ރ. ފުއްގިރި ކުއްޔަށް ދޫކުރުމުގެ މުއާމަލާތާއި ގުޅުވާ ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓު ރައީސް އަބްދުﷲ ޔާމީން އަބްދުލްގައްޔޫމުގެ މައްޗަށް އުފުލާފައިވާ ދައުވާތަކާއި ގުޅޭ ޝަރީއަތުގެ އަޑުއެހުމަށް މާދަމާ ހެނދުނު 9:00 އަށް ކްރިމިނަލް ކޯޓުގައި ތާވަލުކޮށްފި އެވެ.
މާދަމާގެ އަޑުއެހުމުގައި އޮންނާނީ އެ މައްސަލައިގައި ދައުލަތުން ރައީސް ޔާމިނުގެ މައްޗަށް އުފުލާފައިވާ ދައުވާތައް ސާބިތުކުތުމަށް ހުށައަޅާ ހެކިންގެ ހެކިބަސް ނެގުމެވެ.
ހެކިންގެ ހެކިބަސް ނެގުމަށް ހަމަޖެހިފައިވަނީ ކްރިމިނަލް ކޯޓަށް ހެކިން ހާޒިރުކޮށްގެންނެވެ.
ރ. ފުއްގިރި މައްސަލައިގައި ދައުލަތުން ހުށައަޅާފައިވާ ބައެއް ހެކިތައް ބަލައިނުގަތުމަށް ރައީސް ޔާމީންގެ ފަރާތްޕުޅުން ވަނީ އެދިވަޑައިގެންފަ އެވެ.
އެ ގޮތުން މި މައްސަލައިގައި ދައުލަތުން ހެކީގެ ގޮތުގައި އެމްއެމްޕީއާރުސީގެ ޚިޔާނާތުގެ ކުށް ސާބިތުވެ ހުކުމް ކޮށްފައިވާ ކުރީގެ ނައިބު ރައީސް އަހުމަދު އަދީބާއި، އެމްއެމްޕީއާރުސީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތުގެ ހެކިބަސް ނެގުމަށް ވަނީ ހުށައަޅާފައެވެ.
އެހެން ނަމަވެސް ރައީސް ޔާމިނުގެ ފަރާތްޕުޅުން ވަނީ އެ ހެކިތައް ބަލައިނުގަތުމަށް އެދިފައެވެ.
ނިމިދިޔަ އަޑުއެހުމުގައި އެކަމާއި ގުޅޭގޮތުން ވަނީ ކޯޓުގައި ވާހަކަދައްކާފަ އެވެ.
އެގޮތުން ދައުލަތުން ބުނީ އަދީބާއި ޒިޔަތުގެ ހެކިބަސް މި މައްސަލައިގައި ކޮންމެހެން ބަލައިގަންނަން ޖެހޭ ކަމަށެވެ. އެއީ ރައީސް ޔާމިނުގެ މައްޗަށް އުފުލާފައިވާ ދައުވާތައް ސާބިތުކުތުމަށް އަދީބާއި ޒިޔަތުގެ ހެކިބަސް ނޫން އެހެން އެއްވެސް ކާފީ ހެއްކެއް ނެތްކަމަށް ދައުލަތުން ވަނީ ބުނެފައެވެ.
ހެކިބަހާއި ގުޅޭގޮތުން ރައީސް ޔާމިނުގެ ފަރާތްޕުޅުން އިސް ގާނޫނީ ވަކީލު ޑރ މުހައްމަދު ޖަމީލު އަހުމަދު ވިދާޅުވީ އަދީބަކީ ރައީސް ޔާމިނުގެ އަދާވާތްތެރިއަކަށް ވާއިރު، އަދި އަބީދުގެ މައްޗަށް މިހާރުވެސް ރައީސް ޔާމިން އަވަހާރަކޮށްލުމަށް ބޮމުގެ ހަމަލާއެއް ދިނުމުގައި ބައިވެރިވިކަމުގެ ތުހުމަތު އޮތް އިރު އަދާވާތްތެރިންގެ ހެކިބަސް ބަލައިގަތުމަކީ ޝަރީއަތުގައި ހުއްދަކަމެއް ނޫން ކަމަށެވެ.
އެހެންކަމުން، އެއްވެސް ހާލަތެއްގައި ރައީސް ޔާމިނާއި ދެކޮަޅަށް އަދީބުގެ ހެކިބަސް ބަލައިނުގަނެވޭނެ ކަމަށް ޑރ ޖަމީލު ވިދާޅުވި އެވެ.
އެހެން ނަމަވެސް ގާޒީ ނިންމެވީ އެ ދެމީހުންގެ ހެކިބަސް ވެސް ބަލައިގަތުމަށެވެ. އަދި ހެކި ބަސް ނަގާއިރު، ހެއްކާއި ގުޅޭގޮތުން ވާހަކަދެއްކުމުގެ ފުރުސަތު ދެއްވާނެކަމަށާއި، ހެކި ވަޒަންކުރައްވާނެކަމަށް ކަމަށް ގާޒީ ވަނީ ވިދާޅުވެފަ އެވެ.
ދަށު ކޯޓުގައި ފުއްގިރި މައްސަލަ ކުރިއަށް ދާއިރު، ވ އާރަށުގެ މުއާމަލާތާއި ގުޅުވާ ރައީސް ޔާމިނުގެ މައްޗަށް ކްރިމިނަލް ކޯޓުން ކުރި 11 އަހަރުގެ ޖަލުހުކުމުގެ އިސްތިއުނާފު ވެސް ވަނީ ހައިކޯޓުގައި ފެށިފައެވެ. އަދި މި ހަފްތާތެރޭ، އާރަށު މައްސަލައިގެ އަޑުއެހުމެއް ވެސް ބޭއްވުމަށް ވަނީ ހަމަޖެހިފަ އެވެ.
Advertisement
This content is created and paid for by advertisers and does not involve Voice Journalists
