ކުރީގެ ރައީސް އަދި ޕީޕީއެމްގެ ރިޔާސީ ކެނޑިޑޭޓް އަބްދުالله ޔާމީން އަބްދުލްޤައްޔޫމް ޖަލަށް ލާފައި ވަނީ ސިޔާސީ ބޭނުމަށް  ކަމަށް އެސްޓީއޯގެ ކުރީގެ މެނޭޖިންގ ޑިރެކްޓަރ ހުސެއިން އަމްރު ވިދާޅުވެއްޖެއެވެ.

އަމްރު މިހެން ވިދާޅުވީ، ފުއްގިރީގެ މައްސަލައިގެ އަޑުއެހުން ތާވަލު ކުރުމާ ގުޅިގެންނެވެ.

އަމްރު ވިދާޅުވީ ސިޔާސީ ބޭނުމަށް އެއްވެސް މީހަކު ޖަލުގައި ބަހައްޓައިގެން ނުވާނެ ކަމަށާއި އަދި އިންތިޚާބުގައި ވާދަ ނުކުރެވޭނެ ގޮތް ވެސް ހަދައިގެން ނުވާނެ ކަމަށެވެ.

"ރައީސް ޔާމީން ޖަލުގަ ބަހައްޓަނީ ސިޔާސީ ބޭނުމަށް. މިކަމަކީ އެމްޑީޕީއިން 2018 ގަ ވީ ވައުދާ އަދި އެމްޑީޕީގެ އަސާސްތަކާ ޚިލާފުކަމެއް." އަމްރު ވިދާޅުވިއެވެ.

ރ. ފުއްގިރި ކުއްޔަށް ދޫކުރުމުގެ މުއާމަލާތާއި ގުޅުވާ ޔާމީނުގެ މައްޗަށް އުފުލާފައިވާ ދައުވާތަކާއި ގުޅޭ ޝަރީއަތުގެ އަޑުއެހުމަށް އޮތީ މިއަދު ހެނދުނު 9:00 ގައި ކްރިމިނަލް ކޯޓުގައެވެ.

ދަށު ކޯޓުގައި ފުއްގިރި މައްސަލަ ކުރިއަށް ދާއިރު، ވ އާރަށުގެ މުއާމަލާތާއި ގުޅުވާ ރައީސް ޔާމިނުގެ މައްޗަށް ކްރިމިނަލް ކޯޓުން ކުރި 11 އަހަރުގެ ޖަލުހުކުމުގެ އިސްތިއުނާފު ވެސް ވަނީ ހައިކޯޓުގައި ފެށިފައެވެ. އަދި މި ހަފްތާތެރޭ، އާރަށު މައްސަލައިގެ އިސްތިއުނާފު އަޑުއެހުމެއް ވެސް ބޭއްވުމަށް ވަނީ ހަމަޖެހިފަ އެވެ.