ރާއްޖޭގެ އެކިކަންކޮޅުތަކުގައި ސިއްޙީ ޚިދްމަތްތައް
ތަރައްޤީކުރުމަށް ކުރާ މަސައްކަތުގެ ދަށުން ބައެއް ސަރަހައްދީ ހޮސްޕިޓަލްތަކުގައި އާ ޚިދުމަތްތައް ތަރައްޤީކުރަމުން އަންނަކަމުގައި ރައީސް އޮފީހުގެ ތަރުޖަމާނު މުޙައްމަދު މިއުވާން ވިދާޅުވެއްޖެއެވެ.   

 މިއުވާން މިހެން ވިދާޅުވީ ބުރާސްފަތި ދުވަހު، ރައީސް އޮފީހުން ސަރުކާރުގެ ކަންކަން ޚިއްސާ ކުރުމަށް ބާއްވާ ނޫސްވެރިންގެ ބައްދަލުވުމުގެ ސިލްސިލާގެ ދަށުން އިއްޔެ ބޭއްވި ނޫސްވެރިންގެ ބައްދަލުވުމުގެ ތެރޭގައެވެ.މިއަދުގެ ނޫސްވެރިންގެ ބައްދަލުވުމުގައި ވާހަކަ ދައްކަވަމުން  ސަރަޙައްދީ ހޮސްޕިޓަލްތަކުގައި ތަޢާރަފް ކުރައްވާފައިވާ ބައެއް އާ ޚިދުމަތްތަކަށް އަލިއަޅުވާލައި ވާހަކަ ދައްކާފައިވެއެވެ.

މިއުވާން ވިދާޅުވީ ޑރ. ޢަބްދުއް ޞަމަދު މެމޯރިއަލް ހޮސްޕިޓަލުގައި މިހާރު ލެޕްރޮސްކޯޕިކް ސާރޖަރީ ގެ ޚިދުމަތާއި، އެޑްވާންސް ވޫންޑް ކެއަރ ގެ ޚިދުމަތާއި ކީމޯ ތެރަޕީ ގެ ޚިދުމަތް ފަށާފައިވާކަމުގައި ވިދާޅުވިއެވެ. 

Advertisement

އަދި ކީމޯގެ ޚިދުމަތް މިހާރު ތިނަދޫގައި ފަށާފައިވާކަމަށާ ލެޕްރޮސްކޯޕިކް ސާރޖަރީ ޚިދުމަތް ފެށުމަށް ބޭނުންވާ މެޝިނަރީޒް ވެސް މިހާރު ތިނަދޫގައި ޤާއިމުކޮށްފައިވާކަމަށް މިއުވާން ވިދާޅުވިއެވެ.

މީގެ އިތުރުން ލެބޯޓްރީ ޤާއިމުކޮށްފައިވާ 112 ޞިއްޙީ މަރުކަޒުތަކުން ދޭ ޚިދުމަތުގެ ފެންވަރު އިތުރަށް ރަނގަޅުކުރުމަށް ލޭއެޅުމަށް ބޭނުންވާ ތަކެތި ރަށްތަކާއި ހަވާލުކުރުމުގެ މަސައްކަތް ފެށިގެން ކުރިޔަށްދާކަމަށްވެސް މިއުވާން ވިދާޅުވިއެެވެ.

ސިއްޙީ ޚިދްމަތްތައް އަތޮޅުތަކުގައި ތަރައްޤީ ވެގެން ދިއުމަކީ ޑޮކްޓަރަށް ދެެއްކުމަށާއި އެހެނިހެން ސިއްޚީ ޚިދްމަތް ތައް ހޯދުމަށް އަންނަ ފަރާތްތަކަށް ވަރަށް ބޮޑު ލުޔަކަށް ވެގެންދާނެއެވެ.