ފުއްގިރި ކުއްޔަށް ދޫކުރުމުގެ މުއާމަލާތާއި ގުޅިގެން ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓު ރައީސް އަބްދުﷲ ޔާމީން އަބްދުލްގައްޔޫމުގެ މައްޗަށް އުފުލާފައިވާ ދައުވާތައް ސާބިތުކޮށްދިނުމަށް ދައުލަތުގެ ފަރާތުން ހުށައަޅާ ހެކިންގެ ހެކިބަސް ނެގުން ފަސްކޮށް މައްސަލައިގެ ތަހުގީގު ފައިލުތައް ދިފާއަށް ދެއްކުމަށް ކްރިމިނަލް ކޯޓުން އަމުރުކޮށްފި އެވެ.
ފުއްގިރި މައްސަލައާއި ގުޅޭ އަޑުއެހުމެއް މިއަދު ކްރިމިނަލް ކޯޓުގައި ވަނީ ކުރިއަށް ގެންގޮސްފަ އެވެ. މިއަދުގެ އެ އަޑުއެހުމަކީ އެ މައްސަލައިގެ ހެކިބަސް ނެގުމަށް ކުރިއަށް ގެންދިޔަ އަޑުއެހުމެކެވެ.
އެހެން ނަމަވެސް މިއަދުގެ އަޑުއެހުމުގައި ރައީސް ޔާމިންގެ ފަރާތްޕުޅުން އިސް ގާނޫނީ ވަކީލު ޑރ މުޙައްމަދު ޖަމީލު އަހުމަދު ވަނީ ޝަރީއަތުގެ ކުރީގެ ހުށައެޅުންތަކާ ގުޅޭގޮތުން ސުޕްރީމް ކޯޓަށް ހުށައެޅުއްވި މައްސަލައިގެ ނިންމުމުގައި މައްސަލައާ ގުޅޭ ތަހުގީގުގެ ފައިލްތައް ލިބިދޭންޖެހޭކަމަށް ބަޔާންކޮށްފައި ވުމުން، ހެކިބަސް ނެގުމުގެ މަރުޙަލާގެ ކުރިން އެ ފައިލްގައިވާ ލިއުންތައް ބަލަން ބޭނުންވާކަމަށް ވިދާޅުވެ، އެ ލިޔުންތައް ފޯރުކޮށްދިނުމަށް ކޯޓުގައި ދަންނަވާފަ އެވެ.
އެ ލިޔެކިޔުންތަކަކީ ދިފާއު ބިނާކުރުމަށް މުހިންމު ލިޔެކިޔުންތަކެއްކަން ޑރ ޖަމީލު ފާހަގަކުރެއްވި އެވެ.
އެއާއެކު ރައީސް ޔާމީންގެ ފަރާތްޕުޅުން ގާނޫނީ ވަކީލުން ވަނީ ގުޅުންހުރި ހެކިތަކާ ގުޅޭގޮތުން ސުޕްރީމް ކޯޓުން ފާހަގަކޮށްފައިވާ ކަންކަން ވަޒަން ކުރަން ދިފާއަށް އެނގޭނީވެސް އެ ލިއުންތައް ލިބިގެން ކަމަށާއި، ވުމާއެކު، ފައިލް ލިބުމުން، ހެކިތަކާ ގުޅޭގޮތުން ދިފާއުން އިތުރު ކަންކަން ބޭނުންވާކަން ފާހަގަކުރައްވާފަ އެވެ.
އެ މައްސަލައިގައި ދައުވާ އުފުލާފައިވާ ކްރިކް ރިޒާގެ ވަކީލުވެސް އެކަން ފާހަގަކުރެއްވި އެވެ. ކްރިކް ރިޒާގެ ވަކީލު ވިދާޅުވީ ފުއްގިރި މައްސަލައިގެ ތަހުގީގު ފައިލުތައް ހޯދުމަށް ޕީޖީ އޮފީހަށް ސިޓީއަކުން ހުށައަޅާފައިވާ ކަމަށެވެ. އެހެން ނަމަވެސް މިހާތަނަށް ޖަވާބެއް ލިބިފައި ނުވާކަން ގާނޫނީ ވަކީލުން ފާހަގަކުރެއްވި އެވެ.
ތަހުގީގު ފައިލު ހާމަކުރުމާއި ގުޅޭގޮތުން ދައުލަތުން ބުނީ ސުޕްރީމް ކޯޓުގެ ގަޒިއްޔާއަށް ބަލާއިރު، ހެކި ހާމަ ކުރަން އެދޭ ޙާލަތުގައި ދައުލަތަށް އެ ޒިންމާ އޮންނާނީ ޝަރީއަތުގެ ކުރީގެ ހުށައެޅުމެއް ގޮތުގައި ހުށައަޅާ ހުށައެޅުންތައް ކަމަށެވެ.
މިހާރު ޝަރީއަތުގެ ކުރީގެ މަރުޙަލާގައި ހިނގަން ޖެހޭ ކަމަކަށް ޝަރީއަތުގެ މަރުޙަލާގައި އަލުން ރުޖޫއަވެވެން ނޯންނާނެކަމަށް ދައުލަތުގެ ވަކީލު ވިދާޅުވިއެވެ.
ސުޕްރީމް ކޯޓުގެ ގަޒިއްޔާގެ 50 ވަނަ ނުކުތާގައި ބަޔާންކޮށްފައިވަނީ ޖިނާއީ އިޖުރާއަތުގެ ޤަވާއިދުގައި ބަޔާންކުރާ އުސޫލަކުން، ޤާނޫނު ތަންފީޒުކުރާ އިދާރާގެ އޮފިސަރު ބޭނުންކުރާ މައްސަލައިގެ ފައިލް އެއްކޮށް ބެލުމުގެ ޙައްޤުވެސް ލިބިދޭ ކަމަށެވެ.
އޭގެ ތެރޭގައި ތަހުގީީގީ އިދާރާތަކުން މައްސަލައިގެ ތަހުގީގު ކުރިއަށް ގެންދިޔަ ގޮތުގެ އަދި ހޯދުންތަކުގެ ލޮގްވެސް ހިމެނޭކަމަށް ވަނީ ބަޔާންކޮށްފައެވެ.
އަދި މުޅި މައްސަލައިގެ ތަހުގީގު ފައިލްއާއި އެންމެހައި ލޮގްތައްވެސް ދިފާއަށް ބެލޭނެ އިންތިޒާމު ހަމަޖައްސައިދިނުމަކީ އެގޮތަށް ފަނޑިޔާރު އަމުރުކޮށްފިނަމަ ދައުލަތުގެ މަސްއޫލިއްޔަތެއްކަމަށް ވަނީ ބަޔާންކޮށްފައެވެ.
ދެ ފަރާތުގެ ވާހަކަތަކަށްފަހު އެ މައްސަލަ ބައްލަވާ ގާޒީ ނަދީމު ވިދާޅުވީ ޤާނޫނުއަސާސީގެ 51 ވަނަ މާއްދާގެ ބ ގެ ދަށުން ސުޕްރީމް ކޯޓުގެ ގަޒިއްޔާގައި ބަޔާންކޮށްފައިވާ ކަންކަމަކީ ޝަރީއަތުގެ ކުރީގެ މަރުޙަލާއަށް އެކަނި ޤައިދުވެފައިވާ ކަމެއްކަމަށް ޤަބޫލު ނުކުރެވޭ ކަމަށެވެ.
ޝަރީއަތް ފެށުމުގެ ފަހުންވެސް އެ ފައިލް ބެލުމުގެ ޙައްޤު ލިބިދޭން ޖެހޭ ކަމަށާއި، ސުޕްރީމް ކޯޓުގެ ނިންމުމަކީވެސް ޝަރީއަތުގެ ކުރީގެ މަރުޙަލާ ނިމުނު ފަހުން އައި ނިންމުމެއްކަމަށް ގާޒީ ވިދާޅުވިއެވެ. ގާޒީ ވަނީ މައްސަލައިގެ ތަހުގީގު ފައިލް ދިފާއަށް ދޫކުރުމަށް ނިންމަވައި، އެކަން ދައުލަތަށް އަންގަވާފައެވެ.
އެއާއެކު ގާޒީ ވަނީ ހެކިބަސް މައްސަލައިގެ ހެކިބަސް ނެގުންވެސް ފަސްކޮށްފަ އެވެ.
ގާޒީ ނަދީމު ވިދާޅުވީ މައްސަލައިގެ ހެކިބަސް ނަގާނީ ތަހުގީގު ފައިލުތައް ބަލައި ހެކިބަސް ނެގުމަށް ދިފާއުން ތައްޔާރުވުމަށް ފަހުގައި ކަމަށެވެ. އަދި ތަހުގީގު ފައިލުތައް ކޯޓަށް ގެނެސް ދެއްކުމުގެ އިންތިޒާމުތައް ހަމަޖެއްސުމަށް ވެސް ގާޒީ ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
