ރަސްފަންނާއި ދިމާ، ކަނޑުމަތީގައި ޚަބަރު ހުސްވެފައި އޮތް މީހަކު ފުލުހުންގެ އެހީތެރިކަމާއި އެކު ސަލާމަތްކޮށްފި އެވެ. 

މިކަމާއި ގުޅިގެން ފުލުހުންގެ މީޑިއާ އޮފިޝަލް "ވޮއިސް" އަށް މައުލޫމާތު ދެއްވަމުން ވިދާޅުވީ، ރަސްފަންނާއި ދިމާ ކަނޑުމަތީގައި އިއްޔެ ހަވީރު ގާތްގަނޑަކަށް 16:44 ހާއިރު ޚަބަރު ހުސްވެފައި އޮތް މީހަކު، ފުލުހުންގެ އެހީތެރިކަމާއި އެކު ލޯންޗަކަށް ނަގާފައިވާ ކަމަށެވެ. 

އަދި ނެގުމަށްފަހު އެމީހާ އައިޖީއެމްއެޗްއަށް ގެންދެވިފައިވާ ކަމަށްވެސް ވިދާޅުވި އެވެ. 

ފުލުހުންގެ އެހީގައި ސަލާމަތް ކޮށް ހޮސްޕިޓަލަށް ގެންގޮސްފައި މީހަކު އުމުރުން 24 އަހަރުގެ ދިވެހި ފިރިހެނެއް ކަމަށްވެސް މީޑިއާ އޮފިޝަލް ވިދާޅުވި އެވެ. 

މި ހާދިސާއާއި ގުޅޭ ވީޑިއޯ މީސްމީޑިއާގައި އާއްމު ވެފައިވާ އިރު، އެ މީހާ ސަލާމަތްކުރުމުގައި ފުލުހެއްގެ އިތުރުން އާއްމު ދެމީހެއްވެސް އުޅެއެވެ. އަދި އެތަނުގައި އޮތް ލޯންޗަށް އެމީހާ އެރުވުމަށްޓަކައި ފުލުސް މީހާ ފިޔަވައި ދެން ތިބި ދެމީހުން ލޯންޗަށް އަރައެވެ. 

އެއަށްފަހު ފުލުސް މީހާ މޫދުގައި އޮވެގެން އެ މީހާ ލޯންޗަށް އެރުވުމުގެ މަސައްކަތް ކުރެއެވެ.