ލިޔޭތޯ މި ތިބީ. ކައުންސިލުން ބުނަނީ ލިޔާ ވާހަކަ. އެކަން ކޮޅެއްގައި ޖެހުނީމާ މިރޭ ކައުންސިލުން ދާނީ އަޅުގަނޑުމެން. މިހާރުވެސް މިތިބީ ކައުންސިލްގެ މީޓިން ރޫމުގައި. އެފަރާތުގެ ޖަވާބެއް ލިބެންދެން. މިއީ ވަރަށް ގިނަ ރައްޔިތުންގެ ކަންބޮޑުވުން އޮތް ކަމެއް."
މި މައްސަލައާއި ގުޅިގެން "ވޮއިސް" އިން އުކުޅަހު ކައުންސިލްގެ ބަހެއް މިރޭ ލިބޭތޯ މަސައްކަތް ކޮށް އަދި ލިބިފައެއް ނުވެއެވެ.
ނަމަވެސް ރައްޔިތުންނާއި އެކު، ކައުންސިލުން މިރޭ ބޭއްވި ބައްދަލުވުމުގެ ވީޑިއޯ "ވޮއިސް" އަށް ލިބިފައިވާއިރު، އެ ވީޑިއޯގަައިވެސް ކައުންސިލުން ވަނީ ކޯޓު އަމުރެއް ނެރެދިނުމަށް އެދި ފުލުހުންނަށް ސިޓީ ލިޔުމުގެ ކަންކަން ކުރާނެ ކަމަށް ބުނެފައެވެ.
އެ މައްސަލާގައި މީގެ ކުރިން ވޮއިސްއަށް މައުލޫމާތު ދެއްވަމުން އުކުޅަހު ކައުންސިލްގެ ރައީސް ޝައުކަތު އިބްރާހިމް ވިދާޅުވީ، އެ ސަފާރީ އެރަށުގެ ބަނދަރުގައި ބޭއްވުމުގެ ހުއްދައަށްއެދި އެ ރަށު ކައުންސިލަށް ސަފާރީގެ ފަރާތުން އެދިފައިވަނީ މިމަހު 2 ވަނަ ދުވަހުގެ ރޭގެ ވަގުތެއްގައި ކަމަށެވެ. އަދި އެކަމާއި ގުޅިގެން، ކައުންސިލުން ސަފާރީއަށް ހުއްދަ ނުދެނިސް އެ ސަފާރީ ބަނދަރަށް ވައްދާފައިވާ ކަމަށާ، މިހާރުވެސް ސަފާރީ ބަނދަރުގައި އޮތީ ކައުންސިލްގެ ހުއްދަ ނެތި ކަމަށެވެ.
"އަޅުގަނޑުމެންގެ އެބަ އޮވޭ ކައުންސިލުން ހަދާފައި ގަވާއިދެއް. ބަނދަރު ގަވާއިދު. އޭގައިވާގޮތުން، އަޅުގަނޑުމެން ބޭނުމިއްޔާ ސަފާރީ އަށް މަރާމާތުގެ މަސައްކަތަށް ބަނދަރުގައި އެޅުމުގެ ހުއްދަ ދެވޭނެ. ބޭނުމިއްޔާ ނުދެވޭނެވެސް. އެކަމަކު މިއީ މީގެ ކުރިން ވެފައި ނެތް ކަމެއް ވީމާ، އަޅުގަނޑުމެން އެލްޖީއޭ އާއި، ޓޫރިޒަމް މިނިސްޓްރީއާއި، ފުލުހުންނާވެސް ވާހަކަ ދައްކަމުން މިދަނީ މިކަމުގައި ކަން ކުރާނެ ގޮތާއި މެދު. ދެން އެ ސަފާރީން ރާ ވިއްކާ ކަމަށް ވާހަކަތައް ދެކެވުނު ކަމަށްވެސް ބަނދަރުގައި އޮވެގެން އެކަން ކުރި ކަމަށް ޔަގީނަށް އެނގިފައެއްނެތް. އެކަމަކު ރައްޔިތުންގެ އެ ކަންބޮޑުވުން ހުރީމާ، އެކަމާއި ގުޅިގެން ކަންކަން ބަލަމުން މިދަނީ ވަރަށް ގާތުން." ކައުންސިލްގެ ރައީސް ވޮއިސް އަށް ދެއްވި ބަސްދީގަތުމެއްގައި ވިދާޅުވިއެވެ.
Advertisement
This content is created and paid for by advertisers and does not involve Voice Journalists
