ރަާއްޖެއިން ކޮސޯވޯގެ ދައުލަތް ޤަބޫލު ނުކުރާ ކަމަށް، ވިދާޅުވެ ސާބިއާގެ ރައީސް އެލެކްސެންޑާ ވުޖިކް ދެއްކެވި ވާހަކަފުޅު ދިވެހި ސަރުކާރުން ދޮގުކޮށްފިއެވެ. 

ރައީސް އޮފީހުން މިއަދު ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާނު މިއުވާން މުހައްމަދު ވަނީ އެއްވެސް ޤަައުމަކާ ގުޅުން ކަނޑާލުމަކީ މި ސަރުކާރުން ކުރާނެ ކަމެއް ނޫން ކަމަށް ވިދާޅުވެފައެވެ.

އަދި ކޮސޯވޯއަކީ ވަކި ދައުލަތެއް ކަމަށް ރާއްޖެއިން ބަލައިގަންނަ ކަމަށް އޭނާ ވިދާޅުވި އެވެ.

Advertisement

"ކޮސޯވޯގެ މިނިވަންކަން ގަބޫލު ނުކުރަން ރާއްޖެއިން ނިންމާފައެއް ނުވޭ. ހަމަ ކަނޑައެޅިގެން ދޮގު ވާހަކައެއް އެއީ." މިއުވާން ވިދާޅުވި އެވެ.

ކުރިން ސާބިއާގެ ބައެއްގެ ގޮތުގައި އޮތް އަދި ގިނަ އަދަދެއްގެ މުސްލިމުން ދިރިއުޅޭ ކޮސޯވޯއަކީ މިނިވަން ދައުލަތެއްގެ ގޮތުގައި ރާއްޖެއިން ބަލައިގަތީ ރައީސް މުހައްމަދު ނަޝީދުގެ ވެރިކަމުގައި 2009 ވަނަ އަހަރު އެވެ.

ކޮސޯވޯ އިން އެ ޤައުމަކީ ވަކި ދައުލަތެއްގެ ގޮތުގައި އިއްލާނު ކޮށްފައި އޮތް ނަމަވެސް ސާބިއާއިން އަދިވެސް ގަބޫލުކުރަނީ އެއީ އެ ގައުމުގެ ބައެއްގެ ގޮތުގަ އެވެ.

ކޮސޯވޯ މިނިވަން ދައުލަތެއްގެ ގޮތުގައި ބަލައިގަތް ގަތުން އަނބުރާ ގެންދަން ރާއްޖެ ހިމެނޭ ގޮތަށް ނުވަ ޤައުމަކުން އެއްބަސްވެފައިވާ ކަމަށް ސާބިއާގެ ރައީސް އެލެކްސެންޑާ ވުޖިކް ދާދިފަހުން ވަނީ ވިދާޅުވެފަ އެވެ. 

ކޮސޯވޯގެ މިނިވަންކަން ރާއްޖެއިން ބަލައިގަތުމުން ރައީސް ނަޝީދުގެ ވެރިކަމުގައި އޭރުގެ ޚާރިޖީ ވަޒީރު ޑރ. އަހުމަދު ޝަހީދުގެ އިތުބާރު ނެތްކަމުގެ މައްސަލައެއް ވެސް އޭރުގެ އިދިކޮޅު ފަރާތްތަކުން ރައްޔިތުންގެ މަޖިލީހަށް ހުށަހެޅި އެވެ. އެކަމަކު އޭނާގެ އިތުބާރު ނެތްކަމަށް އޭރު ފާހެއް ނުވި އެވެ.