ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު މިހާރު އެކަނިވެރި ވެފައިވާ ކަމަށާ، އެމަނިކުފާނުގެ ވެރިކަން ވެއްޓެމުންދާ މި ދަނޑިވަޅުގައި، ސަރުކާރުގެ ފިއްތުންތަކަމުގެ ތެރެއަށް ޝަރުއީ ދާއިރާވެސް ދެން ނުދާނެ ކަމަށް އިދިކޮޅު ޕީޕީއެމް/ޕީއެންސީން ބުނެފިއެވެ.
އިދިކޮޅު ޕީޕީއެމްގެ ރިޔާސީ ކެންޑިޑޭޓް ރައީސް އަބްދުالله ޔާމީން އަބްދުލްގައްޔޫމްގެ ރިޔާސީ ކެމްޕޭން އަމަލީ ގޮތުން ފެށުމުގެ ގޮތުން މިއަދު އިދިކޮޅުން މާލޭގެ ބައެއް ގެތަކަށް ދޮރުން ދޮރަށް ހިނގާފައެވެ.
އެއަށްފަހު، އެކަމާއި ގުޅިގެން ބޭއްވި ނޫސްވެރިންގެ ބައްދަލުވުމައި ނޫސްވެރިއެއް ވަނީ، މިވަގުތު ރައީސް ޔާމީން ޖަލުގައި ހުންނެވުމުން އެމަނިކުފާނަށް ރިޔާސީ އިންތިހާބުގައި ބައިވެރިވެވޭނެ ކަމަށް ދެކޭތޯ ސުވާލު ކޮށްފައެވެ.
އެ ސުވާލަށް ޖަވާބު ދެއްވަމުން ޕީއެންސީގެ ރައީސް އަބްދުއްރަހީމް އަބްދުالله ވިދާޅުވީ، ރައީސް ޔާމީނަށް ކުރަމުން ގެންދަވަނީ އިންސާފުން ބޭރުން ކުރާ "އަނިޔާ" ކަމަށާ، އެހެން ކަމުން އެމަނިކުފާނު ޖަލުން މިނިވަންވެ ވަޑައިގަންނަވާނެ ކަމާއިމެދު ޔަގީންކަން އޮތް ކަމަށެވެ.
"އިންސާފު އަރާ ހަމަކުރާނެ އަބަދުވެސް. އެހެންވީމާ އަޅުގަނޑުމެން ގަބޫލު ކުރަނީ، މަތީ މަރުހަލާގެ ކޯޓުތަކުގެ އެ ތިވެ ފަނޑިޔާރުންވެސް ގައުމާއި މެދުގައި ވިސްނާނެ ކަމަށް."
އަބްދުއްރަހީމް އަބްދުالله
އަދުރޭ އިތުރަށް ވިދާޅުވީ، މިސަރުކާރު މިހާރު ނިމިފައިވާ ކަމަށެވެ. އެހެންކަމުން، މިފަދަ ނިމެމުންދާ ސަރުކާރުގެ ފިއްތުމުގެ ތެރެއަށް ޝަރުޢީ ދާއިރާވެސް ދާނެ ކަމަށް ގަބޫލު ނުކުރައްވާ ކަމަށެވެ. ވުމާއެކު، ރައީސް ޔާމީންގެ މައްސަލަތައް ނިމޭނީ އެމަނިކުފާނަކީ މައުސޫމު ބޭފުޅެއްގެ ގޮތުގައި ކަނޑައެޅިގެން ކަމަށްވެސް އަދުރޭ ވިދާޅުވިއެެވެ.
މި ސަރުކާރު މިއޮތީ ނިމިފައި. އިބްރާހީމް މުހައްމަދު ޞާލިހު އެކަނިވެރި ވެއްޖެ. އޭނާ ޔަތީމެއްގެ ހާލަތައް ހިނގައްޖެ. މިއަދު އެހީތެރި ވާނެ މީހެއް ނެތް. އަޅާލާނެ މީހެއް ނެތް. ހެޔޮ ބަހެއް ބުނާނެ މީހެއް ނެތް. އެހެންވީމާ މިފަދަ، ސަރުކާރެއް ނިމިގެންދާ ވަގުތުގައި، ސަރުކާރުގެ ފިއްތުމުގެ ތެރެއަކަށް ޝަރުޢީ ދާއިރާ ދާނެކަމަށް އަޅުގަނޑު ގަބޫލެއް ނުކުރަން. އެއަށްވުރެ ގައުމާއި ދޭތެރޭ ވިސްނާ ވަޑައިގަންނަވާ، އިންސާފަށް ލޯބިކުރާ ފަނޑިޔާރުން ކޯޓުތަކުގައި ތިބި ކަމަށް އަޅުގަނޑު ގަބޫލު ކުރަނީ. މި ހައިކޯޓުގައި ހިނގަމުންދާ މައްސަލަ އިރާދަކުރެއްވިއްޔާ ނިމިގެންދާއިރު, ރައީސް ޔާމީން މައުސޫމް ބޭފުޅެއްގެ ގޮތުގައި ނިކުމެވަޑައިގަންނަވާނެ. ނިކުމެވަޑައިގެންނެވުމާއި އެކީގައި، ކެންޕެއިން އިތުރު ގިޔަރަކަށް އޮޓޮމެޓިކުން ވެގެންދާނެ.
އަބްދުއްރަހީމް އަބްދުالله
ޕީޕިއެމް ޕީއެންސީ ކޯލިޝަނުން ރައީސް ޔާމިންގެ ރިޔާސީ ކެމްޕެއިން މިއަދު ފަށާއިރު، އާރަށް ކުއްޔަށް ދިން ކަމަށް ބުނާ މައްސަލަ އާއި އަދި ދައުލަތުން އުފުލާފައިވާ ރިޝްވަތާއި މަނީ ލޯންޑަރިންގެ ދައުވާ ސާބިތުވާ ކަމަށް ކަނޑައަޅައި، 11 އަހަރުގެ މުއްދަތަކަށް ރައީސް ޔާމީން ވަނީ ޖަލަށްލައިފައެވެ.
މީގެ އިތުރުންވެސް އެމްއެމްޕީއާރްސީގެ ހިޔާނާތުގެ ތެރެއިން ރ. ފުއްގިރި ކުއްޔަށް ދޫކުރި މުއާމަލާތާ ގުޅިގެން އުފުލާފައިވާ މަނީލޯންޑަރިންގެ ދައުވާއާއި ރިޝްވަތުގެ ދައުވާގެ އަޑުއެހުންތައް މިހާރު ކްރިމިނަލް ކޯޓުގައި ދަނީ ކުރިއަށެވެ.
Advertisement
This content is created and paid for by advertisers and does not involve Voice Journalists
