ޗައިނާ އެމްބަސީ ފާރަށް ސްޕްރޭ ކުރި މީހަކު ޖަލަށްލާން ކްރިމިނަލް ކޯޓުން އަމުރުކޮށްފިއެވެ.
މި މައްސަލައިގައި ޖަލު އަމުރު ނެރެފައި ވަނީ ށ. ފޭދޫ، މިނިވަން އަސްސޭރި، މުހައްމަދު އަނީލްގެ މައްޗަށެވެ.
އިއްޔެ ކްރިމިނަލް ކޯޓުން ކުރި އަމުރެއްގައި ވަނީ، މާރޗް މަހުގެ 26 ވަނަ ދުވަހުގެ އިރުއޮއްސުނު އަނީލް ޗައިނާ އެމްބަސީ ފާރުގައި ނޫކުލައިގެ ސްޕްރޭ ފުޅިއަކުން ސްޕްރޭކޮށް، ފާރަށް ގެއްލުން ދީފައިވާ ކަމަށެވެ.
އެ މައްސަލައިގައި އަނީލް ވަނީ ކުށަށް އިއުތިރާފު ވެފައެވެ. އަދި އެކަން ކުރީ މުހައްމަދު ކިޔާ މީހަކު ބުނި ބުނުމަކަށް ކަމަށް އަނީލް ކޯޓުގައި ބުންޏެވެ.
މި މައްސަލައިގެ އަދަބެއްގެ ގޮތުން ކްރިމިނަލް ކޯޓުން ހުކުމް އިއްވީ އަނީލް 27 ދުވަހަށް ޖަލަށް ލާށެވެ. ނަމަވެސް މައްސަލައިގެ ބަންދުގައި އަނީލް 15 ދުވަހު ގޭބަންދުގައި ހުރެފައި ވާތީ، ހުކުމުން އެ މުއްދަތު އުނިކޮށް، ކޯޓުން އޭނާގެ މައްޗަށް އިއްވާފައި ވަނީ 12 ދުވަހުގެ ޖަލު އަދަބެކެވެ.
އެ އަދަބު ޖޫރިމަނާއަކަށް ބަދަލު ކޮށްދޭން އަނީލް ވަނީ ކޯޓުގައި އެދިފައެވެ. ނަަމަވެސް އާމްދަނީ ލިބޭކަން ސާބިތުވާ ލިޔުމެއް ނުވަތަ އާއިލާގެ ފަރާތުން ޖޫރިމަނާ ދައްކާދޭ ހާލަތުގައިި އެކަމާ ގުޅޭ ލިޔުން ހުށަހަޅާފައި ނުވާތީ ކޯޓުން ނިންމީ އަނީލްއަށް ޖަލު އަދަބު ދިނުމަށެވެ.
Advertisement
This content is created and paid for by advertisers and does not involve Voice Journalists
