ސިއްޙީ ހާލުކޮޅު ތަން ނުދޭތީ، ދަށު ކޯޓުގައި ކުރިއަށް ދާ ފުއްގިރި މައްސަލައިގެ ޝަރީއަތުގެ އަޑުއެހުންތައް ދިގުލައިގެން ނުދާނެފަދަ ގޮތަކަށް ކުރިއަށް ގެންގޮސްދެއްވުމަށް ވާދަވެރި ސިޔާސީ ލީޑަރު ރައީސް އަބްދުالله ޔާމީން އަބްދުލްގައްޔޫމު އެދިވަޑައިގެންފި އެވެ.
ފުއްގިރި މައްސަލައާއި ގުޅިގެން މިއަދުވެސް ކްރިމިނަލް ކޯޓުގައި ވަނީ ޝަރީއަތުގެ އަޑުއެހުމެއް ކުރިއަށް ގެންގޮސްފައެވެ. ދެ ގަޑިއިރަށްވުރެ ދިގުކޮށް ކުރިއަށް ގެންދިޔަ އެ އަޑިއެހުމުގައި އޮތީ ދައުވާ ސާބިތުކޮށްދިނުމަށް ދައުލަތުން ހުށައެޅި ހެކިތަކާއި ގުޅޭގޮތުން ވާހަކަދެއްކުމެވެ.
ދެ ގަޑިއިރަށް ޝަރީއަތް ދިގުލައިގެން ދިއުމާއި ގުޅިގެން ރައީސް ޔާމީންގެ ފަރާތްޕުޅުން ވަނީ އެމަނިކުފާނުގެ ސިއްޙީ ހާލުކޮޅު ހުރިގޮތުން ޝަރީއަތުގެ އަޑުއެހުންނަށް ދިގުލައިގެން ދާތީ ވަރަށް ބޮޑަށް ދަތިފުޅުވާކަމަށް ވިދާޅުވެފައެވެ.
ރައީސް ޔާމީނަކީ އުނަގަޑުގެ އާލާސްކަންފުޅެއް ހުންނަ ބޭފުޅަކަށް ވުމުން، އެއްތަނެއްގައި ގިނައިރު އިށީދެގެން އިނުމުގެ ސަބަބުން ވަރަށް ބޮޑަށް އުނަގަޑުގައި ރިއްސާކަމަށާއި، ޝަރީއަތުގެ އަޑުއެހުންތައް ކުރިއަށް ގެންދަވާއިރު، އެމަނިކުފާނަށް ތަކުލީފަކަށް ނުވާނެފަދަ ގޮތަކަށް ރާވާދެއްވުމަށް ރައީސް ޔާމީން އެދިވަޑައިގެންނެވި އެވެ.
އެމަނިކުފާނު ވިދާޅުވީ އެމަނިކުފާނުގެ ފަރާތްޕުޅުން މެޑިކަލް ޑޮކިއުމަންޓުތަކާއި، ޑޮކްޓަރުގެ ލަފާފުޅު ކްރިމިނަލް ކޯޓާއި ހިއްސާ ވެސް ކުރައްވާފައިވާނެ ކަމަށެވެ. އަދި ވިދާޅުވީ ޖަލު ބަންދުގައި ހުންނަވާ މުއްދަތުގައި އެކަމަށް އެކަށީގެންވާ ފަރުވާއެއްވެސް ލިބިވަޑައިނުގަންނަވާ ކަމަށެވެ.
އެމަނިކުފާނަކީ ހުކުމެއް ތަންފީޒުކުރައްވަމުން ގެންދަވާ ބޭފުޅަކަށްވުމުން، އަޑުއެހުންތަކުގައި ބައިވެރިވެވަޑައިގަންނަވާ ފަރާތްތަކާއި ޚިލާފަށް، ލިބޭ 15 ނުވަތަ 10 މިނެޓުގެ ހުސްވަގުތުކޮޅުގައި ވެސް އެމަނިކުފާނަށް ބޭރަށް ނިކުމެމަޑައި ނުގެންނެވޭ ކަމަށާއި، އެކަމުގެ ސަބަބުން އުނަގަނޑުގެ އާލާސްކަންފުޅު ބޮޑުވާކަމަށް ރައީސް ޔާމީން ވިދާޅުވިއެވެ.
ރައީސް ޔާމީން ވަނީ އެކަމަށް ރިއާޔަތްކޮށްދެއްވާ ޝަރީއަތުގެ އަޑުއެހުންތައް ދިގުލައިގެން ނުދާނެގޮތަކަށް ތާވަލުކޮށްދެއްވުމަށް އެދިވަޑައިގަންނަވާފަ އެވެ. ޚާއްސަކޮށް ފުއްގިރި މައްސަލައަކީ އަވަހަށް ނިންމަން ޖެހޭ މައްސަލައެއް ކަމަށް ނުވުމުން، އެމަނިކުފާނަށް ތަކުލީފަކަށް ވާގޮތަށް އަޑުއެހުންތައް ކުރިއަށް ގެންދިއުމުގެ ބޭނުމެއް ވެސް ނެތްކަން ރައީސް ޔާމީން ފާހަގަކުރެއްވި އެވެ.
މިއަދުގެ އަޑުއެހުން ވެސް ވަނީ ރައީސް ޔާމީންގެ ފަރާތްޕުޅުން ހުށައެޅި ކަންކަމަށް ރިއާޔަތްކޮށް ނިންމާލުމަށް ކަނޑައަޅާފައިވާ ވަގުތަށްވުރެ ބައިގަޑިއިރެއްހާއިރު ކުރިން ކުރުކޮށްލައްވާފަ އެވެ.
އަދި ދެން އެ މައްސަލައިގައި އަޑުއެހުމެއް އޮންނާނެ ދުވަހެއް ކްރިމިނަލް ކޯޓުން އަންގާނެކަމަށް ގާޒީ ވިދާޅުވި އެވެ.
Advertisement
This content is created and paid for by advertisers and does not involve Voice Journalists
