ރައްޔިތުންގެ މަޖިލީހުގެ މެންބަރުންގެ ތެރެއިން އެމްޑީޕީ އަދި އެހެނިހެން ޕާޓީތަކުގެ މެންބަރުންވެސް، ދަ ޑިމޮކްރެޓްސް އާއި އެކު މަސައްކަތް ކުރުމުގެ ޝައުގުވެރިކަން ފާޅުކުރައްވަމުން ގެންދަވާކަމަށް އެ ޕާޓީން ބުނެފި އެވެ. 

ދަ ޑިމޮކްރެޓްސް އިން މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ މަޖިލީހުގައި މިވަގުތު ތިބި މެންބަރުންގެ ތެރެއިން ފިކުރެއްގެ ދިރުން ފެކްޝަނުގެ މެންބަރުން ފިޔަވައި އެހެން ޕާޓީތަކަށް ނިސްބަތްވާ ކިތައް މެންބަރުން ދަ ޑިމޮކްރެޓްސް އާއި ގުޅެން ތައްޔާރަށް ތިބިތޯ ސުވާލު ކޮށްފައެވެ. އަދި އޭގެ ތެރޭގައި އެމްޑީޕީގެ މެންބަރުން ހިމެނޭތޯވެސް ވަނީ ސުވާލު ކޮށްފައެވެ. 

އެ ސުވާލަށް ޖަވާބުދެއްވަމުން، ދަ ޑިމޮކްރެޓްސް ގެ ތަރުޖަމާނު އަދި އެލްޖީއޭގެ ކުރީގެ ސީއީއޯ އަފްޝަން ލަތީފު ވިދާޅުވީ، އެމްޑީޕީގެ މެންބަރުންގެ އިތުރުން އެހެން ޕާޓީތަކުގެ މެންބަރުންވެސް އެ ޕާޓީއާއެކު ސިޔާސީ މަސައްކަތް ކުރުމުގެ ޝައުގުވެރިކަން ފާޅުކުރައްވަމުން ގެންދަވާ ކަމަށެވެ. 

Advertisement

އެމްޑީޕީ އާއި އެހެން ޕާޓީތަކުގެ މަޖިލިސް މެންބަރުން ދަ ޑިމޮކްރެޓްސް އާއި ވާހަކަދައްކަވާ ކަމަށް އަފްޝަން ވިދާޅުވި ނަމަވެސް އެއީ ކޮން މެންބަރުން ކަމެއް، ނުވަތަ އެ ވާހަކަ ދައްކަވަނީ ކިތައް މެންބަރުން ކަމެއް އަދި ދަންނަވަން ދަތި ކަމަށް އޭނާ ވިދާޅުވި އެވެ.