ރ. ފުއްގިރި ކުއްޔަށް ދޫކުރުމުގެ މުއާމަލާތާއި ގުޅުވާ ކުރީގެ ރައީސް އަބްދުالله ޔާމީން އަބްދުލްގައްޔޫމުގެ މައްޗަށް އުފުލާފައިވާ ދައުވާތަކާއި ގުޅިގެން އެމްއެމްޕީއާރުސީގެ ޚިޔާނާތުގެ ކުށް ސާބިތުވެފައިވާ ކުރީގެ ނައިބު ރައީސް އަހުމަދު އަދީބުގެ ހެކިބަސް ނަގައިފި އެވެ.
އެ މައްސަލައިގައި އަދީބުގެ ހެކިބަސް ނެގުމަށް ހުށައެޅި ހިސާބުން، ރައީސް ޔާމިނުގެ ފަރާތްޕުޅުން ވަނީ އަދީބުގެ ހެކިބަސް ބަލައިނުގަތުމަށް އެދިވަޑައިގެންފަ އެވެ. ސަބަބެއް ކަމުގައި ވިދާޅުވެފައިވަނީ އަދީބަކީ ރައީސް ޔާމިނުގެ އަދާވާތްތެރިއަކަށް ވުމެވެ.
އަދީބަކީ ރައީސް ޔާމީން އަވަހާރަކޮށްލުމަށް، އެމަނިކުފާނު ދަތުރުކުރައްވަމުން ގެންދެވި ރިޔާސީ ލޯންޗުކޮޅު ގޮއްވާލުމުގައި ބައިވެރިވިކަމުގެ ތުހުމަތު މިހާރު ވެސް އޮތް ފަރާތެކެވެ.
އިއްޔެގެ އަޑުއެހުމުގައި ދިފާއަށް ސުވާލުކުރަން ލިބުނު ފުރުސަތުގައި ރައީސް ޔާމިނު ވަނީ އަމިއްލަފުޅަށް އަދީބާއި ސުވާލުކުރައްވާފަ އެވެ.
އަދީބަކީ ދައުލަތާއެކު އިއުތިރާފުގެ އެއްބަސްވުމެއް ހަދާފައިވާ ފަރާތަކަށް ވެފައި، އެ އެއްބަސްވުމަށްފަހު އަދީބުގެ ޖަލު ހުކުމް ގޭގައި ތަންފީޒުކުރެވޭގޮތަށް އޭނާ ގެއަށް ވަނީ ބަދަލުކޮށްދީފަ އެވެ.
އެކަމަށް އީޝާރާތްކުރައްވާ ރައީސް ޔާމިނު ވަނީ ވަކި ގޮތަކަށް ހެކިބަސް ދިނުމުން އަދީބަށް ލިބޭނެ މަންފާއެއް ނެތްކަމަށް ވިދާޅުވާއިރު، ދައުލަތުން ބޭނުން ނުވާގޮތަށް ހެކިބަސް ދީފި ނަމަ ގޭބަންދު ނިމުމަކަށް އަންނާނެ ތޯ ސުވާލު ކުރައްވާފަ އެވެ.
އޭގެ އިތުރުން ފިނިފެންމާ ލޯންޗު ކޮޅު ގޮއްވާލި މައްސަލައިގައި ދައުވާނުކޮށް އޮތީ ދައުލަތާއި އެކު ހެދި އެއްބަސްވުމުގެ ދަށުންތޯ ރައީސް ޔާމިނު އަދީބާއި ސުވާލުކުރެއްވި އެވެ.
އަދީބު ވިދާޅުވީ އެފަދަ އެއްވެސް ކަމެއް އެ އެއްބަސްވުމުގައި ނެތް ކަމަށެވެ. އެހެން ނަމަވެސް، އެ އެއްބަސްވުމުގައި ދައުލަތަށް އެއްބާރުލުން ދިނުމުގެ ބަދަލެއްގެ ގޮތުން އަދީބަށް ކުރެވޭ ޓެޓަރިޒަމްގެ ދައުވާތައް ނުކުރުމަށް އެއްބަސްވެފައިވާކަން ޤާނޫނީ ވަކީލުން މީގެކުރިން ވަނީ ފާހަގަކުރައްވާފަ އެވެ.
ރައީސް ޔާމިނު އެމަނިކުފާނުގެ އާއިލާއާއި، ސަރުކާރުގެ އިސް ބައެއް ބޭފުޅުންނާއެކު ދަތުރުކުރައްވަމުން ގެންދެވި ފިނިފެންމާ ލޯންޗުކޮޅު ގޮއްވާލުމުގައި ބައިވެރިވިކަމުގެ ކުށް ސާބިތުވެ އަދީބުގެ މައްޗަށް ވަނީ 15 އަހަރުގެ ޖަލު ހުކުމެއް ކޮށްފަ އެވެ. އެހެން ނަމަވެސް އެ މައްސަލަ އަލުން ބަލަން އަންގާ ހައިކޯޓުން ވަނީ އެ ހުކުމް ބާތިލުކޮށްފަ އެވެ.
އެ މައްސަލައާއި ގުޅޭގޮތުން ރައީސް ޔާމީންގެ ފަރާތްޕުޅުން ގާނޫނީ ވަކީލު ޝަމީމު ވަނީ ސުވާލުކުރައްވާފަ އެވެ. ޝަމީމުގެ ސުވާލަށް ޖަވާބުދެއްވަމުން އަދީބު ވިދާޅުވީ އެ މައްސަލައިގައި އޭނާގެ މައްޗަށް ދައުވާ ކުރީ "ފްރޭމް" ކުރަމުން ކަމަށެވެ.
އެފަހުން ވަކީލު ވަނީ އަދީބު ފްރޭމް ކުރީ ކޮން ފަރާތަކުން ތޯ ސުވާލުކޮށްފަ އެވެ. އަދީބު ވިދާޅުވީ އޭނާއަށް ގަބޫލުކުރެވޭ ގޮތުގއި އޭނާ ފްރޭމްކުރީ ސަރުކާރުގެ ވަރަށް މަތީ ބޭފުޅުންތަކެއް ކަމަށް އޭނާ ވިދާޅުވި އެވެ.
އަދީބުގެ އެ ޖަވާބާއި ގުޅިގެން ވަކީލު ވަނީ އަދީބު ފްރޭމު ކުރީ ރައީސް ޔާމިނު ތޯ އައްސަވާފަ އެވެ. އަދި ރައީސް ޔާމިނު އެފަދަ ކަމެއް ކުރައްވާނެކަމަށް އަދީބު ގަބޫލުފުޅު ކުރައްވަން ތޯ ވެސް ވަނީ ސުވާލުކުރައްވާފަ އެވެ.
އެ ސުވާލަށް ޖަވާބުދެއްވަމުން އަދީބު ވިދާޅުވީ ރައީސް ޔާމީން އޭނާ ފްރޭމް ކުރުމަށް އެއްވެސް ކަމެއް ކުރައްވާނެކަމަށް ގަބޫލު ނުކުރައްވާކަމަށެވެ.
އިއްޔެގެ އަޑުއެހުމުގައި ދިފާއުން އަދީބަށް ކުރި ގިނަ ސުވާލުތަކަށް އޭނާއަށް ޖަވާބުދެވިފައެއް ނުވެއެވެ.
އިއްޔެގެ އަޑުއެހުމުގައި ދިފާއުން މައިގަނޑު ގޮތެއްގައި މަސައްކަތް ކުރައްވާފައިވަނީ އަދީބުގެ އަދުލުވެރި ކަމެއް ނެތްކަން ހާމަކުރުމަށެެވެ. އަދި އޭނާ އަކީ ރައީސް ޔާމިނާއި އަދާވާތްތެރިކަމެއް އޮންނާނެ ފަރާތެއްކަން ހާމަކޮށްދިނުމަށެވެ.
Advertisement
This content is created and paid for by advertisers and does not involve Voice Journalists
