ދައުރުގެ ފަހު އަހަރު ހުޅުމާލެ ދެވަނަ ފިޔަވަހީގައި ކުރީ ސަރުކާރުން އަޅާފައިވާ ހިޔާ ފްލެޓުތަކުގެ ކުއްޔަށް ސަރުކާރުން ލުއިދިނީ ފަހަރެއްގައި ވެސް ރިޔާސީ އިންތިޚާބު ބޯމަތިވުމުން ނޫން ކަމަށް ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވެއްޖެ އެވެ. 

ހިޔާ ފްލެޓުގެ ކުށްޔަށް ސަރުކާރުން ގެނައި ބަދަލުތަކާއި ގުޅޭގޮތުން މައުމޫލާތު ދިނުމަށް މިަދު ބޭއްވި ޕްރެސް ކޮންފަރެންސްގައި އަކުރަމް ކަމާލުއްދީން ވިދާޅުވީ ކުލި ދައްކަން ޖެހޭ މުއްދަތު އިތުރުކޮށް މަހު ކުލީގެ ގޮތުގައި 5300 ރުފިޔާ ދައްކަން ޖެހޭގޮތަށް ކުއްޔަށް ބަދަލު ގެނެސްފައިވާ ކަމަށެވެ. 

ސަރުކާރުން މި ބަދަލު ގެނެސްފައިވާއިރު، މީގެ ކުރިން ބުނަމުން ގޮސްފައިވަނީ ހިޔާ ފްލެޓުގެ ކުލި ކުޑަކުރެވޭނެ އެއްވެސް ގޮތެއް ނެތް ކަމަށެވެ. އަދި އެ ފްލެޓުތަކުގެ ފިނިޝިން މަސައްކަތް ސަރުކާރުގެ ޚަރަދުގައި ކުރުމަކީ ވެސް މާލީ ބުރައެއް އުފުލަން ޖެހޭނެ ކަމެއްގެ ގޮތުގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވަނީ ސިފަކުރައްވާފަ އެވެ. 

އެހެންކަމުން މިއަދުގެ ޕްރެސް ކޮންފަރެންސްގައި ނޫސްވެރިއަކު ވަނީ މިހާ ދުވަހު އެ ބަދަލު ނުގެނެސް މަޑުކުރީ ކޮން ސަބަބަކާ ހުރެތޯ ސުވާލުކޮށްފަ އެވެ. އަދި މި ސަރުކާރުގެ ފަހު އަހަރުގައި މި ބަދަލު ގެނައުމުން އެއީ ރިޔާސީ އިންތިޚާބާއި ދިމާކޮށް ގެނައި ބަދަލެއްކަމަށް ބައެއް ފަރާތްތަކުން ތުހުމަތުތައް ކުރަމުންދާއިރު، ކުއްޔަށް ދައުރުގެ ފަހު އަހަރު ބަދަލު ގެނައި ސަބަބަކީ ކޮބައިތޯ ނޫސްވެރިއަކު ސުވާލު ކުރިއެވެ. 

އެ ސުވާލަށް ޖަވާބުދެއްވަމުން އަކުރަމް ވިދާޅުވީ ހިޔާ ފްލެޓުގެ ކުއްޔަށް ލުއި ގޮތްތަކެއް ހޯދާދިނުމަށް ސަރުކާރުން މަސައްކަތްތަކެއް ކޮށްފައިވާ ކަމަށެވެ. އެގޮތުން ކުލި ލުއިކޮށްދީފައިވަނީ ޕްރޮސެސްއެއްގެ ތެރެއިން ކަމަށާއި، އެ މަސައްކަތް އަބަދުވެސް ދިޔައީ ސަރުކާރުން ކުރަމުން ކަމަށް އޭނާ ވިދާޅުވި އެވެ. އަދި ފަހު އަހަރު ކުލި ލުއިކުރުމަށް ނިންމި ނަމަވެސް އެއީ ރިޔާސީ އިންތިޚާބު ބޯމަތީގައި އޮތުމުން ނިންމި ނިންމުމެއް ނޫންކަމަށް އޭނާ ވިދާޅުވި އެވެ. 

ހުޅުމާލޭ ދެވަނަ ފިޔަވަހީގައި އިމާރާތް ކޮށްފައިވާ ހިޔާ ފްލެޓްގެ ހަތް އަހަރު ކުލީގެ ގޮތުގައި މަހަކު 5300 ރުފިޔާ ދައްކަންޖެހޭ ގޮތަށް ސަރުކާރުން ވަނީ ބަދަލު ގެނެސްފަ އެވެ. 

އެންމެ ފުރަތަމަ 2021 ވަނަ އަހަރު ހިޔާ ފްލެޓްގެ ކުލި ކަނޑައެޅުމުގައި، މަޝްރޫއުގެ ހުރިހާ ހަރަދުތައް ހިމެނުމަށްފަހު ހިސާބު ހެދުމުން، ކުލީގެ ގޮތުގައި މަހަކު 10،000 ރުފިޔާ ދައްކަން ޖެހޭނެކަމަށް އަންދާޒާ ކުރެވުނު ކަމަށް ސަރުކާރުން ވަނީ ބުނެފަ އެވެ. 

އެހެން ނަމަވެސް އެ އަދަދަކީ އެކަށީގެންވާ ވަރަށް ވުރެ ބޮޑު އަދަދަކަށް ވާތީ، ސަރުކާރުން ވަނީ މުޅި ހިޔާ މަޝްރޫއުގެ 3.7 ބިލިއަން ރުފިޔާ ސަބްސިޑައިޒްކޮށް ހިޔާގެ ކޮންމެ ފްލެޓެއްގެ ޖުމްލަ ކުލިން 550،000 ސަރުކާރުންދޭ ސަބްސިޑީއެއްގެ ގޮތުގައި ހަމަޖައްސައި ހިޔާގެ ކުލީގެ ގޮތުގައި 7500 ރުފިޔާ ކަނޑައަޅާފައެވެ.

ރައީސް ޔާމިންގެ ސަރުކާރުން ނިންމާފައި އޮތީ ކުލީގެ މުއްދަތު އިތުރުނުކޮށް 5,500 ރުފިޔާ މަހުކުލީގެ ގޮތުގައި ދައްކަން ޖެހޭގޮތަށް ނިންމާފަ އެވެ. އެހެން ނަމަވެސް ސަރުކާރު ބަދަލުވުމާއެކު، އެ ނިންމުމަށް އޭރު ބަދަލު ގެނައީ، އެއީ އެކަން ކުރެވޭނެ އުސޫލު ނޫންކަމަށް ސަރުކާރަށް ގަބޫލު ކުރެވުމާއި އެކުގަ އެވެ.