މުވައްޒަފުންނަށް ލުއިފަސޭހަ މާހައުލެއްގައި މަސައްކަތްކުރުމަށް މަގުފަހިކޮށްދިނުމުގެ ގޮތުން, މަސައްކަތް ކުރާގަޑީގައި މުވައްޒަފުންގެ ކުދިން އިދާރާގައި ބައިތިއްބާނެ ޑޭކެއަރ އެއް ހުރާ ކައުންސިލުގައި ގާއިމްކޮށް އެ ތަން ހުޅުވައިފި އެވެ. 

"ދޮންދޫނި ބަގީޗާ" ގެ ނަމުގައި ހުޅުވުނު މި ޑޭކެއަރ ހުޅުވައިދެއްވީ ހުރާ ސްކޫލްގެ ޕްރިންސިޕަލް އަލްފާޟިލާ އާމިނަތު އަރީޝާއެވެ.

ހުރާ ކައުންސިލްގެ ޑޭ ކެއާ ހުޅުވުމުގެ ރަސްމިއްޔާތުގެ ތެރެއިން--ފޮޓޯ/ ހުރާ ކައުންސިލް

ކައުންސިލްގައި މިފަދަ ޑޭ ކެއާ އެއް ހުޅުވަން ނިންމި ނިންމުމާއި ގުޅިގެން "ވޮއިސް" އަށް މައުލޫމާތު ދެއްވަމުން ހުރާ ކައުންސިލްގެ މެންބަރު، ޔުސްރިއްޔާ ރަޝީދު ވިދާޅުވީ، އެ ކައުންސިލްގައި ވަޒީފާ އަދާ ކުރާ ގިނަ މުވައްޒަފުންނަކީ އަންހެން މުވައްޒަފުން ކަމަށެވެ. އަދި ކައުންސިލްގެ ގިނަ މުވައްޒަފުންގެ ދަރިން ވެސް ތިބޭ އިރު، ދަރިން ގޭގައި ބައިތިއްބާފައި ވަޒީފާއަށް އައިސް ވަޒީފާ އަދާކުރުމަށް ގިނަ ގޮންޖެހުންތަކާއި ކުރިމަތިލާން ޖެހޭ ކަމަށެވެ. އެ ސަބަބާއި ހުރެ، ޚާއްސަކޮށް ވަރަށް ރަނގަޅު އަންހެން މުވައްޒަފުން ވެސް ވަޒީފާއިން ވަކިވާންޖެހޭ ހާލަތްތައް އައިސްފައިވާ ކަމަށެވެ. 

"އަދި މީގެ އިތުރުންވެސް، ރަސްމީ ގަޑި ނޫން ގަޑި ތަކުގައި ބާއްވާ ބައްދަލުވުން ތަކާއި، ރައްޔިތުންނާއި އެކު ބޭއްވޭ ބައްދަލުވުންތަކުގައިވެސް މުވައްޒަފުން ދަރިން ގޮވައިގެން އަންނަންޖެހޭ ފަހަރުތައް އާދޭ. އެފަދަ ފަހަރު ތަކުގައިވެސް ކުއްޖާ ކައިރީގައި ނުބައިންދާ ދުރުގައި ބައިންދަންޖެހެނީ. ދެން އެގޮތަށްވެސް އުނދަގޫތައް ހުރޭއެބަ. ޑޭ ކެއަރ ހުޅުވުމުން ޑޭ ކެއާރ ގައި، ކުއްޖާ އަށް އެބަ އިދެވޭ. ކުދިންނާ ގުޅޭ މާހައުލެއްގައި." ޔުސްރިއްޔާ ވިދާޅުވި އެވެ. 

މީގެ އިތުރުން ޔުސްރިއްޔާ ވިދާޅުވީ، އެ މަސައްކަތަކީ ހުރިހާ މުވައްޒަފުންގެ ވެސް ވަރަށް ބޮޑު އެއްބާރުލުމަކާއި އެކުގައި ކުރެވިގެން ދިޔަ މަސައްކަތެއް ކަމަށެވެ. އަދި ކޮންމެ އުމުރެއްގެ ކުއްޖެއް ނަމަވެސް، އަދި އަންހެން ނުވަތަ ފިރިހެން މުވައްޒަފެއްގެ ދަރިއެއް ނަމަވެސް އެ ޑޭ ކެއާރަ ގައި ބެހެއްޓޭނެ ކަމަށް އެނާ ވިދާޅުވި އެވެ. އަދި އެ ކުދިން އެތަނުގައި ތިބޭ ވަގުތު ތަކުގައި، ތިބޭނީ ސަޕޯޓް ސްޓާފުންގެ ބެލުމުގެ ދަށުގައި ކަމަށްވެސް ވިދާޅުވި އެވެ. އަދި މިބޑޭ ކެއާރ ގައި، ކުދިން ގަޔާވާފަދަ ކުޅޭ ތަކެއްޗާއި، ލިޔެ، ފެން ކުލަ ޖައްސާ ހެދުން ފަދަ ކަންކަންވެސް ކުރެވޭނެ ކަމަށް ވިދާޅުވި އެވެ. 

މި ޑޭކެއަރ އަށް ފައިސާގެ އެހީތެރިކަން ފޯރުކޮށްދެއްވި އަލްފާޟިލާ ނަދީމާ އަޙްމަދު އަދި ޑެކަރޭޝަންގައި އެހީތެރި ވެދެއްވި ޢާއިޝަތު ސުމާއަށް ހުރާ ކައުންސިލްގެ ނަމުގައި ވަރަށް ޙާއްސަ ޝުކުރެއް އެ ކައުންސިލުން ވަނީ އަދާކޮށްފައެވެ.