ޢީދު ކުޅިވަރުގައި ވެސް، އެހެނިހެން ކުޅިވަރުތަކުގައިވެސް ހެދުން އެޅުމުގެ ކޮންމެސް ކަހަލަ މިންގަނޑުތަކެެއް ހުންނަންޖެހޭ ކަމަށް ހެރިޓޭޖް މިނިސްޓަރު ޔުމްނާ މައުމޫން ވިދާޅުވެއްޖެއެވެ.
ބަރަކާތްތެރިވެގެންވާ އަޟުހާ ޢީދު ފާހަގަކުރުމުގެ ނަމުގައި ގއ. ވިލިނގިލީގައި ނިވާކަން ކުޑަ ހެދުންތަކެއް ލައިގެން އަންހެނުން ތަކެއް ނެށުމާއި ގުޅިގެން ޔުމްނާ ކުރެއްވި ޓުވީޓެއްގައި ވިދާޅުވީ، ޢީދަކީ ރަށުގެ ކުދިބޮޑު އެންމެން އެއްވެ އުފާފާޅުކޮށް ސަގާފީ ކުޅިވަރާއި ޒަމާނީ ކުޅިވަރުގެ ތެރެއިން އިޖުތިމާޢީ ރޫޙު އާލާ ކުރާ ދުވަސްވަރެއް ކަމަށެވެ.
އަދި ޢީދު ކުޅިވަރުގައި ވެސް، އެހެނިހެން ކުޅިވަރުތަކުގައިވެސް ހެދުން އެޅުމުގެ ކޮންމެސް ކަހަލަ މިންގަނޑުތަކެެއް ހުންނަންޖެހޭ ކަމަށް އޭނާ ވިދާޅުވި އެވެ.
ބަރަކާތްތެރި ވެގެންވާ ހައްޖުގެ އަޅުކަމާއި ގުޅިގެން މުސްލިމުން ފާހަގަކުރާ މި ޢީދުގައި، ޢީދު އުފާ ފާޅުކުރާއިރު، އިސްލާމީ ހުދޫދު ތަކާއި، އަޚްލާގީ މިންގަނޑުގެ ތެރޭގައި ޢީދު ފާހަގަކުރުމަށް ޢިލްމުވެރިން ތަކުރާރުކޮށް ނަސޭހަތްތެރިވަމުން އަންނައިރުވެސް، ދީނީ އަދި އިޖުތިމާއީ އަޚްލާޤީ މިންގަނޑުން ވެސް ބޭރުން ޢީދު ފާހަގަ ކުރުން ވަނީ އާއްމު ވެފައެވެ.
އެގޮތުން ފާޑުފާޑުގެ މިއުޒިކް ޝޯތައް ބޭއްވުމާއި، ދެ ޖިންސް އެއްވެގެން ކުޅޭ ކުޅިވަރުތައް ބައެއް ރަށްރަށުގައި އަންނަނީ ކުޅެމުންނެވެ. އެކަމާއި ގުޅިގެން ގިނަ ބައެއްގެ ފާޑުކިޔުންތައް ވެސް އެ ފަރާތްތަކަށް އަންނަނީ އަމާޒުވަމުންނެވެ.
Advertisement
This content is created and paid for by advertisers and does not involve Voice Journalists
