ރައީސް އިބްެރާޙިމް މުޙައްމަދު ޞާލިޙް ދަތުރުފުޅު ކުރައްވަމުން ދިޔަ މޮޓޯޑޭކޭޑަށް ހުރަސް އެޅި މައްސަލައިގައި ފަސްމީހަކަށް ދަޢުވާ ކުރުމަށް ފޮނުވައިފިއެވެ.

ޕްރޮސްކިޔުޓަރ ޖެނެރަލްގެ އޮފީހުން ބުނެފައިވަނީ މިއަހަރުގެ މާޗް 20 ވަނަ ދުވަހުގެ ރޭ، ބޮޑުތަކުރުފާނުމަގު ޗީބޯ ކެފޭ ކައިރިން ރައީސުލްޖުމްހޫރިއްޔާ ދަތުރުފުޅު ކުރައްވަމުން ގެންދެވި މޮޓޯކޭޑަށް ހުރަސްއަޅައި އަޑުގަދަކޮށް، ޢާންމު މަސްލަޙަތު ނަގައިލައި ، ފުލުހުންގެ ދައުރު އަދާކުރުމަށް ހުރަސްއެޅިކަމަށް ތުހުމަތުކުރެވޭ މައްސަލައިގައި ހުޅުމާލެ، ގޯތި ނަންބަރު 11328 މުޙައްމަދު އައްބާސް، ދަފްތަރު ނަންބަރު ރސ 9151 އަޙްމަދު ރަޝީދު، ހުޅުމާލެ، ފްލެޓް ނަންބަރު06-2-154 އަޙްމަދު ޢަޒީލް ގެ މައްޗަށް ދިވެހި ރާއްޖޭގެ ޤާނޫނުލްއުޤޫބާތުގެ 533 ވަނަ މާއްދާގެ ދަށުން ދައުލަތުގެ މަސައްކަތަކަށް ހުރަސްއެޅުމުގެ ކުށުގެ ދަޢުވާ ކުރުމަށް 31 މެއިގައި ފޮނުވައިފައިވާކަމަށެވެ.

އަދި ގއ ދެއްވަދޫ، އެސްޓަންވިލާ، އަޙްމަދު ސިނާން އާއި، ށ ބިލެތްފަހި، ސޭޑީކޯނަރ، މަރްޔަމް މާޝާގެ މައްޗަށް ދިވެހިރާއްޖޭގެ ޤާނޫނުލްއުޤޫބާތުގެ 615 ވަނަ މާާއްދާގެ ދަށުން ޢާންމު މަސްލަޙަތަށް ގެއްލުންހުރި ޢަމަލެއް ކުރުމުގެ ކުށުގެ ދަޢުވާއާއި، އެ ޤާނޫނުގެ 533 ވަނަ މާއްދާގެ ދަށުން ދައުލަތުގެ މަސައްކަތްތަކަކަށް ހުރަސް އެޅުމުގެ ކުށުގެ ދަޢުވާ 16 މެއި ގައި ކްރިމިނަލް ކޯޓަށް ހުށައަޅައިފައި ވާކަމަށެވެ.

Advertisement

ރައީސް ޞާލިޙުގެ މޮޓޯކޭޑަށް ހުރަސްއަޅައިފައިވަނީ ހުޅުމާލޭގައި އޮތް ޖަލްސާއެއް ނިންމަވައި ރައީސް ޞާލިޙް ގެކޮޅަށް ވަޑައިގަންނަވަނިކޮށެވެ.

އެމައްސަލާގައި ރައީސްގެ ސެކިޔުރިޓީ ފެއިލްވި ކަމަށް ބުނެ، ޕްރްޒިޑެންޝަލް ގާޑްސްގެ ކޮމާންޑިން އޮފިސަަރަކަށް ހުންނެވި ޢަބްދުﷲ އިބްރާހިމް ވަނީ މަސްއޫލިއްޔަތުން އެކަހެރިކޮށްފައެވެ. ނަަމަވެސް ފަހުން އޭނާގެ އިހުމާލެއް ނެތް ކަމަށް ނިންމައި އޭނާގެ ސަސްޕެންޝަން ވަނީ އުވައިލައިފަައެވެ.