އުފަންވާ ކޮންމެ ކުއްޖަކަށް ހަދިޔާ ފޮއްޓެއް ދިނުމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވެލެެއްވި ވައުދު ނުފުއްދުނު ކަމަށާއި، ދައުރު ނިމެނޭއިރު ކޮންމެ ކުއްޖަކަށް ލިބުނީ ބޮޑު ދަރަންޏެއް ކަމަށް އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑެ) ވިދާޅުވެއްޖެއެވެ.
ރައީސް ޞާލިހުގެ ރިޔާސީ އިންތިހާބުގެ ކެމްޕޭންގައި ވެވަޑައިގެންނެވި އެއްވައުދަކީ އެމަނިކުފާނަށް ވެރިކަމަށް އާދެވިއްޖެނަމަ، ރާއްޖޭގައި އުފަންވާ ކޮންމެ ކުއްޖަކަށް ހަދިޔާ ފޮއްޓެއް ދިނުމެވެ. އަދި އެވައުދު, ވެރިކަމުގެ ފުރަތަމަ 100 ދުވަހުގެ ތެރޭގައި ފުއްދަވާނެ ކަމަށްވެސް އެމަނިކުފާނު ވިދާޅުވިއެވެ.
އުފަންވާ ކޮންމެ ކުއްޖަކަށް ދޭން ވައުދުވެ ވަޑައިގެންނެވި މި ހަދިޔާ ފޮށީގައި ކުއްޖަކު އުފަންވާއިރު، ކުއްޖާއަށާއި، ކުއްްޖާގެ މަންމައަށް ބޭނުންވާނެ ހުރިހާ މުހިންމު އެއްޗެއް ހުންނާނެ ކަމަށް ރައީސް ޞާލިހް އޭރު ވައުދުވެވަޑައިގެންނެވިއެވެ. ނަމަވެސް ދައުރު ނިމެން ދެތިން މަހަށް ވެފައިވާއިރު އަދި މިހާތަނަށް ސަރުކާރުން އެވައުދު ފުއްދާފައެއް ނުވެއެވެ.
އެކަމާއި ގުޅިގެން "އިބޫ ނޫންގޮތެއް" ހޭޝްޓެގް ލިޔުއްވައި ވައްޑެ ކުރެއްވި ޓުވީޓެއްގައި ވިދާޅުވީ، ރައީސް ޞާލިހް ވަޢުދުވީ އުފަންވާ ކޮންމެ ކުއްޖަކަށް ހަދިޔާފޮއްޓެއް ދެއްވަން ކަމަށެވެ. އެހެން ނަމަވެސް، ދައުރު ނިމޭއިރު އުފަންވާ ކޮންމެ ކުއްޖަކަށް ލިބުނީ ދެލައްކަ ފަންސާސްހާހަށްވުރެ ބޮޑު ދަރަންޏެއް ކަމަށް އޭނާ ވިދާޅުވިއެވެ.
ކޮންމެ ކުއްޖެއްގެ ބޮލަށް ދެ ލައްކައަށްވުރެ ބޮޑު ދަރަންޏެއް އެޅިފައިވާ ކަމަށް ވައްޑެ ވިދާޅުވެފައިވާއިރު، ރާއްޖޭގެ ދަރަނި މީގެ ކުރިން ނުދާހާ މައްޗަށް މިހާރު ވަނީ ގޮސްފައެވެ. އެގޮތުން، ދަރަނި މިހާރު ވަނީ 100 ބިލިއަން ރުފިޔާ ހުރަސް ކޮށްފައެވެ.
Advertisement
This content is created and paid for by advertisers and does not involve Voice Journalists
