ރައީސުލް ޖުމްހޫރިއްޔާ އިބްރާހިމް މުހައްމަދު ޞާލިހަށް ވަގަށް ގޮވި އެންވަރަންމެންޓް މިނިސްޓްރީގެ ސްޓޭޓް މިނިސްޓަރު ހަސަން މުޣުނީ މަގާމުން ވަކިކޮށްފިއެވެ.
މުޣުނީ ވަކިކޮށްފައިވާކަން ރައީސް އޮފީހުގެ ތަރުޖަމާނު މިއުވާން މުހައްމަދު ވަނީ "ވޮއިސް" އަށް ކަށަވަރު ކޮށްދީފައެވެ. މިއުވާން ވިދާޅުވީ، މުޣުނީ މަގާމުން ވަކިކޮށްފައި ވަނީ ޤާނޫނުގެ ދަށުން ރައީސުލް ޖުމްހޫރިއްޔާއަށް ލިބިވައިގަންނަވާ ބާރުގެ ދަށުން ކަމަށެވެ.
ސަރުކާރުގެ ކުންފުނިތަށް ހިންގަވަން ތިބި ފަރާތްތަކުގެ ނަޒާހާތްތެރި ކަމެއް ނެތް ކަމަށާ، އެ ފަރާތްތަކުން ހިންގާފައިވާ ކޮރަޕްޝަންގެ އަމަލުތައް ހާމަކުރުމަށް ގޮވާލައި މީހަކު ކޮށްފައިވާ ޓުވީޓެއް ރިޓުވީޓް ކުރައްވަމުން މުޣުނީ ކުރައްވާފައިވާ ޓުވީޓްގައި އޭނާ ވަނީ ރައީސް ޞާލިހު އަކީ ހިންނަވަރު ވަގު ކަމަށް ވިދާޅުވެފައެވެ.
އަދި ސަރުކާރުގެ ކުންފުނިތައް ހިންގެވުމަށް އެމަނިކުފާނު އިސްކުރައްވާފައިވަނީ ހައްތާވެސް ގާބިލިއްޔަތު ކަމެއް އަދި ނަޒާހާތްތެރި ކަމެއް ނެތް ވެރިން ކަމަށްވެސް މުޣުނީ ވިދާޅުވިއެވެ.
އަދި މި ކޮރަޕްޓް ސަރުކާރު ނިމެން ދެން އިނީ އެންމެ 4 މަސް ކަމަށްވެސް އޭނާ ވިދާޅުވި އެވެ.
ރައީސް ޞާލިހަށް ވަގަށް ގޮވައި މުޣުނީ ކުރެއްވި މި ޓުވީޓް މިހާރު އޭނާ ވަނީ ޑިލީޓް ކޮށްލާފައެވެ.
އޭނާ ހުންނެވި މަގާމަކީވެސް، ރައީސުލްޖުމްހޫރިއްޔާ އަށް ލިބިދޭ ބާރުގެ މަތިން އުފައްދަވާފައިވާ ސިޔާސީ މަގާމެކެވެ. އަދި އެމަގާމަށް އޭނާ އައްޔަނު ކުރައްވާފައިވަނީވެސް ރައީސުލްޖުމްހޫރިއްޔާ އެވެ.
މުޣުނީއަކީ ރައީސް ޞާލިހް ސަރުކާރުގެ ޖުމްހޫރީ ޕާޓީގެ ސްލޮޓްގައި ސްޓެލްކޯގެ މެނޭޖިންގ ޑިރެކްޓަރުގެ މަޤާމުގައި ހުންނެވި ބޭފުޅެކެވެ. ފަހުން އެ މަޤާމުން ވަކި ކުރައްވައި ސްޓޭޓް މިނިސްޓަރ ކަން އޭނާއަށް ވަނީ ދެއްވާފައެވެ.
Advertisement
This content is created and paid for by advertisers and does not involve Voice Journalists
