ރާއްޖޭގެ 7 ރަށެއްގައި އަޅާ ހޮސްޕިޓަލްގެ މަސައްކަތް އަންނަ ހަފްތާގައި ބަޔަކާ ހަވާލު ކުރެވޭނެ ކަމަށް ރައީސް އިބްރާހީމް މުހައްމަދު ސޯލިހު ވިދާޅުވެއްޖެ އެވެ.

ދުނިޔޭގެ ސިއްހަތު ދުވަސް ފާހަގަ ކުރުމަށް ރޭ ބޭއްވި ހާއްސަ ހަފްލާގައި ވާހަކަފުޅު ދައްކަވަމުން ރައީސް ޞާލިހް ވިދާޅުވީ ރައްޔިތުންނަށް ސިއްހީ ހިދުމަތް ފަސޭހައިން ލިބޭނީ ރާއްޖޭގެ ހުރިހާ ސަރަހައްދެއްގައި ސިއްހީ ހިދުމަތްތައް ފުޅާކޮށްގެން ކަމަށެވެ. އެގޮތުން 7 ރަށެއްގައި އެޅުމަށް ހަމަޖެހިފައިވާ ހޮސްޕިޓަލުގެ މަސައްކަތުގެ ތެރެއިން ބިޑިން މަރުހަލާ ނިމި ކޮންޓްރެކްޓަރުންނާ އެ މަސައްކަތް އަންނަ ހަފްތާގައި ހަވާލު ކުރެވޭނެ ކަމަށް ވިދާޅުވިއެވެ. 

"އެކި އަތޮޅުތަކުގައި އެކި ރަށްރަށުގައި އަޅުގަނޑުމެން އެޅުމަށް ހަމަޖެހިފައިވާ ހޮސްޕިޓަލުތަކުގެ މަސައްކަތް ވެސް ކުރިއަށް އެބަދޭ. އެގޮތުން ހަތް އަތޮޅެއްގެ ހަތް ރަށެއްގައި ކުވައިތު ފަންޑުގެ އެހީގައި އެޅުމަށް އަޅުގަނޑުމެން ނިންމާފައި އޮތް ހަތް ހޮސްޕިޓަލުގެ ބިޑިން މަރުހަލާ ނިމި މަސައްކަތް ކުރާނެ ބަޔަކު ހޮވި އިރާދަ ކުރެއްވިއްޔާ ކުރިއަށް އޮތް ހަފްތާގެ ތެރޭގައި އެ މަސައްކަތް ކުންފުނިތަކާ ހަވާލު ކުރާނަން" ރައީސް ވިދާޅުވިއެވެ.

މި ހޮސްޕިޓަލްތައް ތަރައްގީކުރުމަށް ހަމަޖެހިފައިވަނީ ހދ. ހަނިމާދޫ، ށ. މިލަންދޫ، ނ. ވެލިދޫ، ކ. ތުލުސްދޫ، އދ. މާމިގިލި، ވ. ފެލިދޫ އަދި ތ.ވިލުފުށީގަ އެވެ.

ކުވެއިތް ފަންޑް ފޯރ އަރަބް އިކޮނޮމިކް ޑިވެލޮޕްމަންޓް (ކޭ.އެފް.އޭ.އީ.ޑީ)ގެ އެހީގެ ދަށުން އިމާރާތްކުރާ އެ ހޮސްޕިޓަލްތަކަކީ 39 އެނދުގެ ހޮސްޕިޓަލެވެ.

އެ ހޮސްޕިޓަލުތައް އަޅައިދޭނެ ބަޔަކު ހޯދަން ފިނޭންސް މިނިސްޓްރީން އިއުލާންކުރީ މިދިޔަ އަހަރުގެ އޭޕްރީލް މަހުގެ ތެރޭގަ އެވެ.