ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު އައު ޕާޓީއެއް އުފައްދަވާ ނަމަ، އެޕާޓީގެ ރިޔާސީ ކެންޑިޑޭޓް ގެ ގޮތުގައި ކުރިއަށް އޮތް ރިޔާސީ އިންތިހާބުގައި އެމަނިކުފާނު ވާދަކުރެއްވުމަކީ ވަރަށް ބޮޑަށް އެދިލައްވާ ކަމެއް ކަމުގައި އެމްޑީޕީގެ ޗެއާޕާސަން އަދި އިކޮނަމިކް މިނިސްޓަރު ފައްޔާޟް އިސްމާއިލް ވިދާޅުވެއްޖެއެވެ.
ރައީސް ނަޝީދު އިސްވެ ހުންނަވައި އުފެއްދެވި ފިކުރެއްގެ ދިރުން ގޮފިން އައު ޕާޓީއެއް އުފައްދަން ނިންމިކަން އިޢުލާން ކުރުމާއިއެކު ގިނަ ބަޔަކު އަންނަނީ އެ ޕާޓީގެ ރިޔާސީ ކެންޑިޑޭޓަކީ ނަޝީދު ކަމަށް ބުނަމުންނެވެ. އެކަމާއި ގުޅިގެން އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއެއް ވަނީ އަންނަ ރިޔާސީ އިންތިހާބުގައި ރައީސް ނަޝީދު ވާދަކުރައްވާ ނަމަ އެމްޑީޕީގެ ރިޔާސީ ކެންޑިޑޭޓް ރައީސުލްޖުމްހޫރިއްޔާގެ އިބްރާޙީމް މުހައްމަދު ޞާލިހަށް އެއީ ގޮންޖެހުމަކަށް ވެދާނެތޯ ސުވާލު ކޮށްފައެވެ.
އެ ސުވާލަށް ޖަވާބު ދެއްވަމުން ފައްޔާޟް ވަނީ އެމްޑީޕީން ކެނޑި، ފިކުރެއްގެ ދިރުން ޕާޓީއާއި ރައީސް ނަޝީދު ގުޅިވަޑައިގަންނަވާ ނަމަ، އެމަނިކުފާނު ރިޔާސީ އިންތިހާބުގައި ވާދަކުރެއްވުމަކީ އޭނާ ވަރަށް ބޮޑަށް އެދިލައްވާ ކަމެއް ކަމަށެވެ. އެހެނީ ޕާޓީތައް ހަދަނީ ބާރާއި ވެރިކަން ހޯދުމުގެ ބޭނުމުގައި ކަމަށާ، އެއީ އެބަޔަކު ބޭނުންވާ މެނިފެސްޓޯ އެއް ތަންފީޒު ކުރުމަށް ކުރާ ކަމެއް ކަމަށެވެ. އެހެންކަމުން، ޕާޓީއެއް ހަދައިފި ނަމަ، އެ ޕާޓީގެ ކެންޑިޑޭޓްގެ ގޮތުގައި ރައީސް ނަޝީދު ނުކުންނެވުމަކީ ވަރަށް ބޮޑަށް އެދިލައްވާ ކަމެއް ކަމުގައި ފައްޔާޟް ވަނީ ތަކުރާރުކޮށް ވިދާޅުވެފަ އެވެ.
އަޅުގަނޑަށް ފެނޭ ރައީސް ނަޝީދު (ރިޔާސީ އިންތިހާބުގައި) ވާދަކުރައްވަން. އޭރުންތާ އެނގޭނީވެސް. ވަރަށް ސާފުކޮށް ކަންކަން އޮތް ގޮތް ވެސް. އަޅުގަނޑު ވަރަށް ބޮޑަށް އެދެން ރައީސް ނަޝީދު ވަކި ޕާޓީއެއް ހައްދަވައިފި ކަމުގައި ވަންޏާމުން ނުކުންނަވަން.
ވަކިޕާޓީއެއް އުފައްދަވައިގެން ރައީސް ނަޝީދު އިންތިޚާބުގައި ވާދަކުރައްވަން އެދެވުނަސް، އެމްޑީޕީގެ ރައީސް ގެ މަގާމުގައި އެމްޑީޕީގައި ހުންނަވާ ނަމަ، އެ ޕާޓީގެ ރިޔާސީ ކެންޑިޑޭޓް ރައީސް ޞާލިހުގެ ފަހަތަށް އަރާވަޑައިގަންނަވަން ފައްޔާޟް ވަނީ އެދިލައްވާފައެވެ.
އިއްޔެ ފިކުރެއްގެ ދިރުމުން ބޭއްވި ބައްދަލުމުގައި ވާހަކަ ދައްކަވަމުން މަޖިލީހުގެ ނާއިބު ރައީސް އީވާ ވަނީ ފިކުރެއްގެ ދިރުމުން އުފައްދާ ޕާޓީން ކުރިއަށް އޮތް ރިޔާސީ އިންތިހާބުގައި ކެންޑިޑޭޓަކު ވާދަކުރައްވާނެ ކަންވެސް އިއުލާން ކުރައްވާފައެވެ. އަދި “ފިކުރެއްގެ ދިރުން” ގެ ކެނޑިޑޭޓު ކަނޑައަޅާނީ އެތެރޭގެ ފުރިހަމަ ޑިމޮކްރެޓިކް ނިޒާމެއްގެ ތެރެއިންކަމަށްވެސް އީވާ ވިދާޅުވި އެވެ.
އެމްޑީޕީގެ ފިކުރެއްގެ ދިރުމަށް ތާއީދުކުރައްވާ މެމްބަރުން ޕާޓީން ވަކިވެ އާ ސިޔާސީ ޕާޓީއެއް އުފައްދާނެކަން އިއުލާނުކުރައްވާފައިވާއިރު، އެމްޑީޕީގެ ރައީސް މުޙައްމަދު ނަޝީދު އަދި ޕާޓީން އިސްތިއުފާއެއް ނުދެއްވަ އެވެ.
Advertisement
This content is created and paid for by advertisers and does not involve Voice Journalists
