ރާއްޖޭގެ އެންމެ އަގުބޮޑެތި ބިންތަކުން (މާލެ ސަަހައްދުން) ހިލޭ ގޯތި ބަހަން ސަރުކާރުން ނިންމުމާއި ގުޅިގެން ހުޅުމާލޭ ދެވަނަ ފިޔަވަހީގައި އަޅާފައިވާ ހިޔާ ފްލެޓުތަކުން ކުލިދެއްކުން ހުއްޓާލަން މަޝްވަރާކުރަން ފަށައިފި އެވެ. 

މި މަޝްވަރާތައް ފަށާފައިވަނީ ބޯހިޔާވަހިކަމުގެ ހައްޤު ކަށަވަރުކޮށްދިނުމަށް މަސައްކަތް ކުރަމުން އަންނަ އާންމުންގެ އެކުވެރި ގުޅުން (ކޮތަރުކޮށި) ޖަމުއިއްޔާއިން ހިޔާ ފްލެޓުތަކުގައެވެ. 

އެ ޖަމުއިއްޔާއިން ބުނީ މާލޭ މީހުންނަށް ހިލޭ ގޯތި ބަހަން ސަރުކާރުން ނިންމުމުން ހުރިހާ ސޯޝަލް ހައުސިންއެއްގެ ކުލި ދެއްކުން ހުއްޓާލުމާއި ގުޅޭ ގޮތުން ހިޔާ ފްލެޓުގެ އެޗް-4 ގެ މީހުންނާއެކު އިއްޔެ މަޝްވަރާ ބައްދަލުވުމެއް ބާއްވާފައިވާ ކަމަށެވެ. 

އާންމުންގެ އެކުވެރި ގުޅުން ޖަމުއިއްޔާއިން ބުނީ ހުޅުމާލެ ފަދަ އަގު ބޮޑު ތަނަކުން ބިން ހިލޭ ދޫކުރަން ނިންމާ ލިސްޓް އާންމު ކުރިއިރު އަނެއް ބަޔަކު ކުލީގައި ދިިރިއުޅެން ޖެހުމަކީ ގަބޫލު ކުރެވޭނެ ކަމެއް ނޫން ކަމަށެވެ. 

އެހެންކަމުން ހިޔާ ފްލެޓުގެ ކުލި ދެއްކުން ހުއްޓާލުމުގެ މަޝްވަރާތައް ފަށައި، ހުރިހާ ޓަވަރެއްގައި ދިރިއުޅޭ ފަރާތްތަކާއެކު އެ މަޝްވަރާތައް ކުރިއަށް ގެންދާނެކަމަށް އެ ޖަމުއިއްޔާއިން ވަނީ ބުނެފަ އެވެ. 

ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން މާލޭގެ ރަށްވެހީންނަށް ގޯތި ދިނުމަށް ހިންގާ "ބިންވެރިޔާ" ސްކީމްގެ ދަށުން ފުރަތަމަ ބުުރުގައި ދޫކުރާ 5،000 ގޯތި ލިބޭ މީހުންގެ ވަގުތީ ލިސްޓް މިހާރު އޮތީ ގެޒެޓްކޮށްފައެވެ.

މިހާރު ދިނުމަށް ހަމަޖެހިފައިވާ 5،000 ގޯތި ލިބޭ މީހުންގެ ނަން ހިމެނޭ ވަގުތީ ލިސްޓްގައި ހިމެނޭ މީހުންގެ އަދަދަކީ 10،314 މީހުންނެވެ. ޝަރުތު ހަމަވެ އެހެން ނަމަވެސް 9،544 މީހަކަށް މިވަގުތު ގޯތި ނުލިބޭނެ އެވެ. 

މިހާރު އާންމުކޮށްފައިވާ ގޯތި ލިސްޓަށް ވެސް ވަނީ ގިނަ ފާޑުކިޔުންތަކެއް އަމާޒުވެފަ އެވެ. 

އެގޮތުން ސަރުކާރުން ހިލޭ ބަހާ ގޯތި ލިބޭ މީހުންގެ ތެރޭގައި ރިއަލް އެސްޓޭޓް ވިޔަފާރިވެރިންނާއި، ރައީސުލްޖުމްހޫރިއްޔާ އިބްރާހިމް މުޙައްމަދު ޝާލިހުގެ އަރިސް ބޭފުޅުންނާއި، ބިދޭސީން ވެސް ހިމަނާފައިވާތީ ގިނަ ޝަކުވާތަކެއް ވެސް އާންމުންދަނީ އުފުލަމުން ނެވެ. 

އޭގެ އިތުރުން ގޯތި ލިސްޓަކީ އިންސާފުވެރިކޮށް އެކުލަވާލާފައިވާ ލިސްޓެއް ނޫން ކަމަށާއި، އެ ލިސްޓަކީ ރައީސް ޞާލިހު އަންގަވައިގެން ވަކި ގޮތަކަށް އެކުލަވާލާފައިވާ ލިސްޓެއްކަމަށް އިދިކޮޅު ފަރާތްތަކުން ގެންދަނީ ތުހުމަތު ކުރައްވަމުން ނެވެ.