ދިވެހި ފުލުހުންގެ ޚިދުމަތުގައި މިހާރު ބޭނުން ކުރަމުން ދަނީ ލޭޒަ ސްޕީޑް ގަން އިން އުޅަނދު ތަކުގެ ސްޕީޑް ދެނެގަންނަ ގޮތާއި އެއާއި ބެހޭ ގިނަ މައުލޫމާތު ތަކެއް އެ އިދާރާއިން ދީފިއެވެ. 

ގްރޭޓަރ މާލޭ އޭރިއާގައިވާ ބްރިޖް އަދި ހައިވޭގައި ދުއްވުމަށް ކަނޑައަޅާ ހުއްދަ ދުވެއްޔަކީ 25 ކިލޯމީޓަރާއި 50 ކިލޯމީޓަރާ ދެމެދެވެ. ލާމު ލިންކު އަދި އައްޑޫސިޓީ ލިންކު ރޯޑުގައި 60 ކިލޯމީޓަރާ ހަމައަށް ދުއްވޭ ހިސާބުތައް ކަނޑައަޅާފައިވެއެވެ. ވަކި ދުވެއްޔެއް ކަނޑައަޅާފައި ނުވާނަމަ އާންމުކޮށް ރަށު ތެރޭގައި ސައިކަލާއި ކާރު އަދި ބަސް ދުއްވުމަށް ކަނޑައަޅާފައި ވަނީ 30 ކިލޯމީޓަރަށެވެ.

މުދާ އުފުލުމަށް ބޭނުންކުރާ ހުރިހާ އުޅަނދެއް ދުއްވުމަށް ކަނޑައަޅާފައި ވަނީ 25 ކިލޯމީޓަރަށެވެ. މި ދެންވުނު ސްޕީޑަށް އާންމު ރައްޔިތުން އަމަލު ކުރަމުންދޭތޯ ބެލުމަށް ދިވެހި ފުލުހުން ބޭނުން ކުރަމުންދާ އެއް ވަސީލަތަކީ ސްޕީޑް ގަންއެވެ.

ދިވެހި ފުލުހުންގެ ޚިދުމަތުގައި މިހާރު ބޭނުން ކުރަމުން ދަނީ ލޭޒަ ސްޕީޑް ގަންތަކުގެ ތެރެއިން އެންމެ ފަހުގެ ޓެކްނޮލޮޖީގެ ސްޕީޑް ގަން ކަމަށް އެ އީދާރާއިން ބުނެއެވެ. މި ސްޕީޑް ގަންއަށް 1.5 ކިލޯމީޓަރުގެ ދުރުން އުޅަނދުގެ ސްޕީޑް ދެނެގަނެވޭއިރު، އުޅަނދެއް ދުއްވާފައި އަންނައިރު އެ އުޅަނދަކަށް ލޭޒަރ އެޅުވުމުން އެ އުޅަނދު ދުއްވާފައި އަންނަ ސްޕީޑް ކެމެރާއަށް ރެކޯޑު ކުރެއެވެ. މިގޮތުން ރެކޯޑު ކުރަނީ އެ އުޅަނދުގެ ފޮޓޯ އަކާއި އެ އުޅަނދުގެ ވީޑިއޯ ކޮޅެކެވެ.

ފުލުހުން ބުނެފައިވާ ގޮތުގައި، އެ ޚިދުމަތުން ސްޕީޑް ގަން ބޭނުން ކުރަމުންދަނީ ދުވެއްޔާ ހިލާފުވާ މީހުން ދެނެގަނެ ސްޕީޑުގެ ސަބަބުން އޮތް ނުރައްކާ ކުޑަކުރުމުގެ މަގުސަދުގައި ކަމަށާ، އަމާޒަކީ މަގުމަތީގެ ހާދިސާތަކުގައި މަރުވާ މީހުންގެ އަދަދު ސުމަކަށް ހެދުން ކަމަށެވެ. 

އަދި އެކަމަށްޓަކައި ގަވާއިދާއި ޚިލާފަށް ދުއްޗާ ފަރާތްތަކާއި މެދު އެ އިދާރާއިން ފިޔަވަޅު އަންނަ ގޮތުގެ ތަފްސީލް ވެސް ވަނީ ދީފައެެވެ.

އެގޮތުން، ކަނޑައެޅިފައިވާ ދުވެއްޔާ ހިލާފުވާ ކަމަށް ފާހަގަ ކުރެވޭ އުޅަނދުތައް ފުރަތަމަ ފަހަރު 500 ރުފިޔާއިން ޖޫރިމަނާކުރުމާ އެކު އެކަން ތަކުރާރު ކޮށްފިނަމަ ވާނެގޮތް ބުނެދެވޭނެ ކަމަށެވެ. އަދި ކަނޑައެޅިފައިވާ ދުވެއްޔާ ދެވަނަ ފަހަރަށް ހިލާފުވެއްޖެ ނަމަ 750 ރުފިޔާއިން ޖޫރިމަނާ ކުރުމާއެކު 48 ގަޑި އިރަށް އެ މީހެއްގެ ދުއްވުމުގެ ހުއްދަ ހިފެހެއްޓޭނެ ކަމަށެވެ. 

ފުލުހުން ބުނީ، މި ހުއްދަ ދޫކުރެވޭނީ ފައިސާދެއްކި ކަމުގައި ވިޔަސް 48 ގަޑި އިރު ހަމަވުމުން ކަމަށާ، ކަނޑައެޅިފައިވާ ދުވެއްޔާ ތިންވަނަ ފަހަރަށް ހިލާފުވެއްޖެ ނަމަ 1000 ރުފިޔާއިން ޖޫރިމަނާ ކުރުމާއެކު އެ މީހަކު ދުއްވި އުޅަނދު 15 ދުވަހުގެ މުއްދަތަށް ދިވެހި ފުލުހުންގެ ބެލުމުގެ ދަށަށް ގެނެވޭނެ ކަމަށެވެ. އަދި މި އުޅަނދު ދޫކުރެވޭނީ 15 ދުވަސް ހަމަވުމުން ކަމަށެވެ.