އެންވަޔަރަމެންޓް މިނިސްޓްރީގެ ސްޓޭޓް މިނިސްޓަރު ހަސަން މުޣުނީ، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ވަގަށް ގޮވައި ޓުވީޓް ކުރައްވައިފި އެވެ. 

ސަރުކާރުގެ ކުންފުނިތަށް ހިންގަވަން ތިބި ފަރާތްތަކުގެ ނަޒާހާތްތެރި ކަމެއް ނެތް ކަމަށާ، އެ ފަރާތްތަކުން ހިންގާފައިވާ ކޮރަޕްޝަންގެ އަމަލުތައް ހާމަކުރުމަށް ގޮވާލައި މީހަކު ކޮށްފައިވާ ޓުވީޓެއް ރިޓުވީޓް ކުރައްވަމުން މުޣުނީ ކުރައްވާފައިވާ ޓުވީޓްގައި އޭނާ ވަނީ ރައީސް ޞާލިހު އަކީ ހިންނަވަރު ވަގު ކަމަށް ވިދާޅުވެފައެވެ. 

އަދި ސަރުކާރުގެ ކުންފުނިތައް ހިންގެވުމަށް އެމަނިކުފާނު އިސްކުރައްވާފައިވަނީ ހައްތާވެސް ގާބިލިއްޔަތު ކަމެއް އަދި ނަޒާހާތްތެރި ކަމެއް ނެތް ވެރިން ކަމަށްވެސް މުޣުނީ ވިދާޅުވިއެވެ. 

Advertisement

އަދި މި ކޮރަޕްޓް ސަރުކާރު ނިމެން ދެން އިނީ އެންމެ 4 މަސް ކަމަށްވެސް އޭނާ ވިދާޅުވި އެވެ. 

ރައީސް ޞާލިހަށް ވަގަށް ގޮވައި މުޣުނީ ކުރެއްވި މި ޓުވީޓް މިހާރު އޭނާ ވަނީ ޑިލީޓް ކޮށްލާފައެވެ. 

ސަރުކާރަށް ފާޑުވިދާޅުވެ އަދި ރައީސުލްޖުމްހޫރިއްޔާ އަށް ވަގަށް ގޮވައި މުޣުނީ ޓުވީޓް ކުރައްވާފައިވާއިރު، އޭނާ ހުންނެވި މަގާމަކީވެސް، ރައީސުލްޖުމްހޫރިއްޔާ އަށް ލިބިދޭ ބާރުގެ މަތިން އުފައްދަވާފައިވާ ސިޔާސީ މަގާމެކެވެ. އަދި އެމަގާމަށް އޭނާ އައްޔަނު ކުރައްވާފައިވަނީވެސް ރައީސުލްޖުމްހޫރިއްޔާ އެވެ. 

ހަސަން މުޣުނީއަކީ ރައީސް ޞާލިހް ސަރުކާރުގެ ޖުމްހޫރީ ޕާޓީގެ ސްލޮޓްގައި ސްޓެލްކޯގެ މެނޭޖިންގ ޑިރެކްޓަރުގެ މަޤާމުގައި ހުންނެވި ބޭފުޅެކެވެ. ފަހުން އެ މަޤާމުން ވަކި ކުރައްވައި ސްޓޭޓް މިނިސްޓަރ ކަން އޭނާއަށް ވަނީ ދެއްވާފައެވެ.