މާލެއާއި ތިލަފުށު ގުޅާލުމަށް އަޅާ ތިލަމާލެ ބްރިޖުގެ މަސައްކަތް ނިންމާ އަންނަ އަހަރު ބޭނުން ކުރަން ފެށޭނެކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވިދާޅުވެއްޖެ އެވެ. 

އެމަނިކުފާނު މިފަދައިން ވިދާޅުވެފައި ވަނީ ގުޅިފަޅުގެ ދެވަނަ ފިޔަވަހި ހިއްކަން ފެށުމަށް ބޭއްވެވި ރަސްމިއްޔާތުގައި ވާހަކަފުޅުދައްކަވަމުން ނެވެ. 

ރައީސް ޞާލިހު ވިދާޅުވީ މާލެ ރައްޔިތުންނަށް ގޯތި ދޫކުރުމަށް ހުޅުވާލި ބިންވެރިޔާ ސްކީމުގެ މަޝްރޫއު މުޅިން ފުރިހަމަ ވެގެންދާނީ މާލެއިން ތިލަފުއްޓަށް އަޅާ ބްރިޖުގެ މަސައްކަތް ނިމި އެ ސަރަހައްދާއި މާލެއާއި ގުޅާލުމުން ކަމަށެވެ. 

Advertisement

އަންނަ އަހަރުގެ ތެރޭގައި އެ މަސައްކަތް ވެސް ނިމިގެންދާނެ ކަމަށާއި، ދެން އޮންނާނީ ބްރިޖުން ގުޅިފަޅު ގުޅާލުމުގެ މަސައްކަތްކަމަށް ރައީސް ޞާލިހު ވިދާޅުވި އެވެ. 

ތިލަ މާލެ ބްރިޖުގެ މަޝްރޫއަކީ މި ސަރުކާރުން މިހާތަނަށް އިއުލާނުކުރި އެންމެ ބިޔަ މަޝްރޫއެވެ. އެ މަޝްރޫއު ކުރިއަށް ގެންދަނީ އިންޑިއާގެ އެފްކޯންސް ކުންފުންޏާއި ހަވާލުކޮށްގެން ނެވެ. 

ތިލަމާލެ ބްރިޖު އަޅަނީ އިންޑިއާގެ 100 މިލިއަން ޑޮލަރުގެ ހިލޭ އެހީއާއި 400 މިލިއަން ޑޮލަރުގެ ލޯނު ފައިސާއިން ނެވެ. 

މި މަޝްރޫއު ކުރިއަށް ދާ ސްޕީޑާއި ގުޅިގެން ބޮޑެތި ކަންބޮޑުވުންތަކެއް އާންމުން ފާޅުކުރަމުންދާއިރު، ޕްލޭނިން މިނިސްޓަރު އަސްލަމް ވެސް ވަނީ ޝެޑިއުލާއި އެއްގޮތަށް އެ މަސައްކަތް ކުރިއަށް ނުދާކަމަށް ވިދާޅުވެފަ އެވެ. 

އެހެން ނަމަވެސް އެ މަސައްކަތް ނިންމާލެވޭނެކަމުގެ ޔަގީންކަން އޮތްކަމަށް އަސްލަމް ވެސް ވަނީ ވިދާޅުވެފަ އެވެ.