މިއިން ދުވަހަކުވެސް ނުޖެހޭ މިންވަރަށް މިއަދު ކުރީގެ ރައީސް އަބްދުالله ޔާމީން އަބްދުލްގައްޔޫމުގެ ޚިދުމަތަށް ޤައުމު ބޭނުން ޖެހިފައިވާކަމަށް ރައީސް ޔާމީންގެ ސަރުކާރުގެ އިކޮނޮމިކް މިނިސްޓަރު އަދި މިހާރު މަޖިލީހުގެ މާވަށު ދާއިރާގެ މެމްބަރު މުޙައްމަދު ސައީދު ވިދާޅުވެއްޖެ އެވެ. 

ސައީދު މިފަދައިން ވިދާޅުވެފައިވަނީ ރައީސް ޔާމީންގެ އުފަންދުވަހުގެ ތަހުނިޔާ އަރިސްކޮށް ފޭސްބުކުގައި ހިއްސާކުރެއްވި މެސެޖެއްގަ އެވެ. 

ސައީދު ވިދާޅުވީ ރައީސް ޔާމީން ގައުމީ ޚިދުމަތުގައި ނެތްކަމުގެ ފަޅުކަން މުޅި ގައުމު އިހުސާސް ކުރަމުންދާކަމަށް ސިފަކުރައްވާފަ އެވެ. އެއާއެކު ވިދާޅުވީ ރައީސް ޔާމީނުގެ ޚިދުމަތަށް މިއިން ދުވަހަކުވެސް ގައުމު ބޭނުން ނުވާ މިންވަރަށް މިއަދު ބޭނުންވެފައިވާ ކަމަށެވެ. 

އެމްއެމްޕީއާރުސީ މެދުވެރިކޮށް ވ އާރަށް ކުއްޔަށް ދޫކުރުމުގެ މުއާމަލާތާއި ގުޅުވާ ދައުލަތުން އުފުލާފައިވާ ދައުވާތައް ސާބިތުވާކަމަށް ކަނޑައަޅާ މިދިޔަ ޑިސެމްބަރުމަހުގެ 25 ވަނަ ދުވަހު ކްރިމިނަލް ކޯޓުން ރައީސް ޔާމިނުގެ މައްޗަށް 11 އަހަރުގެ ޖަލުހުކުމެއް ކޮށްފައިވާއިރު، އެމަނިކުފާނު މިހާރު ހުންނެވީ ހުކުން ތަންފީޒުކުރެއްވުމަށް މާފުށީ ޖަލުގަ އެވެ. 

މިއީ މިވެރިކަމުގައި ރައީސް ޔާމީން ޖަލުގައި ހުންނަވާ 3 ވަނަ އުފަންދުވަހެވެ. 

ރައީސް ޔާމިނުގެ މައްޗަށް ކޮށްފައިވާނީ ނުހައްގު ހުކުމެއްކަން ފާހަގަކުރައްވާ ސައީދު ވިދާޅުވީ އެމަނިކުފާނަށް ކެތްތެރިކަމާއި ސާބިތުކަން މިންވަރުކޮށްދެއްވުން އެދި ދުއާކުރާކަމަ ށެވެ. އަދި އެމަނިކުފާނަކީ މުޅި ގައުމު އެބޭފުޅަކަށްޓަކައި ފަޚުރުވެރިވާ ބޭފުޅެއްކަމަށް ސައީދު ވަނީ ވިދާޅުވެފަ އެވެ.