ފޯޅަވަހީގެ ކަނޑުގެ ސަރަހައްދުގެ ފުށުއަރާބައި ބެހުމުގައި ރާއްޖޭގެ ކަނޑުން ބައެއް ގެލިފައިވާ ކަމަށާ، އެކަމުގައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ އިހުމާލު އޮތް ކަމަށް އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިއަދު ކުރެއްވި ޓްވީޓެއްގައި ވިދާޅުވީ، މޮރިޝަސް އާއި ދިވެހިރާއްޖެއާ ދެމެދު އޮތް ކަނޑުގެ ފުށުއަރާ ސަރަހައްދުގެ މައްސަލަ ހައްލު ކުރުމަށް އެޑްހޮކް އާބިޓްރޭޝަން އުސޫލުން ކުރިއަށް ގެންދިޔުމަށް މޮރިޝަސް އިން 18 ޖޫން 2019 ގަައި ހުށަހަޅާފައިވާ ކަމަށެވެ.
"އެހެން ނަމަވެސް ރައީސުލްޖުމްހޫރިއްޔާގެ ނިންމެވުމުގެ މަތިން އެ މައްސަލަ އިޓްލޮސްއަށް ހުށަހެޅުމުން ރާއްޖޭގަ ބައެއް މިވަނީ ގެއްލިފައެވެ. މިކަމުގައި މަޖިލިސް ގެ ނިންމުމެއް ހޯދާފައެއް ނުވެއެވެ. ރައީސުލްޖުމްހޫރިއްޔާ ގެ އިހުމާލު އެބަ އޮތެވެ." ރައީސް ނަޝީދު ވިދާޅުވި އެވެ.
އެހެންކަމުން، ފޯޅަވަހީގެ މައްސަލާގައި ސަރުކާރުގެ ނިންމުމާއި ދެކޮޅަށް ވާހަކަ ދެއްކުމުން މެދު ހެންވޭރު ދާއިރާގެ މެންބަރު އަލީ އާޒިމް އެމްޑީޕީން ވަކިކުރުމަށް ނިންމި ނިންމުން ރަނގަޅު ނޫން ކަމަށް ރައީސް ނަޝީދު ވަނީ ސިފަ ކުރައްވައިފަ އެވެ. އެގޮތުން ވިދާޅުވީ، އެ މައްސަލާގައި ވަކި ކުރަންވީ މެންބަރު ޢާޒިމް ނޫން ކަމަށެވެ.
ޗާގޯސް މައްސަލައިގައި އުފައްދަފައިވާ ކޯލިޝަންއިން ބޭއްވި ނޫސް ވެރިންގެ ބައްދަލުވުމުގައި ބައިވެރިވެ، ބަންޑާރަ ނައިބް އިބްރާހިމް ރިއްފަތް ގެ އިތުބާރުނެތް ކަމުގެ މައްސަލަ މަޖިލީހަށް ހުށައެޅުމަށް ސޮއި ކުރެވުނު ޕެޓިޝަންގައި ސޮއި ކޮށްފައި ވާތީ އެމްޑީޕީގެ ފިޔަވަޅު އަޅާ ކޮމިޓީން އާޒިމް ވަނީ އެ ޕާޓީން ވަކިކޮށްފައެވެ.
Advertisement
This content is created and paid for by advertisers and does not involve Voice Journalists
