ސްޓެލްކޯގެ އަސާސަކީ ރައްޔިތުންނަށް ޚިދުމަތް ކުރުން ކަމަށާ، އެހެންކަމުން އާންމުންނަށް ހިދުމަތް ދިނުމުގައި އެއްވެސް އިހުމާލެއް، ފަރުވާ ކުޑަ ކުރުމެއް، އެއްވެސް މުވައްޒަފެއްގެ ހިތާއި އަމަލުގައި ވެސް ބާއްވައިގެން ނުވާނެ ކަމަށް އެ ކުންފުނީގެ މެނޭޖިން ޑިރެކްޓަރު އަހުުމަދު ޝަރީފު ވިދާޅުވެއްޖެ އެވެ.

ޝަރީފް މިހެން ވިދާޅުވީ، މޯލްޑިވްސް އިންސްޓިޓިއުޓު އޮފް ޓެކްނޮލޮޖީ އާއި ގުޅިގެން ހިންގި ނޭޝަނަލް ސެޓްފިކެޓް 3 އިން ވޯޓަރ ސަޕްލައި ސިސްޓަމް އޮޕަރޭޝަން އެންޑް މެއިންޓަނެންސް އަދި ނޭޝަނަލް ސެޓްފިކެޓް 3 އިން ސްވަރޭޖް ސިސްޓަމް އޮޕަރޭޝަން އެންޑް މެއިންޓަނެންސް ކޯހުގެ ބައިވެރިންނަށް ސެޓްފިކެޓް ދިނުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.

ޝަރީފް ވިދާޅުވީ، ސްޓެލްކޯއިން ދޭ ހިދުމަތުގެ ފެންވަރު ވަޒަން ކުރާނީ މުވައްޒަފުން ނޫން ކަމަށާއި، އެކަން ކުރާނީ ހިދުމަތް ހޯދާ މީހުން ކަމަށެވެ. ފެންވަރު ރަނގަޅު، ރައްޔިތުން ގަބޫލު ކުރާ މިންވަރުގެ ހިދުމަތެއްތޯ ނޫންތޯ ނިންމާނީ ވެސް ހިދުމަތް ހޯދާ ފަރާތްތަކުން ކަމަށާއި ސްޓެލްކޯ އާއި މުވައްޒަފުންގެ ދައުރަކަށް ވާންވާނީ ހިދުމަތް ހޯދާ ފަރާތްތައް ހިތްހަމަޖެހޭނެ ހިދުމަތެއް ދިނުން ކަމަށެވެ.

Advertisement

"މިކުންފުނީގެ އަސާސް ނުވަތަ ޕްރައިމް މެންޑޭޓަކީ އާންމުރައްޔިތުންނަށް ހިދުމަތް ދިނުން. އެއީ ކަރަންޓުގެ ހިދުމަތް ކަމުގައިވިޔަސް އަދި ފެނާއި ނަރުދަމާގެ ހިދުމަތް ކަމުގައިވިޔަސް. މި ތިން ހިދުމަތް ފޯރުކޮށްދިނުމުގައި، ނުވަތަ ރައްޔިތުންނަށް ހިދުމަތް ކުރުމުގައި އަޅުގަނޑުމެންގެ އެއްވެސް މިންވަރެއްގެ، ބާވަތެއްގެ އިހުމާލެއް އެއްވެސް މިންވަރެއްގެ ފަރުވާ ކުޑަ ކުރުމެއް، މުވައްޒަފެއްގެ ހިތުގަވެސް އަދި އަމަލުގައިވެސް އޮވެގެން ނުވާނެ" ޝާރީފް ވިދާޅުވިއެވެ.

ޝަރީފް އިތުރަށް ވިދާޅުވީ، ސްޓެލްކޯގެ އަމާޒަކީ ކުރާ މަސައްކަތުގައި މުވައްޒަފުންނަށް އެންމެ ޒަމާނީ އިލްމާއި، ތަޖުރިބާ ހޯދައިދިނުން ކަމަށާއި، އެއީ ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހުގެ ވެސް ވަރަށް ބޮޑު އަމާޒެއް ކަމަށެވެ.