ޗާގޯސްގެ ކަނޑުގެ ސަރަހައްދުގެ ފުށުއަރާ ބައި ވަކިކުރުމަށް ބޭއްވުނު ޝަރީއަތުގައި، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު މޮރިޝަސް ބޮޑުވަޒީރަށް ފޮނުއްވި ސިޓީގެ ވާހަކަ މޮރިޝަންއިން ދެއްކެވި ކަމަށާ، އެ ސިޓީގެ ވާހަކަ އިޓްލޮސްގެ ހުކުމުގައިވެސް ބަޔާން ކޮށްފައިވާ ކަމަށާ، އެހެންނަމަވެސް، އެ ސިޓީ އާއި އެ ހުކުމާއި އެއްވެސް ގުޅުމެއް ނެތް ކަމަށް ސަރުކާރުން ބުނެފިއެވެ. 

އިޓްލޮސް މައްސަލާގައި ސަރުކާރުން އަމަލުކޮށްފައިވަނީ ޤާނޫނު އަސާސިއާއި ޚިލާފަށްކަމަށް ޤަބޫލުކުރާ ސިޔާސީ ޕާޓީތަކުގެ މަޖިލިސް މެންބަރުން ވަނީ މިއަދު ނޫސްވެރިންގެ ބައްދަލުވުމެއް ބާއްވާފައެވެ. މި ބައްދަލުވުމުގައި ޕީޕީއެމް-ޕީއެންސީ ކޯލިޝަނާއި، އެމްޑީޕީގެ ރައީސް މުޙައްމަދު ނަޝީދު ފިކުރެއްގެ ދިރުމާއި، ޖުމްހޫރީ ޕާޓީ އާއި އަދި އެމްއެންޕީން ވެސް ބައިވެރިވެފައިވާއިރު، އެ ފަރާތްތަކުން ވަނީ ރައީސް ޞާލިހު މޮރިޝަސްގެ ބޮޑުވަޒީރަށް ފޮނުއްވި ސިޓީ އާއި، ރާއްޖޭގެ ކަނޑުގެ ސަރަހައްދުން ބައެއް ގެއްލުމާއި ގުޅުމެއް ވާކަން ވިދާޅުވާ ވިދާޅުވުން ތަކުރާރު ކުރައްވާފައެވެ. 

އެކަމާއި ގުޅިގެން، ރައީސް އޮފީހުން މިއަދު ބޭއްވި ނޫސްވެރިންގެ ބައްދަލުވުމުގައި އެ އޮފީހުގެ ތަރުޖަމާނު މިއުވާން މުހައްމަދު ވިދާޅުވީ، އިދިކޮޅު ފަރާތްތަކުން ތަކުރާރުކޮށް ރައީސް ޞާލިހުގެ ސިޓީފުޅުގެ ވާހަކަ ދައްކަވާއިރުވެސް އެ ސިޓީފުޅާއި އިޓްލޮސްގެ ހުކުމާއި ދެމެދު ހުރި ގުޅުން ކިޔައިދެވިފައި ނުވާ ކަމަށެވެ. އަދި އެފައިން ވިދާޅުނުވެވެނީ ގުޅުމެއް ނެތުމުން ކަމަށްވެސް އޭނާ ވިދާޅުވި އެވެ. 

Advertisement

މިއުވާން ވިދާޅުވީ ރައީސުލްޖުމްހޫރިއްޔާ ގެ ސިޓީފުޅެއް މޮރިޝަސްގެ ބޮޑުވަޒީރަށް ފޮނުއްވުނީ އދ.ގެ އާއްމު މަޖިލީހުގައި އައިސީޖޭގެ ނިންމުމަކާއި ގުޅިގެން ނަގާ ވޯޓަކާއި ގުޅިގެން ކަމަށެވެ. 

މިއުވާން ވިދާޅުވީ، ޗާގޯސްގެ މައްސަލައިގެ ވާހަކަ ދައްކަވާ ގާނޫނީ ބޭފުޅުން އެ ވާހަކަ ދައްކަވަނީ ލިޔެކިޔުންތައްވެސް ރަނގަޅަށް ނުބައްލަވާ ކަމަށެވެ. އެހެނީ 22 އޮގަސްޓްގައި ރައީސުލްޖުމްހޫރިއްޔާ ސިޓީފުޅު ފޮނުއްވިއިރު އިޓްލޮސް ގައި އޭރު ދެކެވެމުންދިޔައީ އިކުއި ޑިސްޓަންސް ބަހާނީ ކިހިނެއް ކޮން ހިސާބަކުން ކަމަށާ، އެ ސިޓީ ފުޅާއި ގުޅިގެން ބަދަލެއް އަންނަ ނަމަ އަންނަންވާނީ މޮރިޝަސް އާއި އެއްކޮޅަށް ކަމަށްވެސް އޭނާ ވިދާޅުވި އެވެ. 

މިއާއެކު މިއުވާން ވަނީ އަދި އަދާއި ޖެހެންދެން ވެސް، ރައީސުލްޖުމްހޫރިއްޔާގެ ސިޓީފުޅުގެ ސަބަބުން އިޓްލޮސްގެ ނިންމުމަށް އައީ ކޮން ބަދަލެއް ކަން އިދިކޮޅު ފަރާތްތަކަށް ބަޔާން ކޮށްދެވިފައި ނުވާކަން ތަކުރާރުކޮށް ވިދާޅުވެފަ އެވެ.