ފ. މަގޫދޫގައި ސަރުކާރުން ތަރައްގީ ކުރަމުން އަންނަ އެއާޕޯޓު މީގެކުރިން އެޅުމަށް ނިންމި މިންވަރަށްވުރެ ބޮޑުކޮށް ޖެޓް ވެސް ޖެއްސޭގޮތަށް ނިންމުމަށް ސަރުކާރުން ނިންމާފައިވާ ކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ،  ފ. މަގޫދޫގެ ފެނާއި ނަރުދަމާގެ ނިޒާމް އިފްތިތާޙްކޮށްދެވުމަށާއި ފ. މަގޫދޫގައި އަލަށް ޢިމާރާތްކުރެވުނު ފެނަކަ އޮފީސް ޢިމާރާތް ހުޅުވުމުގެ ގޮތުން ރޭ ބޭއްވި ޖަލްސާގައި ދެއްކެވި ވާހަކަފުޅުގައެވެ. 

އެ ރަސްމިއްޔާތުގައި ވާހަކަ ދައްކަވަމުން ރައީސް ޞާލިހް ވިދާޅުވީ، މަގޫދޫގައި މީގެ ކުރިން އަޅަން ނިންމީ، 1200 މީޓަރުގެ އެއާޕޯޓެއް ކަމަށެވެ. ނަމަވެސް އެރަށުގައި ތަރައްގީ ކުރާ އެއާޕޯޓު 1800 މީޓަރަށް ބޮޑު ކުރުމަށް ސަރުކާރުން ނިންމާފައިވާ ކަމަށް އެމަނިކުފާނު ވިދާޅުވިއެވެ. 

ރައީސް ޞާލިހު އިތުރަށް ވިދާޅުވީ، މަގޫދޫ އެއާޕޯޓް ނިމިގެންދާއިރުގައި، ރާއްޖޭގައި ހުރި ރީޖަނަލް އެއާޕޯޓްތަކުގެ ތެރެއިން އެންމެ ފެންވަރު ރަނގަޅު އެއް އެއާޕޯޓަށް އެ އެއާޕޯޓް ވެގެން ދާނެ ކަމަށެވެ. 

ދައުލަތުގެ ބަޖެޓުން 231.5 މިލިއަން ހަރަދުކޮށްގެން މަގޫދޫ އެއާޕޯޓް ހަދަނީ އެމްޓީސީސީއާ ހަވާލުކޮށްގެންނެވެ. އެކަމަށް ބޭނުންވާ ބިން ހިއްކާ މިހާރު އޮތީ ނިމިފަ އެވެ. ރަންވޭ އާއި ޓާމިނަލްގެ މަސައްކަތް މިހާރު އަންނަނީ ކުރަމުންނެވެ. ހިއްކި ބިމުން ގޯތި ދޭން ވެސް އޮތީ ނިންމައިފަ އެވެ.