މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ރިޔާސީ އިންތިހާބަށް ނުކުންނާނީ ގަދަކޮށް ކަމަށާ, އަދި އެ އިންތިހާބު ޕާޓީގެ ރިޔާސީ ކެންޑިޑޭޓ ރައީސް އިބްރާހިމް މުހައްމަދު ޞާލިހް ކާމިޔާބުކުރައްވާނެ ކަމަށް އެ ޕާޓީގެ ތަރުޖަމާނު އަނަސް އަބްދުއްސައްތާރު ވިދާޅުވެއްޖެއެވެ. 

އެމްޑީޕީން 2023 ވަނަ އަހަރުގެ ރިޔާސީ އިންތިޚާބަށް ނެރޭ މެނިފެސްޓޯ ތައްޔާރުކުރުމަށް ބޭނުންވާ މައުލޫމާތު އެއްކުރުމާއި، ޕާޓީއަށް މެމްބަރުން އިތުރުކޮށް ރިޔާސީ ކެންޕޭނު ދަތުރުތައް އިއްޔެ ވަނީ ފަށާފައެވެ. 

އެ ދަތުރު ތަކާއި ގުޅޭ އިތުރު ތަފްސީލް ހާމަކުރައްވައި އަނަސް މިއަދު ކުރެއްވި ޓުވީޓެއްގައި ވިދާޅުވީ، މާލެއިން ދިޔަ ޓީމުތަކާއި ރަށްރަށުގައި ތިބި މެމްބަރުންނާއެކު ބައްދަލުވުންތައް ބާއްވާ އެމްޑީޕީގެ 2 ވަނަ ދައުރެއްގެ މެނިފެސްޓޯއަށް މައުލޫމާތު އެއްކުރަމުންދާ ކަމަށެވެ. އެގޮތުން ޕާޓީގެ އާއްމު މެމްބަރުންގެ ހިޔާލު ހޯދުމަށް ދޮރުން ދޮރަށް ހިނގަމުންދާ ކަމަށްވެސް އޭނާ ވިދާޅުވި އެވެ. 

އަދި މީގެ އިތުރުން، ރައީސް ސޯލިހްގެ ކެމްޕޭން ޕޯސްޓަރު ހުރިހާ ރަށްތަކެއްގައި ހަރުކުރުން ކުރިއަށްދާއިރު، އެމްޑީޕީގެ ރިޔާސީ ކެމްޕޭން ފަށަން ތައްޔާރުވުމުގެ ގޮތުން ހުރިހާ ރަށްތަކެއްގައި ޕާޓީގެ ދިދަ ނެގުން މިއަދު ހަވީރު 4:30 ގައި އޮންނާނެ ކަން ވަނީ ފާހަގަކުރައްވާފައެވެ. 

"މި ސަރުކާރުން ފެށި ބަނދަރު ހެދުމާއި ފެނާއި ނަރުދަމާ އާއި މަގުހެދުމާއި ތަރައްގީގެ އެހެން ޕްރޮޖެކްޓްތައް ނިމި ރަށްރަށުން ފެންނަނީ އުޖާލާ ކުރިމަގެއް. އެއްވެސް ރަށެއް ތަފާތެއް ނުކޮށް ފަސް އަހަރުގެ ދައުރެއްގެ ތެރޭގައި ރަށްރަށުގެ ރައްޔިތުންނަށް ހިދުމަތްތައް ފަހިވެ ލިބުނު ލުއި ފަސޭހަކަމާއި ހަމަޖެހުމަކީ މި ސަރުކާރުގެ އެންމެ ބޮޑު ކާމިޔާބު." އަނަސް ވިދާޅުވި އެވެ. 

‏މިއާއެކު އަނަސް ވިދާޅުވީ، މި ދަތުރުން ހޯދާ މައުލޫމާތުން މެނިފެސްޓޯ އެކުލަވާލައި އެމްޑީޕީ ގަދަކޮށް އިންތިހާބަށް ނުކުމެ، ކުރިއަށް އޮތް ރިޔާސީ އިންތިހާބު އެ ޕާޓީގެ ކެންޑިޑޭޓް ރައީސް ސޯލިހް ކާމިޔާބުކުރައްވާނެކަމަށެވެ.