ކުރީގެ ރައީސް އަދި އިދިކޮޅު ރިޔާސީ ކެންޑިޑޭޓް ރައީސް އަބްދުالله ޔާމީން އަބްދުލްގައްޔޫމް ގެ ވެރިކަމެއްގައި އެންމެ އިސްކަމެއް ދެއްވާނެ އެއް ކަމަކީ މަސްވެރިން ބާނާ މަހަށް ހަމަ އަގު ހޯދައިދިނުމަށް ކަމަށް، އެމަނިކުފާނުގެ ކެމްޕެއިން މެނޭޖަރ ކެޕްޓަން މުހައްމަދު އަމީން ވިދާޅުވެއްޖެއެވެ.
ޕީޕީއެމްގެ ކެމްޕެއިން މެނޭޖަރ ގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އަމީން ވަނީ ރައީސް ޔާމީންގެ ވެރިކަމުގެ ފަސް އަހަރު ތެރޭގައި ކުރިއަށް ގެންދެވުނު ބިޔަ މަޝްރޫއުތަކަށް އަލި އަޅުއްްވާލައްްވާފައެވެ.
އަދި ކުރިއަށް އޮތް ރިޔާސީ އިންތިހާބު ކާމިޔާބު ކުރައްވައި ވެރިކަމަށް ވަޑައިގެން އެމަނިކުފާނު އެންމެ އިސްކަމެއް ދެއްވާނެ ތިން ކަމެއްވެސް އަމީން ފާހަގަކުރެއްވި އެވެ.
ޒުވާނުން ބިނާކޮށް، ވަޒީފާތަކަށް ނެރުއްވުމާއި، އަންހެނުން އެމްޕަވަރކޮށް، އެކަނބަލުންނަށް ގެއްލިފައިވާ އިގްތިސާދީ އަދި އިޖުތިމާއީ ދައުރު ފުޅާ ކުރުމާއި، މަސްވެރިކަމުގެ ސިނާއަތު ތަރައްގީކޮށް ބާނާ މަސް ފްރެޝްކޮށް، ދުނިޔޭގެ ބާޒާރަށް ނެރެ، އެއަށް ހަމަ އަގު މަސްވެރިންނަށް ލިބޭ ގޮތަށް ހަމަޖެއްސުން މިއީ މި އަހަރުގެ ކެންޕެއިންގެ އަޅުގަނޑުމެން ގެންގުޅޭނެ އެންމެ ފުރަތަަމަ އިސްކަމެއް ދޭނެ ތިން ކަންތައް
މުހައްމަދު އަމީން
މިއާއެކު އަމީން ވަނީ ދިވެހިރާއްޖޭގެ އަދުގެ ހާލަތަށް އަލި އަޅުއްވާ ލައްވައި ވާހަކަ ދައްކަވާފައެވެ. އެގޮތުން ވިދާޅުވީ، ބޭރު ގައުމުގެ ނުފޫޒު އިންތިހާއަށް ރާއްޖެއަށް އޮތް އިރު، ދިވެހިންގެ އަގީދާ ބަލިކަށި ކުރުމަށް ބޭރުގެ ދާއީންނަށް ބޮޑު އަގު ދީގެން ރާއްޖެއާ ރާއްޖެއިން ބޭރުގައިވެސް މަސައްކަތް ކުރަމުންދާ ކަން އޭނާ ފާހަގަކުރެއްވިއެވެ.
މީގެ އިތުރުން ވެސް ރާއްޖޭގެ ކަނޑުން ބައެއް ގެއްލުވާލައި، ގޮތް ނޭނގޭ އެއްބަސްވުންތަކެއްގެ ނިވަލުގައި ގައުމުގެ ތަންތަން ބޭރުގެ ފަރާތްތަކަށް ދޫކޮށްފައިވާ ކަން ވެސް އަމީން ފާހަގަކުރެއްވި އެވެ.
ހަމައެހެންމެ، މިއިން ދުވަހަކުވެސް ގައުމު ދަރަނިވެރިވެފައިވާއިރު, ފައިސާ ޗާޕުކުރާ މިންވަރުވެސް ދުވަހުން ދުވަހަށް އިތުރުވަމުން އަންނަ ކަމަށް އަމީން ވިދާޅުވި އެވެ. މީގެ އިތުރުން ޓެކްސް ބޮޑު ކުރުމުގެ ސަބަބުން ކުދި ވިޔަފާރިތަކާއި އާންމު ރައްޔިތުންނަށްވެސް ގެއްލުންތަކެއް ވެފައިވާ ކަމަށް އަމީން ފާހަގަކުރެއްވި އެވެ.
އެހެންކަމުން، ކުރިއަށް އޮތް ރިޔާސީ އިންތިޚާބަކީ، ދިވެހިންގެ މިނިވަންކަން ދިވެހިންނަށް ހޯދައިދޭނެ އިންތިޚާބަކަށް ވާނެ ކަމަށް ރައީސް ޔާމީން ދެކެވަޑައިގަންނަވާ ކަމަށް އަމީން ވިދާޅުވި އެވެ.
"ރައީސް ޔާމީން ދެކެވަޑައިގަންނަވާ ގޮތުގައި 2023 ވާނީ ގައުމު އަނބުރާ ހޯދުމަށް ބޭއްވޭ އިންތިޚާބަކަށް. ދިވެހި ގައުމުގެ ފުރިހަމަ ސިޔާދަތު ދިވެހިންނަށް ހޯދުމަށް ބޭއްވޭ އިންތިޚާބަކަށް. ބޭރުގެ ސިފައިން މި ގައުމުގައި ދާއިމީ ގޮތެއްގައި ތިބޭ ތިބުމަށް ސިއްކަ ޖެހިގެން ދާނެ އިންތިހާބަކަށް. ގެއްލުވާލި ކަނޑު އަލުން ހޯދުމަށް ބޭއްވޭ އިންތިޚާބަކަށް."
"އެހެންކަމުން ދިވެހި އެންމެހާ ރައްޔިތުންނަށް ދޭ މެސެޖަކީ، ޚިޔާލު ތަފާތުވެ، ސިޔާސީ ގޮތުން ފިކުރު އެއްގޮތް ނުވިޔަސް، ގައުމުގެ ދިފާއުގައި ތެދުވެ، ހުއްބުލް ވަތަނުގެ ރޫހުގައި، މިގައުމުގެ މިނިވަންކަމާއި ސިޔާދަތާއި މާތް ވެގެންވާ އިސްލާމްދީން ނެގެހެއްޓުމަށްޓަކާ ޕީޕީއެމަށް ވޯޓު ދެއްވުމަށް." އަމީން ވިދާޅުވި އެވެ.
އަމީން ވިދާޅުވީ، ރައީސް ޔާމީން ފިޔަވައި މި ގައުމުގެ ދިފާއުގައި މަސައްކަތް ކުރާނެ ހިތްވަރު ހުރި ކެންޑިޑޭޓެއް ނެތް ކަމަށެވެ. އަދި އެމަނިކުފާނު ކުރިއަށް އޮތް ރިޔާސީ އިންތިހާބުގައި ބައިވެރިވެވަޑައިގެން އެ އިންތިހާބު ކާމިޔާބު ވެސް ކުރައްވާނެ ކަމަށެވެ.
Advertisement
This content is created and paid for by advertisers and does not involve Voice Journalists
