ރ. ފުއްގިރި ކުއްޔަށް ދޫކުރުމުގެ މުއާމަލާތާއި ގުޅިގެން ކުރީގެ ރައީސް އަބްދުالله ޔާމީން އަބްދުލްގައްޔޫމުގެ މައްޗަށް އުފުލާފައިވާ ދައުވާތަކާއި ގުޅޭ ޝަރީއަތުގެ އަޑުއެހުމެއް ބާއްވައިފި އެވެ. 

މިއަދުގެ އަޑުއެހުމުގައި އެންމެ ފުރަތަމަ ގެންގޮސްފައިވަނީ އަންގާރަ ދުވަހުގެ އަޑުއެހުމުގައި ހެކިބަސް ނަގަން ފެށި ފުލުހުންގެ ޚިދުމަތުގެ ޑިޖިޓަލް އެވިޑެންސް އެގްޒަމިނަރެއްގެ ގޮތުގައި މަސައްކަތް ކުރައްވަމުން ގެންދަވާ އަބްދުالله ޝިފާޒުގެ ހެކިބަހުގެ ބާކީބައި ނެގުމެވެ. 

އަންގާރަ ދުވަހުގެ އަޑުއެހުމުގައި ދައުލަތުން ވަނީ ޝިޒާފާއި ސުވާލުކޮށްފަ އެވެ. މިއަދުގެ އަޑުއެހުމުގައި ކުރިއަށް ގެންދިޔައީ ދިފާއުގެ ފަރާތުން ކުރާ ސުވާލުތައް ކުރުމެވެ. ނުވަތަ ކްރޮސް އެގްޒަމިން ކުރުމެވެ. 

ޝިފާޒުގެ ހެކިބަސް ނަގަނީ މި މައްސަލައާއި ގުޅިގެން ހުށައަޅާފައިވާ މޯބައިލް ފޮރެންސިކް ރިޕޯޓާއި ގުޅިގެންނެވެ.

ހެކިވެރިޔާ ތަހުލީލުކޮށްފައިވާ ފޯނަކީ އެމްއެމްޕީއާރުސީގެ ޚިޔާނާތުގެ ކުށް ސާބިތުވެފައިވާ ކުރީގެ ނައިބުރައީސް އަހުމަދު އަދީބުގެ ފޯނަކާއި، ފޯނުގައި ހިމެނޭ ޑޭޓާތައް ހުރި ޕެންޑްރައިވެކެވެ. 

ޝިފާޒުގެ ހެކިބަހަށް ފަހު މިއަދުގެ އަޑުއެހުމުގައި ވަނީ މި މައްސަލައިގައި ދައުވާ އުފުލާފައިވާ އަހުމަދު ކުރިކް ރިޒާގެ ފިންގަޕްރިންޓް އެނާލިސިސް ރިޕޯޓަކާއި ގުޅިގެން ހެކިބަސް ނެގުމެވެ. 

އެ ރިޕޯޓާއި ގުޅިގެން ހެކިބަސް ނަގާފައިވަނީ ދިވެހިންގެ ފުލުހުންގެ ޚިދުމަތުން ތައްޔާރުކޮށްފައިވާ އެ ރިޕޯޓާއި ގުޅިގެން ޚަބީރެއްގެ ގޮތުގައި ހާޒިރުކުރި ފަރާތެއްގެ ހެކިބަހެވެ. 

9:00 ގައި ފެށި އަޑުއެހުން މިއަދު ވަނީ 12:15 ހާއިރު ނިންމާލާފަ އެވެ. 

މިއަދުގެ ޝަރީއަތް ކުރުކޮށްލާފައިވަނީ، ރައީސް ޔާމީންގެ އުނަގަނޑުގެ އާލާސްކަންފުޅަށް ބެއްލެވުމެއް ނެތި 13 ގަޑިއިރުގެ ޝަރީއަތުގެ އަޑުއެހުމެއް ކްރިމިނަލް ކޯޓުގައި ތާވަލުކުރުމާއި ގުޅިގެން އިދިކޮޅު ކޯލިޝަނާއި، އެމަނިކުފާނުގެ ސަޕޯޓަރުން ކަންބޮޑުވުން ފާޅުކޮށް، ރައީސް ޔާމިނަށް ޤާނޫނު އަސާސީން ލިއްބައިދޭ އިންސާނީ ހައްޤުތައް ކަށަވަރުކޮށްދިނުމަށް ގޮވާލާފައިވާ ދަނޑިވަޅެއްގަ އެވެ.