ސިޔާސީ ވާދަވެރިކަމުގައި ނުބައި ގޮތަކަށް ނިންމުމެއް ނިއްމިއްޖެނަމަ ތަރައްގީގެ މަޝްރޫއުތަކަށް ބޮޑުތަނުން ހުއްޓޭނެ ކަމަށް ޕްލޭނިން މިނިސްޓަރު މުޙައްމަދު އަސްލަމް ވިދާޅުވެއްޖެއެވެ.
މިނިސްޓަރ މިހެން ވިދާޅުވީ، ރައީސް އިބްރާހިމް މުހައްމަދު ޞާލިހުގެ އަރިހުގައި ފ. އަތޮޅަށް ކުރައްވާ ދަތުރުފުޅުގައި ދަރަނބޫދޫގެ ބަނދަރު ހުޅުވުމުގެ ރަސްމިއްޔާތުގައި ވާހަކަ ދައްކަވަމުންނެވެ.
މިހާރު ހިނގާ ތަރައްގީގެ މަޝްރޫއުތައް ހުއްޓުމަކަށް އަންނަން ބޭނުން ވާނީ ކިތައް ރައްޔިތުންބާއޭ ހިތަށް އަރާ ކަމަށާއި، ދަރުޚާރު ބަދަލު ވުމަކީ މަޝްރޫއުތައް ހުއްޓޭނެ ކަމެއްކަން މާޒީން އެނގޭ ކަމަށެވެ.
އޭގެ މިސާލަކަށް މިނިސްޓަރު ނެންގެވީ، ދަތުރުފަތުރުގެ ހިދުމަތެވެ. މީގެ ކުރީގެ ސަރުކާރެއްގައިވެސް ދަތުރުފަތުރުގެ ހިދުމަތް ފެށި ނަމަވެސް ސަރުކާރު ބަދަލު ވުމުން، އެ މަޝްއޫރު ތަރައްގީ ކުރުމުގެ ބަދަލުގައި މަޝްރޫއު ހުއްޓާލައި، މާލެއަށް އެންމެން ޖަމާ ކުރީ ކަމަށް މިނިސްޓަރ ވިދާޅުވިއެވެ.
މީގެ އިތުރުން މިނިސްޓަރ ވިިދާޅުވީ މި ސަރުކާރުގެ އަމާޒަކީ އެއްވެސް ރަށެއް ބާކީނުކޮށް ކޮންމެ ރަށަކަށް ބޭނުންވާ އަސާސީ ހިދުމަތްތައް ފޯރުކޮށްދިނުން ކަމަށެވެ.
"އަޅުގަނޑު އުންމީދު ކުރަން މިހާރު ރިޔާސީ އިންތިހާބާ ކައިރިވެގެން އަންނައިރު އަޅުގަނޑުމެންގެ ތެރޭގަ ބޮޑެތި ސިޔާސީ ހަމަނުޖެހުންތައް ހިނގައިގެން ގޮސް މި މަޝްރޫއުތަކަށް ބުރޫ އަރާނެ ޒާތުގެ ކަންތައްތައް ނުހިނގާނެ ކަމަށް. ކިތައްމެ ވަރަކަށް ތޯޅުނަސް ހެޔޮ، މަސައްކަތްތަކަށް ހުރަސް އެޅޭ ކަހަލަ ކަންކަން ކޮށްގެން ނުވާނެ"
އަސްލަމް ވިދާޅުވިއެވެ.
ރައީސް ޞާލިހުގެ މި ދަތުރުފުޅަކީ ފ. އަތޮޅުގެ ބައެއް ރަށްރަށުގައި ސަރުކާރުން ކުރިއަށް ގެންދިޔަ ބައެއް މަޝްރޫއުތައް ނިންމާ، ހިދުމަތްތައް އިފްތިތާހު ކުރުމަށް ކުރައްވާ ދަތުރުފުޅެކެވެ. މި ދަތުރުފުޅުގައި، އެމަނިކުފާނުގެ އަރިހުގައި ސަރުކާރުގެ ބައެއް މިނިސްޓަރުންވެސް ބައިވެރިވެވަޑައިގަންނަވައެވެ.
Advertisement
This content is created and paid for by advertisers and does not involve Voice Journalists
