ރާއްޖޭގެ ވެރިކަން ކުރާ ރަށް ފުރަމާލެ ތަރައްގީ ކުރީ ހުރިހާ އަތޮޅުތަކުގެ މީހުން ވެސް މާލެއަށް ޚަރަދުތަކެއް ކޮށްގެންކަމަށް ކުރީގެ ބަންޑާރަނައިބު އާޒިމާ ޝުކޫރު ވިދާޅުވެއްޖެ އެވެ. 

އާޒިމާ މިފަދައިން ވިދާޅުވެފައިވަނީ ހުޅުމާލޭގެ ދެވަނަ ފިޔަވަހީގައި ކުރީ ސަރުކާރުން ހަދާފައިވާ ހިޔާ ފްލެޓުތަކަށް ކުލި ދައްކަމުންދާއިރު، ހުޅުމާލެގެ އަގުބޮޑެތި ބިންތައް ސަރުކާރުގެ "ބިންވެރިޔާ" ސްކީމުގެ ދަށުން ގޯތި ދޫކުރާ އުސޫލުން މަދުބަޔަކަށް ހިލޭ ބަހާލަން ނިންމުމާއި ގުޅިގެން އުފެދިފައިވާ ބަހުސްގައި އެއްޗެއް ވިދާޅުވެ ފޭސްބުކުގައި ލިޔުއްވި ޕޯސްޓެއްގަ އެވެ. 

މާލޭ ރައްޔިތުންނަށް ޚާއްސަކޮށްގެން ދޭ 5000 ގޯތި ހިލޭ ބަހާއިރު، ސަރުކާރުން ދޫކޮށްފައިވާ ފްލެޓުތަކަށް ކުލި ދައްކަން ޖެހުމަކީ އެންމެ އިންސާފުވެރި ގޮތް ނޫންކަމަށް ބައެއް ޖަމުއިއްޔާ ޖަމާއަތްތަކާއި އާންމު ރައްޔިތުން ދަނީ ބުނަމުންނެވެ. 

ހިލޭ ގޯތި ދޫކުރުމަށް ތާއީދުކުރާ ފަރާތްތައް ބުނަމުން އަންނަނީ އަތޮޅުތެރޭގެ ރަށްތަކުގައި ވެސް ގޯތި ދޫކުރަނީ ހިލޭ ކަމަށެވެ. 

އެހެންކަމުން މާލެއިން ވެސް ހިލޭ ގޯތި ލިބެންޖެހޭނެ ކަމަށާއި، މާލޭ ރައްޔިތުންނަށް ހިލޭ ގޯތި ބެހުމަކީ ތަފާތުކުރުންކަމަށް ނުބެލެވޭނެ ކަމަށެވެ. 

އެ މަޢުލޫގައި އާޒިމާ ކުރެއްވި ޕޯސްޓުގައި ވިދާޅުވެފައި ވަނީ ލެ އާއި އަތޮޅުތަކުގެ މެދުގައި އޮންނަ ބައިބައިވުން ބޮޑުވެ މާލޭގައި ދިރިއުޅުމަށް އޮތް "ޑިމާންޑު" ބޮޑުވެގެން ދިޔައީ ހަމައެކަނި މާލެ ތަރައްގީ ކުރުމުން ކަމަށެވެ. 

އެހެން ނަމަވެސް މާލެ ތަރައްގީކުރީ ހަމައެކަނި މާލޭ މީހުން އިންވެސްޓުކޮށްގެން ނޫން ކަމަށާއި، މާލޭގެ ތަރައްގީއަށް އަތޮޅުތެރޭގެ ހަމަ ކޮންމެ ރަށަކުންވެސް ޚަރަދުކޮށްފައިވާކަމަށް އާޒިމާ ވިދާޅުވި އެވެ. 

އެހެންކަމުން، ބޯހިޔާވަހިކަން ކަށަވަރުކޮށްދިނުމުގެ މަސައްކަތް ސަރުކާރުން ކުރާއިރު، ސަރުކާރުން ގެންގުޅޭ ސިޔާސަތުތަކުގައި ތަފާތުކުރުންތައް ގެންގުޅޭނަމަ، އެއީ އޭގެ ސަބަބުން މިހާރު އުފެދިފައިވާ ބައިބައިވުންތައް އަދި އިތުރަށް ބޮޑުވެގެންދާނެ ކަމެއްކަމަށް އާޒިމާ ވިދާޅުވި އެވެ. 

އާޒިމާ ވިދާޅުވީ ހުރިހާ ދިވެހިންނަކީ ވެސް ހަމަހަމަ ބައެއް ކަމަށެވެ. އަދި ސަރުކާރުގެ ސިޔާސަތުތަކުގައި ވެސް ރައްޔިތުންގެ މެދުގައި ތަފާތުކުރުންތަކެއް ގެންގުޅިގެން ނުވާނެކަމަށް އާޒިމާ ވަނީ ވިދާޅުވެފަ އެވެ.