ދިވެހިރާއްޖޭގައި މިހާރު ވެރިކަން ކުރަމުން އަންނަ ރިޔާސީ ނިޒާމް ބަދަލު ކުރަން ގިނަ ދިވެހިން ބޭނުންވާ ކަމަށާ، ރާއްޖޭގައި އޮންނާން ފެންނަ ވެރިކަމުގެ ނިޒާމަކާ ގުޅޭގޮތުން، ރައްޔިތުންގެ ހިޔާލު ހޯދުމުގެ ވޯޓެއް ނެގުމަކީ، ވާޖިބެއް ކަމުގައި ދެކެވަޑައިގަންނަވާ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ހއ.ދިއްދޫގައި ރޭ ބޭއްވި ތިލައުތުރު އެވޯޑު ދިނުމުގެ ހަފްލާގައި ވާހަކަފުޅު ދައްކަވަމުން ނަޝީދު ވިދާޅުވީ ރާއްޖޭގެ އެންމެ ބޮޑަށް ރަށްތަކުން ގުޅިފައިވާ އަތޮޅަކީ ތިލަދުންމަތި ކަމަށެވެ. އަދި ތިލަދުންމަތީގެ ރަށްތަކުގެ މިލްކުވެރިކަން މީގެ ކުރިން މާލޭގެ އެކި ފަރާތްތަކަށް އޮތް ކަމަށާ އޭގެ ފަހުން މިނިސްޓްރީ ތަކުގެ ދަށުގައިވެސް އެ ރަށްތަކުގެ މިލްކުވެރިކަން އޮތް ކަން އެމަނިކުފާނު ފާހަގަކުރެއްވިއެވެ.
އެހެންނަމަވެސް ތިލަދުންމަތީގެ ރަށްތަކާއި އެ ރަށްތަކުގެ ގުދުރަތީ ވަސީލަތްތަކުގެ މިލްކުވެރިކަން ލިބެންޖެހޭނީ ތިލަދުންމަތީގެ ރަށްތަކަށް ކަމަށް އެމަނިކުފާނު ވިދާޅުވިއެވެ.
މިއާއެކު ރައީސް ނަޝީދު ވިދާޅުވީ ރާއްޖޭގެ ޑިމޮކްރެޓިކް ހަޔާތުގެ އެންމެ މުހިންމު އެއް ވާހަކައަކީ ލާމަރުކަޒީ ވާހަކަ ކަމަށެވެ. އަދި ފެޑަރަލް ދިވެހިރާއްޖެއަކަށް ދިވެހިރާއްޖެ އަލިވިލެން ވެއްޖެކަން އެމަނިކުފާނުގެ ހިތުގެ އަޑިން ގަބޫލު ކުރައްވާ ކަން ފާހަގަ ކުރައްވައި ނަޝީދު ވިދާޅުވީ އެމަނިކުފާނު ވެރިކަމުގައި ހުންނެވި އިރުވެސް މުޅި ރާއްޖެ ރައީސުލްޖުމްހޫރިއްޔާ އަތުގައި އޮތުމުން އެ ލިބޭ ބާރު ދޫކޮށްލަން އުނދަގޫވެވަޑައިގެންނެވިކަމަށެވެ.
މިފަދައެތައް ސަބަބުތަކަށްޓަކައި ދިވެހި ރައްޔިތުން މިއަދު ފެޑެރަލް ނިޒާމަކަށް ބަދަލުވާާންޖެހޭ ކަމަށާ އެގޮތަށް ނުވިސްނައިފިނަމަ، ވަރަށް ހިތާމަވެރި މަންޒަރެއް ފެނިގެން ހިނގައިދާނެ ކަމަށެވެ.
ގާނޫނު އަސާސީއަށް ގެންނާން ޖެހޭ ބަދަލު ގިނަ. ފެޑެރަލް ނިޒާމަކަށް ބަދަލުވުމާއިއެކުގައި، ވެރިކަމުގެ ނިޒާމު، ނުވަތަ ވެރިކަން ކުރާ ގޮތަށް ބަދަލު ގެނައުން އެއީ، ބޭނުންތެރި ކަމެއްގެ ގޮތުގައި، އެތައް ދިވެހީންނަކަށް މިއަދު އެބަ ފެނޭ. އަޅުގަނޑު ދެކޭގޮތުގައި، އެންމެ ކުޑަމިނުން، އަޅުގަނޑުގެ ވާޖިބެއް އެއީ ރައްޔިތުންނާއި ހަމައަށް މި މައްސަލަ ގެންދިޔުން. ފެންނަ ނުފެންނަ ވޯޓަކަށް، ވެރިކަމުގެ ނިޒާމާއި ގުޅޭގޮތުން އަޅުގަނޑުމެން ނިންމުން. އެއީ އަޅުގަނޑުމެންގެ ހައްގެއް.
މަޖިލީހުގެ ރައީސް މުހައްމަދު ނަޝީދު
ނަޝީދު ވިދާޅުވީ މީގެ 15 އަހަރު ކުރީގައި ވެރިކަމުގެ ނިޒާމާއި ގުޅިގެން ފެންނަ ނުފެންނަ ވޯޓު ނަގާފައިވީ ނަމަވެސް، އަނެއްކާވެސް އެ ވޯޓު ނަގަންޖެހިފައިވާ ކަމަށެވެ. އަދި އޭގެ ކޮންމެ ވޯޓަކީވެސް، ކޮންމެ ޖީލަކަށް ނަގަންޖެހޭ ވޯޓެއް ކަމަށެވެ. އަދި އަންނަން އޮތް ޖީލަށްޓަކައި ތައްޔަރުވާންޖެހޭ ވަގުތަކީ މިއީ ކަމަށްވެސް އެމަނިކުފާނު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
