ރައީސުލްޖުމްހޫރިއްޔާ އިބްރާޙީމް މުޙައްމަދު ޞާލިޙް މިއަދު އުކުޅަހަށް ވަޑައިގަންނާނެ ކަމަށް ރައީސް އޮފީހުން ބުނެފިއެވެ.

ރައީސް އޮފީހުގެ ތަރުޖަމާނު މިޢުވާން މުޙައްމަދު ވިދާޅުވީ، ރައީސް މިއަދު މެންދުރުފަހުގެ ވަގުތެއްގައި އއ. އުކުޅަހަށް ރަސްމީ ދަތުފުޅެއް ކުރައްވާނެއެވެ.

އަދި އެމަނިކުފާނުގެ މި ދަތުރުފުޅަކީ ދުނިޔޭގެ ތިމާވެށީގެ ދުވަސް ފާހަގަކުރުމުގެ ގޮތުން އުކުޅަހުގައި އޮންނަ ރަސްމިއްޔާތުގައި ބައިވެރިވެވަޑައިގަތުމަށް ކުރައްވާ ދަތުރުފުޅެއް ކަމަށްވެސް ވިދާޅުވިއެވެ. 

ކޮންމެ އަހަރެއްގެ ވެސް ޖޫން 6 ވަނަ ދުވަހު ފާހަގަ ކުރެވޭ ދުނިޔޭގެ ތިމާވެށީގެ ދުވަސް މި އަހަރު ގައުމީ ފެންވަރުގައި ފާހަގަކުރުމުގެ ހަރަކާތްތައް ކުރިއަށް ގެންދަނީ އުކުޅަހުގައެވެ.

އެގޮތުން، ތިމާވެއްޓާބެހޭ ވުޒާރާ އާއި އުކުޅަސް ކައުންސިލް ގުޅިގެން އެ ރަށުގައި މިދުވަސް ފާހަގަ ކުރުމުގެ ހަރަކާތްތައް މިހާރު ދަނީ ކުރިއަށެވެ. އޭގެތެރެއިން، ރުއް ގަސް އިންދުމުގެ ޕްރޮގްރާމެއް ވަނީ އުކުޅަހުގައި ކުރިއަށް ގެންގޮސްފައެވެ. 

ރައީސް މިއަދު އުކުޅަހަށް ވަޑައިގަންނަވާއިރު، އެމަނިކުފާނު އައްޑޫ ސިޓީއަށް މިމަހު 3 ވަނަ ދުވަހު ފެއްޓެވި ދަތުރުފުޅު ނިންމަވާލެއްވުމަށްފަހު މާލެ ވަޑައިގަތީ މިއަދު މެންދުރުކުރީގެ ވަގުތެއްގައެވެ.