މަސް ފިނިކޮށް ގަނޑުކުރުމުގެ ކެޕޭސިޓީ 80 މެޓްރިކް ޓަނުން 500 މެޓްރިކް ޓަނަށް ބަދަލުކުރެވިފައި ވާ ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވިދާޅުވެއްޖެ އެވެ.
އެމަނިކުފާނު މިފަދައިން ވިދާޅުވެފައިވަނީ ފ. ފީއަލީގައި އަލަށް އިމާރާތްކުރެވުނު އިންޖީނުގެއާއި، އޮފީސް އިމާރާތާއި އައިސް ޕްލާންޓު ހުޅުވުމުގެ ރަސްމިއްޔާތުގައި ވާހަކަދައްކަވަމުން ނެވެ.
މި ސަރުކާރުން މަސްވެރިކަމުގެ ސިނާއަތް ކުރިއެރުވުމަށްޓަކައި ކޮށްދެއްވާފައިވާ ވަރަށް ގިން ކަންތައްތަކަށް ރައީސުލްޖުމްޙޫރިއްޔާގެ ވާހަކަފުޅުގައި ވަނީ އަލިއަޅުވާލައްވާފަ އެވެ.
ރައީސުލްޖުމްހޫރިއްޔާ ވިދާޅުވީ މަސްވެރިކަމުގެ ސިނާއަތަކީ ކުރީ ސަރުކާރުތަކުން ވަރަށް ބޮޑަށް ދޫކޮށްލާފައިވާ ސިނާއަތެއްކަމަށެވެ. މިސްފޯގައި މަސް ރައްކާކުރެވޭ ކެޕޭސިޓީއަށް ބަލާލިނަމަވެސް އެކަން ފާހަގަކުރެވޭކަމަށް ރައީސް ޞާލިހު ވިދާޅުވި އެވެ.
އެގޮތުން އެމަނިކުފާނު ވިދާޅުވީ އެމަނިކުފާނު ވެރިކަމާއި ހަވާލުވިއިރު މިފްކޯއަށް މަސްކިރޭ ކެޕޭސިޓީ ކުރީ 1727 މެޓްރިކް ޓަނުގައި ކަމަށެވެ. އެހެން ނަމަވެސް މިހާރު މިފްކޯގެ ގާބިލުކަން 5027 މެޓްރިކް ޓަނު ކިރޭވަރަށް އިތުރުކުރެވިފައިވާ ކަމަށް ރައީސް ޞާލިހު ވިދާޅުވި އެވެ.
އޭގެ އިތުރުން އެމަނިކުފާނު ވިދާޅުވީ އަލަށް ގެނައި ޖަޒީރާ 103 ނަންބަރު ބޯޓާއެކު މަސް ފިނިކޮށް ގަނޑުކުރުމުގެ ކެޕޭސިޓީ ބޮޑުތަނުން އިތުރުވެގެން ގޮސްފައިވާކަން ރައީސް ޞާލިހު ފާހަގަކުރެއްވި އެވެ.
"މަސް ފިނިކޮށް ގަނޑުކުރުމުގެ ކެޕޭސިޓީއަށް ބަލާއިރުގައިވެސް، އޭރު ހުރީ އެންމެ 80 މެޓްރިކް ޓަނުގެ ކެޕޭސިޓީ އުޅަނދުފަހަރުގައި. ޖަޒީރާ 103، "ވަން ޒީރޯ ތްރީ" ނެރުމާ އެކީގައި، މަސައްކަތަށް ނެރުމާ އެކީގައި މި ކެޕޭސިޓީ 500 މެޓްރިކް ޓަނަށް ބަދަލުކުރެވިއްޖެ. އަދި ކުރިއަށް އެބައޮތް ތިން ބޯޓު ގެނައުން. އެއާއެކީގައި، މި ކެޕޭސިޓީވެސް ބޮޑުތަނުން އިތުރުވެގެންދާނެ"
ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު
ރައީސުލްޖުމްހޫރިއްޔާ ވިދާޅުވީ މި ސަރުކާރުން މަސްވެރިންގެ އަތުން ކިރާ މަހަށް 3.58 މިލިއަން ރުފިޔާގެ މަސް ސަރުކާރަށް ކިރާފައިވާކަމަ ށެވެ.
މަސްވެރިކަމުގެ ސިނާއަތަށް މި ސަރުކާރުން ގެންނަމުންދާ ހެޔޮ ބަދަލުތަކުގެ ނަތީޖާ ފެންނަމުންދާކަމަށް ރައީސް ޞާލިހު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
