ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމު ރައްޔިތުންނަށް ފެންނަން ބޭނުންވީ ކަންކަން ނިންމަވާ ލީޑަރެއްގެ ގޮތުގައި ކަމަށް ކުރީގެ ނައިބު ރައީސް ޑރ މުހައްމަދު ޖަމީލު އަހުމަދު ވިދާޅުވެއްޖެ އެވެ.
އެމަނިކުފާނު މިފަދައިން ވިދާޅުވެފައިވަނީ ރައީސް ޔާމީން ޖަލުގައި ހުންނަވާތާ 900 ދުވަސް ފުރުމާއި ގުޅިގެން ޗެނަލް-13 އިން ގެނެސްދިން ޕްރޮގްރާމެއްގައި ވާހަކަދައްކަވަމުން ނެވެ.
ޑރ ޖަމީލުގެ ވާހަކައިގައި ވަނީ އެމްޑީޕީގެ ދެ ރައީސުންނާއި ރައީސް ޔާމިނާއި ހުރި ތަފާތުތަކަށް އަލިއަޅުވާލައްވާފަ އެވެ.
"މިސާލަކަށް ކުއްލިއަކަށް އެދާގޮތަށް ގޮސް މޫދަށްވެސް ފައިބައިވަޑައިގަންނަވާނެ. އެއީ ރައީސް ނަޝީދު، އެމަނިކުފާނަށް އިޚްތިރާމް"
ކުރީގެ ނައިބުރައީސް ޑރ ޖަމީލު
މިހާރު ވެރިކަމުގައި ހުންނެވި ރައީސް ޞާލިހަކީ ވެސް ތަފާތުގޮތަކަށް ރައްޔިތުންގެ ކުރިމަތީ އެމަނިކުފާނުގެ މަގުބޫލުކަން ދަމަހައްޓަން ބޭނުންވާ ރައީސެއްކަމަށް ޑރ ޖަމީލު ވިދާޅުވި އެވެ.
"އިބްރާހިމް މުޙައްމަދު ޞާލިހުގެ މިޒާޖުގައި މި ހުންނަވަނީ ވެސް ވަރަށް ބޮޑަށް ޕޮލިޝްކޮށްގެން ދެއްކުމުގެ މަސައްކަތްތަކެއް ވަށައިގެން ތިބި ހުރިހާ ބޭފުޅުން މި ކުރައްވަނީ. އެހެންވީމަ ތިބޭފުޅުންނަށް ފެނިވަޑައިގަންނަވާނެ، އެކި ކަހަލަ ޕޯސްތަކުގައި ފޮޓޯ ނަގައިގެން.. ބައެއް ފޮޓޯތައް ބެލީމައި އެބަ އިނގޭ، ފޮޓޯތަކުން މަސައްކަތް ކުރައްވަނީ ވާހަކައެއް ބުނެދޭންކަން. މިސާލަކަށް މިއީ އޮބާމާއޭ"
ކުރީގެ ނައިބުރައީސް ޑރ ޖަމީލު
އެކަން ފާހަގަކުރައްވާ ޑރ ޖަމީލު ވިދާޅުވީ ރައީސް ޔާމިނުގެ ކިބައިގައި އެފަދަ ސިފަތަކެއް ނުހުންނަކަމަށެވެ.
އެގޮތުން އެމަނިކުފާނު މާގިނައިން ފޮޓޯ ނަންގަވާ ނަހައްދަވާ ކަމަށާއި، އަދި އެމަނިކުފާނަކީ ހަމަ ހުންނަވާ ޕަބްލިކްގެ ތެރެއަށް ވަދެ ކޮންމެ ކޮންމެ ކަމެއް ވެސް ކުރައްވާ ބޭފުޅެއް ނޫން ކަމަށެވެ.
އެހެން ނަމަވެސް ރައްޔިތުންގެ ސަމާލުކަން އެމަނިކުފާނު ހޯއްދަވަނީ، އަދި އެމަނިކުފާނު ރައްޔިތުންގެ މެދުގައި މަގުބޫލު ބޭފުޅަކަށް ވެވަޑައިގަންވާ ގޮތަކީ ވައުދުތައް ފުއްދަވައި ދެއްވައިގެން ކަމަށާއި، އެމަނިކުފާނަކީ ރައްޔިތުންނަށްޓަކައި ކަންތައްތަކެއް ކޮށްދެއްވައިގެން މަގުބޫލުކަން ހޯއްދަވަން ބޭނުންފުޅުވެލައްވާ ލީޑަރެއްކަމަށް ޑރ ޖަމީލު ވިދާޅުވި އެވެ.
"އެމަނިކުފާނު މާގިނަ ފޮޓޯތަކެއް އަނެއްހެން ނަންގަވަން މަސައްކަތެއް ނުކުރައްވާ. ނޫނިއްޔާ އެ ދާގޮތަށް ގޮސްލާފަ ހޮޓަލަކަށް ވަދެ މަސްބުރި ރިހައެއްޗެއްގެ ދެރެއަށް އަތް ބާނާފަ އެހެން ނުއެއް ހައްދަވާ. ނުވަތަ އެ ވަޑައިގަންނަވާ ގޮތަށް ވަޑައިގެން މޫދަށް ޖަމްޕެއް ވެސް ނުޖައްސަވާ. އެއާއި ޚިލާފަށް އެމަނިކުފާނު ކުރައްވާފައި ހުރި ކަންތައްތަކުގެ ތެރޭގައި ވަރަށް ބޮޑު އިސްކަމެއް ދެއްވި ހަގީގަތުގައި ލައިފް ބަދަލުކޮށްލުމަށް ރައްޔިތުންގެ.
ކުރީގެ ނައިބުރައީސް ޑރ ޖަމީލު
ޑރ ޖަމީލު ވިދާޅުވީ ރައީސް ޔާމީން މަސައްކަތްޕުޅު ކުރެއްވީ ރައްޔިތުންނަށް ދިމާވެފައިވާ މައްސަލަތައް ޙައްލުކުރެއްވުމަށް ކަމަށެވެ.
ދަރުމަވަންތަ ހޮސްޕިޓަލާއި ހިޔާ ޓަވަރުތަކަކީ ސިއްހީ ނިޒާމާއި ރައްޔިތުންގެ ބޯހިޔާވަހިކަން ޙައްލުކުރުމަށް އެމަނިކުފާނު ކޮށްދެއްވި އަގުހުރި މަސައްކަތްޕުޅުތަކެއް ކަމަށާއި، ރައްޔިތުންގެ މެދުގައި އެމަނިކުފާނު މަގުބޫލުކަން ހޯއްދެވީ އެފަދަ މަޝްރޫއުތައް ހިންގަވައިގެން ކަމަށް ޑރ ޖަމީލު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
