ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓޫ ރައީސް އަބްދުالله ޔާމީން އަބްދުލްގައްޔޫމުގެ ޖަލަށް ލައިގެން، އަދުގެ ސަރުކާރުން އެމަނިކުފާނަށް "އަނިޔާކުރާ" ސަބަބުތައް ޕީއެންސީގެ ރައީސް އަބްދުއްރަހީމް އަބްދުالله ހާމަކުރައްވައިފިއެވެ. 

ވ އާރަށް ކުއްޔަށް ދޫކުރުމުގެ މުއާމަލާތާއި ގުޅުވާ ރައީސް ޔާމީންގެ މައްޗަށް ކްރިމިނަލް ކޯޓުން މިދިޔަ ޑިސެމްބަރު މަހުގެ 25 ގައި ކުރި 11 އަހަރުގެ ޖަލުހުކުމް އެމަނިކުފާނު މިހާރު ގެންދަވަނީ ތަންފީޒް ކުރައްވަމުންނެވެ. އެގޮތުން ޖަލުގައި ހުންނަވާތާ މިއަދަށް 900 ދުވަސް ހަމަވާނެއެވެ. 

އެކަމާއި ގުޅިގެން އަދުރޭ ކުރެއްވި ޓްވީޓެއްގައި ވިދާޅުވީ، މި ސަރުކާރުން އެމަނިކުފާނުގެ މައްޗަށް ކޮށްފައިވާ ހުކުމަކީ ހަރާމް ހުކުމެއް ކަމަށެވެ. އަދި އެފަދަ ހުކުމެއް ކުރައްވާފައިވަނީ އެތަކެއް ސަބަބުތަކާއި ހުރެ ކަން ފާހަގަކުރައްވައި އަދުރޭ ވަނީ އެކަންކަން ހާމަކުރައްވާފައެވެ. 

"ރައީސް ޔާމީނަށް މިސަރުކާރުން އަނިޔާކުރަމުން ގެންދަނީ މި ރާއްޖޭގައި ދީނީ މިނިވަންކަންދީ، ރާއްޖޭގެ މިނިވަންކަން ނަގައިލާ، ދައުލަތުގެ ޚަޒާނާ ދަވާލާ، ރާއްޖޭގެ ބިން ބިމާ ކަނޑު ވިއްކާ ހިންގަމުން ގެންދާ ޖަރީމާތަކުގެ ހަގީގަތް ރައީސް ޔާމީން ރައްޔިތުންނާ ހަމައަށް ތިލަކޮށް ދެއްވާ އެ ކަންކަމާ ދެކޮޅަށް ގައުމާ ރައްޔިތުންގެ ހައްގުގައި މަސައްކަތް ކުރައްވާނެކަން ރައީސް ޞާލިހަށް ކަށަވަރުވާތީ އެކަން ހުއްޓުވަން." އަދުރޭ ވިދާޅުވިއެެވެ. 

އަދުރޭ ވިދާޅުވީ، ސަރުކާރުން މަސައްކަތް ކުރިނަމަވެސް، ރައީސް ޔާމީން އަށް ހުރަސް އަޅައި އެމަނިކުފާނުގެ މަސައްކަތްތައް ނުހުއްޓުވޭނެ ކަމަށެވެ. އާދި މާތްاللہގެ ތަނަވަސް ރަޙުމަތްފުޅުން ރައީސް ޔާމީނުގެ އެބުރި ވަޑައިގަތުން އިހުނަށްވުރެ މާ ވަރުގަދަވާނެ ކަމަށްވެސް ވިދާޅުވި އެވެ.

"ދިވެހީންގެ އުންމީދަކީ ރައީސް ޔާމީން" އަދުރޭ ވިދާޅުވިއެެވެ. 

އާރަށު މައްސަލައިގައި ރައީސް ޖަލު ހުކުމް ތަންފީޒް ކުރައްވަމުންދާއިރު އެ މައްސަލައިގެ އިސްތިއުނާފު އިސްތިއުނާފް އަޑުއެހުންތައް މިހާރު ވަނީ ފަށާފައެވެ.

މި މައްސަލަ އެމަނިކުފާނާއި އެއްކޮޅަށް ނިމިއްޖެކަމަށް ވާނަމަ، ޖަލުން މިނިވަންވެ ވަޑައިގެން ސިޔާސީ މަސައްކަތާއި ގުޅިވަޑައިގެންނެވޭނެ އެވެ. އަދި އެއީ ރިޔާސީ އިންތިޚާބަށް ތައްޔާރުވެ، ކެމްޕޭނު ހަރަކާތްތައް ކުރިއަށް ގެންދިއުމަށް އެމަނިކުފާނަށް ލިބިގެންދާނެ ވަރަށް ފަހި ފުރުސަތަކަށް ވެގެންދާނެ އެވެ. 

އާރަށު މައްސަލައިގައި ރައީސް ޔާމިނުގެ މައްޗަށް ކޮށްފައިވަނީ ނުހައްގު ހުކުމެއް ކަމަށާއި، ހައި ކޯޓު މަރުހަލާއިން ރައީސް ޔާމިން މިނިވަންވެ ވަޑައިގަންނަވާނެ ކަމުގެ ފުރިހަމަ ޔަގީންކަން އޮތްކަމަށް އެމަނިކުފާނުގެ އިސް ޤާނޫނީ ވަކީލު ޑރ މުޙައްމަދު ޖަމީލު އަހުމަދު ވަނީ ވިދާޅުވެފަ އެވެ.