ޗާގޯސްއާއި ދިވެހިރާއްޖެއާއި ދެމެދު ފުށުއަރާ ސަރަހައްދެއް އޮތްކަމަށް ބުނެ މޮރިޝަސްއިން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އަށް ހުށައެޅި މައްސަލައާއި ގުޅިގެން އިޓްލޮސްއިން އޭޕްރިލް 28 ވަނަ ދުވަހު ނިންމި ނިންމުން އަލުން އިސްތިއުނާފް ކުރަން ދާނެ ތަނެއް ނެތް ކަމަށާ، އެ މައްސަލަ އިސްތިއުނާފް ކުރުމުގެ މަރުހަލާ އެއްވެސް ނޯންނާނެ ކަމަށް ސަރުކާރުން ބުނެފިއެވެ. 

ދިވެހިރާއްޖެއާއި ޗާގޯސް އާއި ދެމެދު ފުށުއަރާ ސަރަހައްދެއް އޮތްކަމަށް ބުނެ މޮރިޝަސްއިން އިޓްލޮސްއަށް ހުށައެޅި މައްސަލައިގައި އެޓާނީ ޖެނެރަލް ރިއްފަތާއި އޭނާގެ ޤާނޫނީ ޓީމުން، ދިވެހިރާއްޖޭގެ ޤާނޫނު އަސާސީއާއި ޚިލާފު ޕޮސިޝަނެއް ނަންގަވައި ކޯޓުގައި ވަކާލާތު ކުރައްވާފައިވާ ކަމަށާ، ދެން އޮތް ވެރިކަމެއްގައި މައްސަލަ އިސްތިއުނާފް ކޮށް، ރާއްޖޭގެ ކަނޑުން ގެއްލުނު ބައި ހޯދާނެ ކަމަށް ފޯޅަވަހީގެ މައްސަލާގައި އިދިކޮޅު ފަރާތްތަކުން އުފައްދާފައިވާ އިއްތިހާދުން ވަނީ ބުނެފައެވެ. 

އެފަރާތްތަކުން އެފަދައިން ވިދާޅުވަނީ، އިޓްލޮސްގެ އިޖުރާއީ އުސޫލުތަކުގެ 126 ވަނަ މާއްދާ އާއި 127 ވަނަ މާއްދާއާއި ހަވާލާދެއްވާފައެވެ. 

Advertisement

އެ އުސޫލުތަކުގެ 126 ވަނަ މާއްދާގައި ބުނެފައިވަނީ، އިޓްލޮސްގެ ނިންމުމެއްގެ ދާއިރާ (ސްކޯޕް) ނުވަތަ މާނައާމެދު ޚުޞޫމަތެއް އުފެދޭ ހާލަތުގައި އެ މައްސަލައިގެ ނިންމުން ތަފުސީރުކުރަން ހުށަހެޅޭނެ ކަމަށެވެ.

އަދި 127 ވަނަ މާއްދާގައި ބުނެފައިވަނީ ހުކުމްކުރި މަރުހަލާގައި އިޓްލޮސްއަށް އަދި މައްސަލައިގެ ޚަޞްމުންނަށް އޭގެ ތަބީއަތުގައި އެނގިފައި ނެތް ވާޤިއާއެއް އެނގިއްޖެ ހާލަތުގައި އިޓްލޮސްގެ ނިންމުމެއް މުރާޖައާކުރަން އެ ޓްރައިބިއުނަލަށް ހުށަހެޅިދާނެ ކަމަށެވެ.

އެކަމާއި ގުޅިގެން "ވޮއިސް" އިން ކުރި ސުވާލަށް ޖަވާބުދެއްވަމުން ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ، އިޓްލޮސްގެ ގާނޫނާއި އަދި އަންކްލޮސް ގައިވެސް، ޓްރައިބިއުނަލް އިން ނިންމާ ނިންމުމަކީ އެންމެ ފަހުގެ ނިންމުން ކަމަށާ، އެ ނިންމުމަށް ދެ ފަރާތުންވެސް ބޯ ލަނބައި ކިޔަމަންވާންޖެހޭނެ ކަމަށް އޮންނަ ކަމަށެވެ. 

މިއާއެކު މިއުވާން ވިދާޅުވީ، 126 އަދި 127 މާއްދާގައި ވަނީ ޓްރައިބިއުނަލްގެ ނިންމުން ރިވިއު ނުވަތަ މުރާޖަޢާ ކުރެވޭނެ ހާލަތްތަކުގެ ވާހަކަ ކަމަށާ، އެ މާއްދާގައި އެ ހާލަތްތައް ބަޔާން ކޮށްފައިވާ ކަމަށެވެ. އަދި އެއީ ހުކުމްކުރި މަރުހަލާގައި އިޓްލޮސްއަށް އަދި މައްސަލައިގެ ޚަޞްމުންނަށް އޭގެ ތަބީއަތުގައި އެނގިފައި ނެތް ވާޤިއާއެއް އެނގިއްޖެ ހާލަތުގައި އިޓްލޮސްގެ ނިންމުމެއް މުރާޖައާކުރަން ހުށަހެޅޭނެ ވާހަކަ ކަމަށްވެސް އޭނާ ވިދާޅުވި އެވެ. 

މިއާއެކު މިއުވާން ވިދާޅުވީ، އެފަދައިން މުރާޖަޢާ ކުރަން ހުށަހެޅޭނެ ހާލަތެއް މިހާތަނަށްވެސް އެނގިފައި ނުވާ ކަމަށެވެ. 

މިއާއެކު މިއުވާން ވިދާޅުވީ މުރާޖަޢާ ކުރުމަށް ހުށަހެޅުމަށް ބަލާއިރު، އިޓްލޮސްގެ ނިންމުން ނިންމި އިރު އެނގިފައި ނުވާ އިތުރު ކަމެއް އޭގެ ފަހުން އެނގިފައި ނުވާ ކަމަށެވެ. އަދި އެމައްސަލަ އިޓްލޮސްގައި ކުރިއަށް ގެންދެވުނީ، ބައިނަލްއަގުވާމީ ތަޖުރިބާކާރުންގެ ޓީމެއްގެ ލަފާގެ މަތިން، ހޯދަންޖެހޭ ހުރިހާ އެއްޗެއް ހޯދުމަށްފަހުގައި ކަމަށާ، އެ ޓީމުގައި ލޯޔަރުންގެ އިތުރުން ހައިޑްރޯގްރަފަރުންވެސް ހިމެނޭ ކަން މިއުވާން ފާހަގަކުރެއްވި އެވެ. އެހެންކަމުން އެ ނިންމުން މުރާޖަޢާ ކުރަންވެސް ހުށަހެޅޭނެ ހާލަތެއް ނެތް ކަަމަށް އޭނާ ވިދާޅުވި އެވެ.