ނ.މަނަދޫގައި މަރާލާފައި އޮއްވައި ފެނުނު އެ ރަށު ނައީމާ މޫސާގެ މަރުގެ މައްސަލައިގައި ރޭ މާލެއިން ހައްޔަރުކުރި މީހާގެ ބަންދަށް 30 ދުވަސް ކްރިމިނަލް ކޯޓުން ދީފި އެވެ.

ނައީމާ ދިރިއުޅޭ ގޭގައި އޭނާ މަރުވެފައި އޮއްވާ ފެނުނީ ފާއިތުވި އޭޕްރިލް މަހުގެ 7 ވަނަ ދުވަހުއެވެ. އޭނާ އަކީ އެގޭގައި އެކަނި ދިރިއުޅެމުންދިޔަ މީހެކެވެ. އަދި އޭނާ މަރުވެފައި އޮއްވާ ފެނުނީ ހަބަރެއް ނުވެގެން އާއިލާއިން ރިޕޯޓް ކުރުމުން ފުލުހުން ގޮސް ބެލުމުންނެވެ. 

އެ މައްސަލައިގައި ކޯޓު އަމުރެއްގެ ދަށުން ރޭ މާލެއިން ހައްޔަރުކުރީ މަނަދޫގެ ޒުވާނެއް ކަމަށްވާ ހަސަން ފަވާޒް، 21 އެވެ. ނައީމާ މަރާލި އިރު އެ ރަށުގައި އުޅުނު ނަމަވެސް ފަހުން އޭނާ އުޅެމުންއައީ މާލޭގަ އެވެ.

ފުލުހުންގެ މީޑިއާ އޮފިޝަލް ވިދާޅުވީ، އޭނާގެ ބަންދާއިމެދު ގޮތެއް ނިންމަށް މިއަދު ކްރިމިނަލް ކޯޓަށް ހާޒިރު ކުރުމުން ބަންދަށް 30 ދުވަސް ޖަހާފައިވާ ކަމަށެވެ. 

ނައީމާގެ މަރުގެ ތުހުމަތަށް މަނަދޫން ވެސް ވަނީ ދެމީހަކު ހައްޔަރު ކޮށްފައެވެ. އެގޮތުން ހައްޔަރުކުރީ އަހްޒަމް އަބްދުއްޝަކޫރު ،23، އާއި ރިފާޝް 20، އެވެ. މި ދެ މީހުންނަކީ ވެސް މަސްތުވާތަކެތި ބޭނުން ކުރުމާއި ވިއްކުމުގެ ތުހުމަތު އޮތް ދެ މީހުން ކަމަށްވެއެވެ.

ދެމީހުންގެ ތެރެއިން އެކަކު ނައީމާ މަރާލުމުގައި ބައިވެރިވި ކަމަށް އެއްބަސްވެފައިވާއިރު، ފުލުހުން އޭނާ ފުރަތަމަ ހައްޔަރު ކޮށްފައިވަނީ މަސްތުވާތަކެތީގެ މައްސަލައެއްގަ އެވެ. ނަމަވެސް އޭނާއަށް ނައީމާގެ މަރުގައި ތުހުމަތުކުރެވޭ ކަމަށް ފުލުހުން ބުނީ ކޯޓުގަ އެވެ.

ނައީމާ މަރާލުމަށް ބޭނުންކުރިކަމަށް ބެލެވޭ ތޫނު ދެ ހަތިޔާރާއި ހަމަލާދިންވަގުތު އެކަމުގައި ބައިވެރިވި މީހުން ލައިގެންތިބި އަންނައުނު، ވަޅުގަނޑެއް ކޮނުމަށްފަހު އެ ވަޅުގަނޑަށް އަޅާ އަންދާލައި، ފަސްއަޅާ ފޮރުވާފައިވަނިކޮށް، ފުލުހުން ވަނީ ކޮނެގެން އެތަކެތި ނަގާފައެވެ.

އެމައްސަލައާއި ގުޅުން ހުރި ކާރެއްވެސް ފުލުހުންގެ ބެލުމުގެ ދަށަށް ގެންގޮސްފައިވާއިރު, އެއޫ ނައީމާ މަރާލި ރޭ އެ ރަށުގައި ދުއްވި ކާރެކެވެ. އަދި އެ މައްސަލައިގެ ތުހުމަތަށް ފުރަތަމަ ހައްޔަރުކުރި ދެ މީހުން ލައްވައި އެ ކާރުގައި ފުލުހުން އެ ރޭގެ ބައެއް މަންޒަރުތައް ތަހުގީގުގެ ބޭނުމަށް ވަނީ ކުޅުވައިފަ އެވެ.