އާމްދަނީއިން ނަގާ ޓެކްސް ބަޔާން ހުށައަޅަންޖެހޭ ސުންގަޑި މިރާ އިން ފަސްކޮށްފިއެވެ.

2022 ވަނަ އަހަރަށް ހުށަހަޅަންޖެހޭ އާމްދަނީން ނަގާ ޓެކްސް ބަޔާން ހުށަހަޅައި ފައިސާ ދެއްކުމުގެ ސުންގަޑި ފަސްކޮށްފައިވަނީ 9 ޖުލައި 2023 އާއި ހަމައަށެވެ.
ސުންގަޑި ފަސްކޮށްދީފައި ވަނީ މި ހިނގާ ޖޫން މަހުގެ ފަހު ހަފްތާ ޢީދު ޗުއްޓީއާ ދިމާވާތީ، 2022 ވަނަ އަހަރަށް ހުށަހަޅަންޖެހޭ އާމްދަނީން ނަގާ ޓެކްސް ބަޔާނާއި އެ ބަޔާނާއެކީ ހުށަހަޅަންޖެހޭ މާލީ ހިސާބުތައް ތައްޔާރުކޮށް ސުންގަޑިއަށް ހުށަހެޅުމަށް އިތުރު ވަގުތު ދިނުމަށް މީރާއިން ވަނީ ބުނެފަ އެވެ.

އާމްދަނީން ނަގާ ޓެކްސްގެ ސުންގަޑިއަށް ބަދަލުގެނެސްފައި ވި ނަމަވެސް، 2 ޖުލައި 2023 ގައި އަންނަ އެހެން އެއްވެސް ސުންގަޑިއަކަށް ބަދަލުގެނެސްފައި ނުވާކަން މީރާއިން ފާހަގަކުރެއެވެ.

Advertisement

އެހެންކަމުން، ކުރިއެކޭ ވެސް އެއްފަދައިން، މޭ 2023 ގެ ޖީއެސްޓީ ބަޔާން ހުށަހަޅައި ފައިސާ ދެއްކުން، މޭ 2023 ގެ ގްރީން ޓެކްސް ބަޔާން ހުށަހަޅައި ފައިސާ ދެއްކުން، މޭ 2023 ގެ އެއަރޕޯރޓް ޓެކުހާއި ފީގެ ބަޔާން ހުށަހަޅައި ފައިސާ ދެއްކުން އަދި 2023 ވަނަ އަހަރުގެ 3 ވަނަ ކުއާރޓަރުގެ ޓޫރިޒަމް ލޭންޑް ރެންޓް ދެއްކުމުގެ ސުންގަޑިއަކީ 2 ޖުލައި 2023އެވެ.