މާދަން އިދިކޮޅުން ބާއްވާ ރެލީ ބިނާވެފައިވަނީ އެއްވެސް އަސާސެއް ނެތް ކަމެއްގެ މައްޗަށް: މިއުވާން
ޗާގޯސް މައްސަލައިގައި އުފައްދާފައިވާ އިއްތިހާދުން "ކަނޑު ވިއްކުމާއި ދެކޮޅު" ނަމުގައި މުޅި ރާއްޖެއަށް ހުޅުވާލައިގެން މާދަމާ ބާއްވާ ރެލީ އަކީ އެއްވެސް އަސާސެއް ނެތް ކަމެއްގެ މައްޗަށް ބިނާކޮށް ބާއްވާ ރެލީ އެއްކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.
ފޯޅަވަހީގެ ކަނޑުގެ ސަރަހައްދުގެ ފުށުއަރާ ބައިގެ އިން ވަކިކުރުމުގައި ރާއްޖޭގެ ކަނޑުން ބޮޑު ބައެއް ގެއްލިފައިވާ ކަމަށްބުނެ އިދިކޮޅުން "ކަނޑު ވިއްކުމާއި ދެކޮޅު" އިއްތިހާދެއް ވަނީ އުފައްދާފައެވެ. އެ އިއްތިހާދުގައި، ޕީޕީއެމް/ޕީއެންސީ، ޖުމްހޫރީ ޕާޓީ، ދަ ޑިމޮކްރެޓްސް، އެމްއެންޕީ، ރިޔާސީ އިންތިހާބުގައި ވާދަކުރައްވާނެ ކަމަށް އިއުލާން ކުރައްވާފައިވާ ކުރީގެ ބަންޑާރަ ނައިބު ޑރ. މުނައްވަރު އަދި ކުރީގެ ހޯމް މިނިސްޓަރު އުމަރު ނަސީރު ހިމެނިވަޑައިގަންނަވައެވެ.
އެ އިއްތިހާދުން މާދަމާ ބޮޑު ރެލީއެއް ބާއްވާއިރު، މާދަން ރޭގައި "ބާނަ ބާނަ ތިއްބާ ތިޔަ ވިއްކާލީ ކަނޑު" ނަމުގައި ބޮޑު ޖަލްސާއެއްވެސް ބާއްވަން ވަނީ ނިންމާފައެވެ. އަދި އެ ޖަލްސާއަކީ މިހާތަނަށް ސިޔާސީ ޕާޓީތައް ގުޅިގެން ބާއްވާ އެންމެ ބޮޑު ހަރަކާތަށް ވެގެންދާނެކަމަށް "ކަނޑު ވިއްކާލުމާއި ދެކޮޅު" ކޯލިޝަނުން ވަނީ ބުނެފަ އެވެ.
Advertisement
އެކަމާއި ގުޅިގެން މިއަދު ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި ވާހަކަ ދައްކަވަމުން މިއުވާން ވަނީ އެއީ އެއްވެސް އަސާސެއް ނެތް ކަމެއްގެ މައްޗަށް ބިނާކޮށް ބާއްވާ ރެލީއެއް ކަމަށާ، އެކަން ރައްޔިތުންނަށްވެސް އެނގޭކަމަށް ވިދާޅުވެފައެވެ.
"އެ ހަރަކާތަކީ އެއްވެސް އަސާސެއް ނެތް ކަމެއްގެ މައްޗަށް ބިނާކޮށް، ދިވެހިންގެ ހިތުގައި އޮތް ވަތަނީ ޖޯޝު، އޭގެ ފައިދާ، ސިޔާސީ ބޭނުމަށް ނަހަމަ ގޮތުގައި ހިފިދާނެ ކަމުގެ ހުވަފެނެއްގައި، މަދު ފަރާތްތަކަކުން ހިންގާ ހަރަކާތެއްގެ ގޮތުގައި އަޅުގަނޑުމެން ސިފަ ކުރަނީ."
"މި މައްސަލާގައި މި އަޑުގަދަ ކުރައްވާ ބޭފުޅުންނަށް ބަލާލާއިރު، އެކިއެކި ވާހަކަ ދައްކައިގެން، ގައުމުގެ ހަމަޖެހުން ނަގާލަން މަސައްކަތް ކުރާ ބައެއް ފަރާތްތަކާއި، އަދި ބައިނަލްއަގުވާމީ މި ޓްރައިބިއުނަލްގެ، ނުވަތަ ބައިނަލްއަގުވާމީ މި ދާއިރާގައި ތިބި ބޭފުޅުންނަށްވުރެ، މި ދާއިރާގައި އެއްވެސް ވަރަކަށް މަސައްކަތް ނުކުރައްވާ ތިއްބަވާ، ނަމަވެސް އެބޭފުޅުންނަށްވުރެ ތަޖުރިބާކާރު ބޭފުޅުން ކަމަށް ބައެއް ބޭފުޅުންނާ، މިފަދަ ބޭފުޅުން ތަކެއް މި ހިމެނެނީ. އެކަން ދިވެހިން ވަރަށް ރަނގަޅަށް ގަބޫލުކުރާހެން އަޅުގަނޑަށް ހީވަނީ."
މިއުވާން މުހައްމަދު
މިއާއެކު މިއުވާން ވިދާޅުވީ އެ މައްސަލައިގައި ނުކުމެ ތިއްބެވި ބޭފުޅުންނަކީ އެއްގަލަކަށްވެސް ނޭރެވޭ ބޭފުޅުންކަމަށާ، މި މައްސަލަ އަކީ ކޮބައިކަންވެސް، އެކި ބޭފުޅުން ސިފަ ކުރައްވަނީ އެކި ގޮތަށް ކަމަށެވެ. އެގޮތުން، މައްސަލަ ނިންމާފައިވަނީ "ރިޝްވަތު ނަގައިގެންނޭ،" ނުވަތަ، "ދޫކޮށްލައިގެންނޭ،" ނުވަތަ "ރަނގަޅަށް ވަކާލާތު ނުކުރެވިގެންނޭ" ފަދަ އެކި ވާހަކަ އެކި ބޭފުޅުން ދައްކަވާ ކަމަށް ވިދާޅުވެ މިއުވާން ވަނީ ކަނޑުވިއްކުމާއި ދެކޮޅު އިއްތިހާދަށް ވަރަށް ބޮޑަށް ފާޑުވިދާޅުވެފައެވެ.
އަޅުގަނޑު ކުރިންވެސް ދެންނެވު ފަދައިން، މި ބޭފުޅުން އެއްބަސްވާ އެންމެ ކަމެއް އޮންނަނީ. ކޮންމެ ބޭފުޅެއްވެސް ވެރިކަމަށް ވަޑައިގަންނަވަން. އެކަމަށް ހުރިހާ ބޭފުޅުންވެސް އެބަ އެއްބަސްވޭ.
މިއުވާން މުހައްމަދު
މިއުވާން އިތުރަށް ވިދާޅުވީ، އެ މައްސަލަ އިސްތިއުނާފް ކުރާނެކަމަށް އިދިކޮޅުން ބުނި ނަމަވެސް، އިސްތިއުނާފް ކުރާނެ ތަނެއްވެސް އެއްވެސް ބޭފުޅަކަށް ވިދާޅުނުވެވޭ ކަމަށެވެ. އަދި އެފަދައިން ވިދާޅުނުވެވެނީ އެއީ އިސްތިއުނާފް ނުކުރެވޭނެ މައްސަލައެއް ކަމަށް ވާތީ ކަމަށްވެސް އޭނާ ވިދާޅުވި އެވެ.
މިއުވާން ވިދާޅުވީ ކުރިއަށް އޮތީ ރިޔާސީ އިންތިހާބު ކަމަށާ، އިންތިހާބާއި ދިމާކޮށް އެކި ބޭފުޅުން، އެކިއެކި ސިޔާސީ ވާހަކަ ދައްކަވާނެ ކަމަށާ، އެހެންނަމަވެސް، ސަރުކާރުގެ އަމާޒަކީ ރައްޔިތުންނަށް ބޭނުންވާ ކަންކަން ކޮށްދީ ރައްޔިތުންގެ ހާލަތު މިހާރަށްވުރެ ރަނގަޅުކުރުމަށް ކަމަށެވެ.
Advertisement
Advertisement
Advertisement
This content is created and paid for by advertisers and does not involve Voice Journalists
Advertisement
