ވުޖޫދުގައި ނުވެސް ނެތް ކަންކަމާ ގުޅުވައިގެންވެސް ކަލަގޮވުން ނޫންކަމެއް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މި ސަރުކާރުން ނުކުރާ ކަމަށް އުނގޫފާރު ދާއިރާގެ މެންބަރު މުހައްމަދު ވަހީދު ވިދާޅުވެއްޖެއެވެ.
މާލޭން ހިލޭ ގޯތި ލިބޭ މީހުންގެ ވަގުތީ ލިސްޓް އިއްޔެ ސަރުކާރުން ވަނި އާންމު ކޮށްފައެވެ. އެއާއިއެކު ސަރުކާރަށް ތާއީދުކުރާ އެކްޓިވިސްޓުން އަންނަނީ، މީސް މީޑިއާގައި ސަރުކާރަށް ތައުރީފް އޮއްސަމުންނެވެ.
ނަމަވެސް ސަރުކާރާއި ދެކޮޅު ފަރާތްތަކުން އަންނަނީ، ދޭނެ ކަމަށް ބުނާ އެ ގޯތި ތަކުގެ ތެރެއިން ގިނަ ގޯތި ދިނުމަށް ހަމަޖެހިފައިވާ ބިންތައް އަދި ނުވެސް ހިއްކާއިރު, އެތަނުން ގޯތި ދިނުމުން ސަރުކާރަށް ފާޑުކިޔަމުންނެވެ. އެހެނީ 'ބިންވެރިޔާ' ސްކީމުގެ ދަށުން ގޯތި ދޫކުރަނީ ހުޅުމާލެ އާއި ގުޅީފަޅު އަދި ގިރާވަރު ފަޅު ހިއްކައިގެން ކަމަށް ސަރުކާރުން ބުނާއިރު، އެތަންތަން ހިއްކުމުގެ މަސައްކަތް ރަނގަޅަށް ނުވެސް ފެށެއެވެ.
އެހެންކަމުން އެކަމަށް ފާޑު ވިދާޅުވެ ވައްޑެ ކުރެއްވި ޓުވީޓެއްގައި ވިދާޅުވީ، މިސަރުކާރަށް އަމީނީމަގު އެންމެ ސެގްމަންޓެއްވެސް ވަނީ ބޮޑު މެގަޕްރޮޖެކްޓަކަށް ކަމަށެވެ.
"ބޯހިޔާވަހިކަމަށް އެދެން ހުޅުވާލުމުން ކުރިމަތިލާ މީހުންގެ ދިގު ލިސްޓުވެސް ފެންނަނީ ގޯތި ދީ ނިންމާފައި ތިބިހާ މީހުން ގޮތަށް. ވުޖޫދުގައި ނުވެސް ނެތް ކަންކަމާ ގުޅުވައިގެންވެސް ކަލަގޮވުން ނޫންކަމެއް ނުކުރޭ." ވައްޑެ ވިދާޅުވި އެވެ.
ބިމެއް ނެތް ނިކަމެތިންނަށް ދޫކުރި ގޯތި، ރައްޔިތުންގެ މަޖިލީހުގައި މާލޭގެ 15 ދާއިރާ ތަމްސީލުކުރައްވާ މެމްބަރުންގެ ތެރެއިން އަށް މެމްބަރަކަށާއި އެހެން ދާއިރާތައް ތަމްސީލުކުރައްވާ މެމްބަރުންގެ ތެރެއިން ދެ ބޭފުޅަކަށް ވަނީ ލިބިވަޑައިގެންފައެވެ.
އޭގެ ތެރޭގައި ހިމެނިވަޑައިގަންނަވަނީ، ވެރިކަން ކުރާ އެމްޑީޕީގެ ފަސް މެމްބަރަކާއި ސަރުކާރާ ދެކޮޅަށް އުފެއްދުމަށް މަސައްކަތް ކުރަމުން އަންނަ 'ދަ ޑިމޮކްރެޓްސް'އަށް ނިސްބަތްވެވަޑައިގަންނަވާ ހަތަރު މެމްބަރަކާއި އެމްއެންޕީގެ މެމްބަރެކެވެ.
Advertisement
This content is created and paid for by advertisers and does not involve Voice Journalists
