ދިވެހިރާއްޖޭގައި ކެންސަރު ބަލި ގިނަވަނީ އިންޑިއާއިން އެތެރެކުރާ ކޮލެޓީދަށް ކާޑުގެ ބާވަތްތައް ބޭނުންކުރާތީކަމަށް ރައްޔިތުންގެ މަޖިލީހުގެ ނޮޅިވަރަމްފަހު ދާއިރާގެ މެމްބަރު މުޙައްމަދު ނަޝީދު އަބްދުالله (މޮސްޓާ) ވިދާޅުވެއްޖެ އެވެ.
މޮސްޓާ މިފަދައިން ވިދާޅުވެފައިވަނީ ރާއްޖޭގެ ހުރިހާ ކަމެއް އިންޑިއާއަށް ބަރޯސާވެގެން ތިބުމުގެ ސަބަބުން ނިކުންނަ ނޭދެވޭ ނަތީޖާތަކަށް އަލިއަޅުވާލައްވާ ރައްޔިތުންގެ މަޖިލީހުގެ މިއަހަރުގެ ދެވަނަ ދައުރުގެ ދެވަނަ ޖަލްސާގައި ވާހަކަދައްކަވަމުން ނެވެ.
މޮސްޓާ ވިދާޅުވީ ރައްޔިތުންނަށް ބޭނުންވާ ކާބޯތަކެތި ފޯރުކޮށްދެނީ އިންޑިއާއިންކަމަށް ސަރުކާރުން ބުނަމުންދާއިރު، އެ ޤައުމުން ދިވެހިންނަށް ފޯރުކޮށްދެނީ ވަރަށް ފެންވަރުދަށް ތަކެތި ކަމަށެވެ.
އިންޑިއާއިން އެތެރެކުރާ ކާޑުގެ ބާވަތްތަކަކީ "ގެރި ބަކަރި" އަަށް ކާން ދޭން ވެސް ކަމުނުދާނެ ދަށް ފެންވަރުގެ އެއްޗިހީގެ ގޮތުގައި އޭނާ ސިފަކުރެއްވި އެވެ.
އެވާހަކައާއި ގުޅުވާ މޮސްޓާ ވިދާޅުވީ އިންޑިއާއިން އެތެރެކުރާ ފެންވަރު ދަށް ކާޑުގެ ބާވަތްތައް ބޭނުންކުރަން ޖެހުމަކީ ރާއްޖޭގައި ކެންސަރުބަލި އިތުރުވެގެންދާ އެއް ސަބަބުކަމަށެވެ.
"ދިވެހިރާއްޖޭގައި މިއަދު ކެންސަރު މި ގިނަވަނީ އިންޑިއާއިން ވިއްކާ ކޮލެޓީދަށް ކާޑުގެ ސަބަބުން. ކޮލިޓީދަށް ބިހާއި، ކޮލިޓީދަށް އަލުއްވާއި، މިކަހަލަ އެއްޗިހި ކައިގެންނޭ ދިވެހިރާއްޖޭގައި ކެންސަރު މި ގިނަވަނީ"
ނޮޅިވަރަމްފަހު ދާއިރާގެ މެމްބަރު މުޙައްމަދު ނަޝީދު އަބްދުالله (މޮސްޓާ)
މޮސްޓާގެ ވާހަކައިގައި ވަނީ ރައީސް ޔާމީންގެ ސަރުކާރުން މިސާލު ނަންގަވާ، އެ ވެރިކަމުގައި އިންޑިއާއިން ހިލައާއި ހިލަވެލި ރާއްޖެއަށް ދޫކުރުން ހުއްޓާލީމަ، އޭރު ކުރަމުން އައި ކޮންސްޓްރަކްޝަން މަސައްކަތްތައް ހުއްޓިގެން ދިޔަތޯ ސުވާލުކުރައްވާފަ އެވެ.
އެ ވެރިކަމުގައި އިންޑިއާއިން ހިލައާއި ހިލަވެލި ނުދިނީމަ، ލިބެން ހުރިތާކުން އެތަނެތި ގެނެސްގެން މަސައްކަތް ކުރަން ފެށި ފެށުމުން، އިންޑިއާއަށް ބަރޯސާނުވެ ރާއްޖެއިން ބޭނުންވާ ތަނަކުން މުދާ ގެނެސް ރައްޔިތުންނާއި ހަމަޔަށް ފޯރުކޮށްދެވިދާނެކަން އެނގިގެންދާކަމަށް މޮސްޓާ ވިދާޅުވި އެވެ.
މޮސްޓާ އިތުރަށް ވިދާޅުވީ ދުވަހަކުވެސް އިންޑިއާއިން ރާއްޖެއަށް ހެޔޮ އެދިގެން ކަމެއް ކޮށްދީފައި ނުވާކަމަށެވެ.
ތަރީޚުގައި ވެސް އެކަން ފެންނަން އޮތް ކަމަށާއި، އިންޑިއާއިން އަބަދުވެސް މަސައްކަތް ކުރަމުން އައިސްފައިވަނީ ރާއްޖެ އެމީހުންނަށް ބަރޯސާވާ ތަނެއްގެ ގޮތުގައި ބާއްވައިގެން ރާއްޖެއަށް ނުފޫޒު ފޯރުވުމަށްކަމަށް މޮސްޓާ ވިދާޅުވި އެވެ.
Advertisement
This content is created and paid for by advertisers and does not involve Voice Journalists
