ފ. އަތޮޅު މަގޫދޫ ނިމޭއިރު ވެގެންދާނީ ދިވެހިރާއްޖޭގައި އޮތް އެންމެ ފުރިހަމަ ރީޖަނަލް އެއާޕޯޓަށްކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވިދާޅުވެއްޖެ އެވެ.
ރައީސް ޞާލިހު މިފަދައިން ވިދާޅުވެފައިވަނީ ރައީސް ޞާލިހުގެ ދެކަނބަލުން ފ. އަތޮޅަށް ކުރައްވާ ދަތުރުފުޅުގައި އެރަށު މަގޫދޫއަށް ވަޑައިގެން މަގޫދޫ ފެނާއި ނަރުދަމާގެ މަޝްރޫއު އިފްތިތާހުކޮށްދެއްވާ އަލަށް އިމާރާތްކުރެވުނު ފެނަކަ އޮފީސް ހުޅުވުމުގެ ރަސްމިއްޔާތުގައި ވާހަކަފުޅުދައްކަވަމުން ނެވެ.
ރައީސް ޞާލިހު ވިދާޅުވީ މަގޫދޫ އެއާޕޯޓުގެ މަސައްކަތް ފަށައިގަތީ 1200 މީޓަރުގެ ދިގު އެއާޕޯޓެއްގެ ގޮތުގައި ކަމަށެވެ. އެހެން ނަމަވެސް މިހާރު އެއަރޕޯޓް ބޮޑުކޮށް، 1800 މީޓަރުގެ އެއަރޕޯޓަކަށް ބަދަލުކުރަން ނިންމާފައިވާ ކަމަށާއި، ފ. އަތޮޅުގައި ހުރި ފެންވަރު ރަނގަޅު ރިސޯޓުތަކަށް ޕްރައިވެޓް ޖެޓު ޖެއްސޭވަރުގެ އެއާޕޯޓަކަށް އެ އެއާޕޯޓު ވެގެން ގޮސްފައިވާކަމަށް ރައީސް ވިދާޅުވި އެވެ.
ރައީސުލްޖުމްޙޫރިއްޔާ ވިދާޅުވީ އެ އަންނަ ޖެޓްތައް މި ތަނުގައި ޕާކް ކުރެވޭނެ އިތުރު ޕަރކިންގ ސަރަޙައްދަކާއި، ވީ.އައި.ޕީ. ޓަރމިނަލެއް އެ އެއާޕޯޓުގައި ޤާއިމްކުރާނެ ކަމަށެވެ. އަދި ދެވަނަ ތަނަކަށް ނުގޮސް މަގޫދޫ އެއާޕޯޓަށް ޖައްސާ ބޯޓުފަހަރަށް ތެޔޮއެޅޭނެ ފިއުލްފާމެއް އެއާޕޯޓު ނިމިގެންދާއިރު ޤާއިމްކުރެވިގެންދާނެ ކަމަށް ރައީސް ޞާލިހު ވިދާޅުވި އެވެ.
"އަޅުގަނޑު ހިތުން މި އެއަރޕޯޓް ނިމިގެންދާއިރުގައި، ރާއްޖޭގައި އޮތް ރީޖަނަލް އެއަރޕޯޓްތަކުގެ ތެރެއިން އެންމެ ފުރިހަމަ އެއް އެއަރޕޯޓަށް މި އެއަރޕޯޓް ވެގެންދާނެ. އަދި އޭގެއިތުރުން، ޖެޓްތަކުގައި އަންނަ ފަޅުވެރިން، ކްރޫން މަޑުކުރެވޭނެ ކުޑަ ހޮޓަލެއް، މި ރަށުގައި އެއަރޕޯޓާ އެކީގައި ޤާއިމުކުރުމަށްވެސް އަޅުގަނޑުމެން ވަނީ ނިންމާފައި"
ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު
ރައީސް ޞާލިހު އިތުރަށް ވިދާޅުވީ މަގޫދޫ އެއާޕޯޓުގެ މަސައްކަތް ނިމި، އެއާޕޯޓުން ޚިދުމަތްދޭން ފެށުމާއެކު އެ އަތޮޅުގެ ތަރައްގީއަށް ބޮޑެތި ކުރިއެރުންތަކެއް އަންނާނެކަމަ ށެވެ. އަދި ރަށުގެ ތަރައްގީއަށް ވެސް ބޮޑެތި ކުރިއެރުންތަކެއް އެއާޕޯޓުގެ ސަބަބުން ލިބިގެންދާނެކަން ރައީސް ޞާލިހު ފާހަގަކުރެއްވި އެވެ.
Advertisement
This content is created and paid for by advertisers and does not involve Voice Journalists
