ނުކުޅެދުންތެރިކަން ހުންނަ ފަރާތްތަކަށް ދެވޭ އިނާޔަތް މިމަހުން ފެށިގެން ބޮޑު ވާނެ ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.

އެގޮތުން މިއަދު ރައީސް އޮފީހުގައި ބޭއްވުނު ނޫސްވެރިންގެ ބައްދަލުވުމުގައި ވާހަކަ ދައްކަވަމުން މިއުވާން ވިދާޅުވީ ނުކުޅެދުންތެރިކަން ހުންނަ ފަރާތްތަކުގެ އިނާޔަތް މި މަހުން ފެށިގެން ބޮޑުވާނެ ކަމަށާއި މިކަމުގެ ތަފްސީލީ މައުލޫމާތު އަންނަ ހަފްތާގައި ތެރޭގައި ހިއްސާކުރުމަށް މަސައްކަތް ކުރައްވާނެ ކަމަށެވެ. 

މީގެ ތެރޭގައި މިި އިނާޔަތް ބޮޑު ވެގެން ދާނީ ކިހިނެއްކަމާއި އަދި އިނާޔަތް ބޮޑު ވެގެން ދާއިރު އަންނާނެ ބަދަލުތަކަކީ ކޮބައިކަން އިއުލާން ކުރުމަށް މަސައްކަތް ކުރައްވާނެ ކަމަށް މިއުވާން ވިދާޅުވިއެވެ.

Advertisement

ނުކުޅެދުންތެރިކަން ހުންނަ މީހުންނަށް މިހާރު ދެނީ މަހަކު 2،000 ރުފިޔާގެ އެލަވަންސެކެވެ. އެއީ މާ ކުޑަ މިންވަރެއް ކަމަށް ބުނެ، އެ އެލަވަންސް 5000 ރުފިޔާ އަށް ބޮޑުކޮށްދިނުމަށް، ލޯފަން މީހުންނާ އެކު ރައީސް ސޯލިހު 2021 ވަނަ އަހަރު ބޭއްވެވި ބައްދަލުވުމެއްގައި އެ މީހުންގެ ފަރާތުން ވެސް ވަނީ ރައީސް ސޯލިހަށް ދަންނަވާފަ އެވެ.

އަދި މިއަހަރަށް ރައްޔިތުންގެ މަޖިލިސް ހުޅުވުމަށް ބޭއްވި ޖަލްސާގައި ރިޔާސީ ބަޔާން އިއްވަވަމުން ރައީސް ސޯލިހު ވަނީ ނުކުޅެދުންތެރިކަން ހުންނަ މީހުންނާއި ބެހޭ ގާނޫނުގެ ދަށުން އެކުލަވާލަންޖެހިފައި އޮތް ނުކުޅެދުންތެރިކަން ހުންނަ މީހުންގެ ރަޖިސްޓްރީ އެކުލަވާލައި ނިންމާފައިވާ ކަމަށް ވިދާޅުވެފައެވެ. އަދި ޖޫން މަހުން ފެށިގެން އެމީހުންނަށް ސަރުކާރުން ދޭ އެލަވަންސް ބޮޑުކުރައްވާނެކަމަށްވެސް ރައީސް ޞާލިހު ވަނީ ވިދާޅުވެފައެވެ.

މިއާއިއެކު މި ހަފްތާގެ ހޯމަ ދުވަހު އައްޑޫ ސިޓީއަށް ކުރެއްވި ރަސްމީ ދަތުރުފުޅުުގައި އައްޑޫސިޓީގެ ރައްޔިތުންނާއި އެކު ބޭއްވެވި ރޭގަނޑުގެ ފަރިއްކޮޅުގައި ވާހަކަ ދައްކަވަމުން ރައީސް ޞާލިހު ވަނީ ނުކުޅެދުންތެރިކަން ހުންނަ ފަރާތްތަކުގެ އެލަވަންސް އަށް ހެޔޮބަދަލެެއް ގެނެސް އެކަން ވަރަށް އަވަހަށް އިޢުލާނު ކުރައްވާނެ ކަމަށް ވިދާޅުވެފައެވެ.