މަޖިލީހުގެ ދައުރުން ބޭރުގައި މިއަދު ބޭއްވުނު ޖަލްސާގެ އެޖެންޑާގައި ވާ މަސައްކަތް ކުރިއަށް ގެންދެވެން ނެތް ކަމަށް ބަލައި، އެއްވެސް ކަމެއް ނުކޮށް، ޖަލްސާ ނިންމަވާ ލައްވައިފި އެވެ.
މަޖިލީހުގެ ދައުރުން ބޭރުގައި މިއަދު ބޭއްވި ޚާއްސަ ޖަލްސާއަކީ އެކަމަށް އެދި، އެމްޑީޕީގެ 29 މެންބަރުން މަޖިލީހަށް ހުށަހެޅުމާއި ގުޅިގެން ބޭއްވި ޖަލްސާއެކެވެ. މި ޖަލްސާގައި އެންމެ ފުރަތަމަ ކުރެއްވުމަށް އެންމެ އިސްކަމެއް ދެއްވުމަށް އެ މެންބަރުން އެދިލައްވާފައިވަނީ ދާއިމީ ކޮމިޓީތައް އެކުލަވާލުމުގެ މަސައްކަތެވެ.
އެހެންކަމުން، މިއަދުގެ ޖަލްސާގެ އެޖެންޑާގައި އޮތީވެސް، ރައްޔިތުންގެ މަޖިލީހުގެ ދާއިމީ ކޮމިޓީތަކުގައި ހިމެނިވަޑައިގަންނަވާ ސިޔާސީ ޕާޓީތަކަށް ނިސްބަތްވެވަޑައިގަންނަވާ މެންބަރުންނާއި، ވަކި ޕާޓީއަކަށް ނިސްބަތްވެވަޑައިނުގަންނަވާ މެންބަރުން ތަމްސީލުކުރައްވާނެ ގޮތަށް ގެނެވޭ ބަދަލާގުޅޭ މައްސަލަ އަށް ބަހުސް ކުރުމެވެ.
އެހެންނަމަވެސް, މަޖިލީހުގެ ޖަލްސާ ފަށްޓަވަމުން ރިޔާސަތުގައި އިންނެވި ވިލިފުށި ދާއިރާގެ މެންބަރު ހަސަން އަފީފު ވިދާޅުވީ، ވެރިކަންކުރާ މައި ޕާޓީ، އަދި މަޖިލީހުގެ މެޖޯރިޓީ ޕާޓީ، އެމްޑީޕީގެ ކުރީގެ ރައީސް، އަދި މަޖިލީހުގެ ރައީސް މުހައްމަދު ނަޝީދު އާއި އެޕާޓީގެ އެހެން މެންބަރެއް ޕާޓީން ވަކިވެވަޑައިގެންނެވުމާއި ގުޅިގެން މަޖިލީހުގެ އެމްޑީޕީ މެންބަރުންގެ ނިސްބަތަށް ބަދަލު އައިސްފައިވާ ކަމަށެވެ.
އެހެންކަމުން، މެންބަރުން ހިމެނޭނެ ގޮތާއި ގުޅިގެން ކުރިން އެކުލަވައިލެވުނު ރިޕޯޓް އަށް މިވަގުތު އަމަލު ކުރެވެން ނެތް ކަމަށާ، އަލުން އެ ރިޕޯޓް އެކުލަވައިލަންޖެހޭ ކަމަށްވެސް އަފީފު ވިދާޅުވި އެވެ. ވުމާއެކު މިއަދު ޖަލްސާ ކުރިއަށް ގެންދެވެން ނެތް ކަމަށްވެސް އޭނާ ވިދާޅުވި އެވެ.
ނަމަވެސް މިހާރު އަނެއްކާވެސް ތަމްސީލުކުރާ ގޮތަށް ބަދަލެއް އައިސްފައި މިވަނީ. އެއީ އެމްޑީޕީ މައްޗަންގޮޅި މެދު ދާއިރާގެ މެންބަރު، މުހައްމަދު ނަޝީދު އާއި، އަދި އައްޑު އަތޮޅު ހިތަދޫ މެދު ދާއިރާގެ މެންބަރު އަހުމަދު ރަޝީދު، ވަކިވެވަޑައިގެންފައި ވާތީވެ، މިހާރު އެމްޑީޕީގެ މެންބަރުންގެ އަދަދު ވަނީ ދަށްވެފައި. އަދި ވަކި ޕާޓީއަކަށް ނިސްބަތްވެވަޑައިނުގަންނަވާ މެންބަރުންގެ އަދަދު ވަނީ އިތުރުވެފަ. އެހެންވީމާ، މި ބަދަލާއި އެކުގައި މި ރިޕޯޓް ޖެހޭނީ އަލުން މެންބަރުންނަށް ސަކިއުލޭޓް ކުރަން. އެހެންވީމާ މިއަދުގެ ޖަލްސާއެއް މިއަދު ކުރިއަށް ގެންދެވެން ނެތް، ސާކިއުލޭޓް ކޮށްފައި، އެއަށް އަނެއްކާ މެންބަރުން އިސްލާހު ހުށަހެޅުމާއި ގުޅިގެން ނޫނީ.
މިވަގުތު ރައްޔިތުންގެ މަޖިލީހުގައި ތިބި އެމްޑީޕީގެ މެންބަރުންގެ އަދަދަކީ 54 އެކެވެ. އަދި ޕީޕީއެމްގެ 5 މެންބަރުން ތިބި އިރު ޕީއެންސީގެ ތިބީ 3 މެންބަރުންނެވެ. އަދި އެމްއެންޕީގެ 3 މެންބަރުންނާއި، ޖުމްހޫރީ ޕާޓީގެ ދެ މެންބަރުން އަދި އެމްޑީއޭގެވެސް ތިބީ ދެ މެންބަރުންނެވެ. މަޖިލީހުގެ މައިނޯރިޓީ އަށް މިވަގުތު ތިބީ ވަކި ޕާޓީއަކަށް ނިސްބަތް ނުވާ މެންބަރުންނެވެ. އެގޮތުން، އޭގެ ތެރޭގައި 18 މެންބަރުން ހިމެނެއެވެ.
ހަސަން އަފީފު ވިދާޅުވީ، މިހާރު އައިސްފައިވާ ބަދަލާއި އެކު، ދެން ޖަލްސާ ކުރިއަށް ގެންދެވޭނީ، ރިޕޯޓް އަލުން މެންބަރުންގެ މެދުގައި ސާކިއުލޭޓް ކުރުމަށް ފަހުގައި ކަމަށެވެ. އެހެންކަމުން، މިއަދުގެ ޖަލްސާ ވަނީ އެއްވެސް ކަމެއް ނުކޮށް ނިންމާލާފައެވެ.
Advertisement
This content is created and paid for by advertisers and does not involve Voice Journalists
